7
Tepad te peg-okom
Mat. 7:1-6; Luc. 6:37-38,41-42
1 “Ikà niyo eg-okom te doma otaw amon eked kaw heman okomi.
2 Okomen kaw onawa te peg-okom niyo te menge doma otaw. Keidowan kaw heman onawa te pegkeido niyo te menge doma otaw.
3 Mola niyo egkitaen se sagbet kidoen te mata te doma niyo, meneng wedà niyo ketegahi te doen batang kidoen te kenyo mata.
4 Aw doen batang kidoen te kenyo mata, eked kaw peketabang te doma niyo amon meabat se sagbet lekat te kandin mata.
5 Kolang se aneng-aneng niyo. Ebati niyo onà se batang lekat te kenyo mata, aw penga niyan metaen se pegkità niyo amon mengabat kaw heman te sagbet lekat te mata te doma niyo.
6 “Pekeimanday kaw te pegtoladà niyo te kebenalan. Eked kaw pemowang te mèpiya diyà te menge toyang, so memangà dan beling kenyo. Eked kaw heman pemegay te pirlas meelagà ipeninga diyà te menge osa, so peglegìtan dan beling iyan.”
Pemoyò, pengemahà, pegtawal
Mat. 7:7-12; Luc. 11:9-13
7 “Aw memoyò kaw diyà te Timanem, begayan kaw din. Aw mengemahà kaw, doen kitaen niyo. Aw tomawal kaw doton te lelebangan, ipeawop kaw.
8 Kominawà se kedita te otaw memoyò. Komità se kedita te otaw mengemahà. Ipeawop heman se kedita te otaw tomawal.
9 Aw doen batà niyo memoyò te pan, eked kaw pemegay kandin te bato.
10 Aw memoyò se batà niyo te ikan, eked kaw heman pemegay kandin te memokan.
11 Nayan, pengkey doen medaet eg-inangen niyo, meneng gayed mèpiya se ipegpemegay niyo diyà te menge batà niyo. Labi pa se Amay niyo Timanem kidoen te langit, so egpemegay sikandin te mèpiya diyà te kedita te otaw memoyò diyà kandin.
12 “Aw meibeg kaw te mèpiya se inangen te doma otaw diyà kenyo, keilangan mèpiya heman se inangen niyo diyà te doma otaw. Pineokit kenyan, tomanen niyo se kedita te punù ingkeliwat i Moises aw intoladà te menge telekeliwat te kagi te Timanem gebii.”
Dowa se dalan
Mat. 7:13-14; Luc. 13:24
13 “Mebelad se lelebangan aw mola okitan se dalan pesalo doton te kilot, aw medita se otaw eg-okit kenyan. Meneng okit kaw te lelebangan mesigpit,
14 so mesigpit se lelebangan aw melima se dalan pesalo doton te Timanem egpemegay te kaling pedowan, aw pilabok se otaw komità kenyan.”
Aw mèpiya se pedowan, mèpiya se eg-inangen
Mat. 7:15-20; Luc. 6:43-44
15 “Peg-ahà kaw amon eked kaw keekali te menge otaw egpelingo-lingo telekeliwat te kagi te Timanem. Medaet se tod dan kenyo iling te mebolot menenanap te kebenesan iningedanan lobo egpelingo-lingo iling te ayam-ayam karniro amon megbaet te karniro.
16 Aw kitaen niyo se eg-inangen dan, ketegahan niyo aw olò dan egpelingo-lingo. Wedad palos pongo te paras geniyen lekat te ligem. Wedad heman pongo igira ipoen lekat te telayid.
17 Aw mèpiya se kemolò te kayo, mongo iyan te mèpiya. Meneng aw medaet se kemolò te kayo, mongo iyan heman te medaet.
18 Aw mèpiya se kayo, eked iyan pongo te medaet. Aw medaet se kayo, eked iyan heman pongo te mèpiya.
19 Aw kenà mèpiya se pongo te kayo, pilayen iyan aw sonogen.
20 Yan aw kitaen niyo se eg-inangen dan, ketegahan niyo aw ontò dan telekeliwat te kagi te Timanem.”
Benal sakop
Mat. 7:21-23; Luc. 13:25-27
21 “Kenà kedita te otaw eg-ikagi te siak se pengolo dan se sekopen diyà te peglowan te Timanem, so se otaw egtolò te ibeg te Amay ko Timanem eg-ogpà doton te langit, yan olò se otaw sekopen te Timanem diyà te peglowan din.
22 Aw domateng se aldaw te peg-okom, medita se otaw mikagi diyà kanak, ‘Pengolo, peopi kay bag, so migkeliwat kay te kagi te Timanem tandà te pegtaking day kamno, aw migpelowà kay te bosaw lekat te otaw pineokit te ngadan nikaw, aw doen heman menge kepelahan ininang day pineokit te ngadan nikaw.’
23 Meneng mikagi a diyà kandan, ‘Wedà a palos ketaga-taga kenyo. Kesayo kaw, kedita niyo eg-inang te medaet.’ ”
Dowa otaw mig-inang te balay
Mat. 7:25-27; Luc. 6:47-49
24 “Meg-indan a den diyà kenyo tepad te otaw domineg te kagi ko, aw tomolò kenyan. Iling sikandin te otaw mig-inang te balay. Impetindeg din se tollok diyà te lanto te bato doton didalem te tanà.
25 Penga te peg-inang din te balay, minodan aw miglaneg se wayeg aw neapet se balay din. Mebandes se kelamag nekesogat diyà te balay din. Meneng wedà iyan kebàti, so ontò iyan dimasel.
26 “Meneng aw domineg se otaw te kagi ko, aw eked tolò kenyan, iling sikandin te otaw kolang se aneng-aneng din mig-inang te balay diyà te lanto te enay.
27 Penga niyan, minodan aw miglaneg se wayeg. Mebandes se kelamag nekesogat diyà te balay din, aw penga niyan, netongan iyan aw ontò nebàtan.”
Tolos te toladà i Jesus
28 Penga te pegtoladà i Jesus, ontò nepela se kedita te otaw nenenalan te pegtoladà din.
29 Kenà iling te pegtoladà te menenoladà te punù ingkeliwat i Moises se pegtoladà i Jesus, so tinekingan si Jesus te tolos.