24
Poru Namahajina
1 ꞌEjume hu hiꞌeme naꞌia iropu paꞌareꞌeme pirisitia natohwa kaꞌene Ananaiasina ꞌwavujaho ꞌee puni emakina ꞌee ea kaꞌene ꞌotua arimai ꞌwaraviꞌina ꞌajohiꞌina huni iha Taturiasi ꞌwavujihi puꞌúmo roe kavana ijihuni unaꞌi Poru ꞌotua vetiꞌi roara.
2 ꞌEjuꞌe ea natohwijara Poruho ꞌumejume roume Taturiasi hine ꞌotua vetiꞌi ꞌahaume aneja vene hu namahe ijá ꞌwama
Kavana! Ara nú niꞌajúhuꞌe kame nú mamaa hina rou. Ara oni vwiha kaꞌene mamaijino nitama núni ehija niꞌajihuꞌe ararakino vejuꞌe siserasahujaho marasahara.
3 ꞌEjuꞌukame nú nihoꞌo ꞌunama jajaa ꞌee kwaa mapokakino ijaho ꞌwamareꞌe teamanuma parajura. Ijihunaꞌe nú a Pirikisi kaꞌene ea mamaakere teimani ꞌwavu.
4 ꞌEnakaivo na hine veje a túkirahuna senumu. ꞌEnaꞌomo a icháꞌina vehuniji ꞌwaruꞌamarono jariravukúne a núni vuꞌake hena.
5 Nú kavujaho eakaho nihoꞌo ani ani vene ꞌee ruaruhuna. ꞌEjuꞌe Poruho vejuꞌe Juaka mapoka kaꞌene kwaaka mapokakino hina apenojujijahija ajinama parajura. Hu ea sisea kaꞌene Nasareti ꞌwavujihipuni húmatijina.
6 Hu Temiporu vejume chiha renana. ꞌEjuꞌukame nú hu ꞌuname nuni tamanijara ꞌwarumu jaꞌinaꞌe ꞌotua vetihunaꞌe ura veju.
7 ꞌEjuꞌukaviꞌi Risiasiho Romu opuni sorutia puni natohwijara roe harura vene núni ija tahi apetujúha vaꞌana.
8 ꞌEjuꞌukame hu ea mapoka ꞌwaravuꞌe ea irahipo hu namahujaho oni unaꞌi roe ꞌotua vetihuna ꞌwamana. ꞌEnaꞌomo ara ea kajaho apovakame hura huni irijino ꞌwarave a hehuna. Núra raka kaꞌene hu namahareꞌe ꞌotua veti vejujaho hu ꞌwarave a hehuna ꞌwamana.
9 ꞌEjumakame Jua ꞌahoꞌa vuꞌa kaji henareja pu ꞌuꞌo ijaho nimaa ꞌwavara.
Porura Pirikisi Oni Unaꞌi Huni ꞌUnama Amairie ꞌWaramajina
10 ꞌEjume kavanaijara Porura ꞌwaraꞌamarono ꞌwaramana. ꞌEjume Porura ijá ꞌwama
Na niheju. A juara mapoka ꞌotua vejiꞌinaꞌomo na teamaniꞌejuꞌe vuꞌa ikaho ꞌwaravu.
11 ꞌEnakaivo nara vuꞌa nimaa kaꞌene ꞌwaravuke hena. Naꞌia iropu ropu noꞌo paꞌareꞌeme na Jerusaremi Godi oja maꞌi vaꞌuta.
12 ꞌEnakaivo Temiporu vajina ho Sinakoku vajina ho ara vaja kakino na ea ꞌahopuꞌúmo ꞌurae varapa vehuna pana.
13 ꞌEnaꞌomo iviamaa pura vuꞌa kaꞌene na ꞌotua vetihuni jihuni maijaho pura a najahuna nihoꞌo areri parenau.
14 ꞌEnakaivo na ura vuꞌa kwinu a ꞌwaraꞌi veju. ꞌUnama kaꞌene ea mapoka nimaa rojujihunijaho pu sisea nimarako a ꞌwarava kaji na a ꞌwaraꞌi veju. ꞌEnareja emahu nupo Godi kaꞌene nimaa rojuji na oja mahuta. ꞌEne vuꞌa kaꞌene tamana vaji navujija na nimaa rojura. ꞌEne vuꞌa kaꞌene poropetiepo vejajija ꞌuꞌo nimaa rojura.
15 Na nimaa rojujaho ea kaꞌene kwamasahiꞌinaka ea ariramaa ꞌee ea siseijipo kúꞌo ꞌurihunaka pura nimaa rojajaꞌinaꞌe na ꞌuꞌo nimaa rojura.
16 ꞌEnajihunaꞌe na naꞌia mapoka harura vejukame nuni vwiha vejuꞌe Godoni unaꞌa ꞌee emaapuni ꞌunaꞌi ariraꞌe navuꞌe na namihuna areri parenuna.
17 ꞌEjume juara ꞌahoꞌa paꞌareꞌeme na swara ꞌeke nuni ara kwaa kúꞌo nuni ehijaꞌe vajiꞌirono routa.
18 Na Temiporu vaji maraniꞌama tamanaꞌe vejujaho ijihiꞌa ea mapoka pane ꞌee iranoꞌa pana kaivo Jua kaꞌene Esia rena roajipo kivara.
19 ꞌEnaꞌomo ijipo iviamaa oni unaꞌi namine unenuꞌu ꞌahoꞌa na namihe ꞌee ꞌotua vetihuna reꞌamajaho ꞌotua vetia.
20 ꞌEnakúne ea kaꞌene ike namijukehi aporave na kanisoru puni ꞌunaꞌi sisea rakaꞌe veje kivaraꞌe reꞌavajaho pupusu ꞌwarave hena.
21 ꞌEne unenuꞌu pina kwinu puni unaꞌi namijiꞌi ꞌumejujaho ikena. Na ea kaꞌene kwamasahiꞌinijipo kúꞌo ꞌurihuniji nimaa rojujihunaꞌe ja na iviasi joni nini ꞌotua vetiu ꞌiavuta ꞌwamana.
22 Pirikisiho ꞌUnamijaho hami hena kaviꞌini jihunaꞌe tanuma ijá ꞌiama Risiasi kaꞌene sorutia puni natohwijara roe arihakame hura joni ꞌotujihuni ehijaho vwihane mihuna ꞌiamana.
23 ꞌEnakaivo hu ea kaꞌene ꞌajohiꞌiniji ꞌwaravume Poruho apene ꞌajohaiꞌi ranave ꞌurahoje Poru oni napuhija roe uneunecha hu niꞌajaꞌi veꞌavajaho patanuꞌuriꞌavara ꞌiamana.
Porura Pirikisi Oni Unaꞌi Naminajina
24 Pirikisi oni naparijaho Jua. Huni ihijaho Turusiranaꞌomo Porura roe Jesu Keriso nimaa rojuji ꞌwarave heꞌirono roanaꞌomo ꞌwaramana.
25 ꞌEjume Porura ꞌunama ariramaaru vehuna ꞌwarame ꞌee hia hami ꞌajohuna ꞌee Godira ꞌotua túnaꞌi niꞌimaꞌuraka vehunijaho ꞌwaravume Pirikisiho ijí henarena tea juvume raname ijá ꞌwama Va hinoꞌeje nara kúꞌo ꞌumena hejiꞌi roꞌamana ꞌwamana.
26 ꞌEne veaka nikwinuꞌina kajino Pirikisira vwihanajaho Porura huaꞌe monia vajaꞌeje ranava vaꞌamarorena hu naꞌia mapoka Poru ꞌumejuꞌe hu vaꞌe hu huꞌúmo vuꞌa ꞌwavura.
27 ꞌEꞌeme juara noꞌo paꞌarejume Posiasi Pesitasira Pirikisi oni tinijaho apenana. ꞌEꞌeme Pirikisiho Jua teamanaꞌavarono hu Poru tipurai ranaꞌikaꞌi vaꞌana.