3
Natohwijara Rohuna Nahama ꞌWaramajina
Ehu nuna kaꞌene na ja oja mihiꞌinakije ikaho nuni asura amurijihuni roriji veju. ꞌEnareꞌe joni vwiha ijí venae kúꞌo vwihaꞌavarono veju. ꞌEjakame ja nitama poropetia kaꞌene akuaviꞌinijihipo vuꞌa kaꞌene ꞌwaravara ꞌee Natohwa kaꞌene niꞌajúhiꞌini jihuni tamana kaꞌene apasoruepo ꞌwaravajija vwihahuni jihunaꞌe veju. Ja marako ikaho hena kaꞌavara. Vea túchamaa ea ꞌijahiꞌinijipo roe ꞌijahiꞌi puni hahijipo ura renaujiru vehuna. ꞌEne pu ijaꞌina ꞌihuna Hura rohuna kaꞌene nahama ꞌwaramajaho ichí roo? ꞌiame ꞌijahe ꞌwarahuna. Ijihuni maijaho uneunecha kaꞌene maiꞌo mweꞌa aneja vejajino rene roe emahu núpo kwamasahajino unenuꞌu pina aniꞌina pareꞌejuꞌe nijaꞌinaꞌe navu ꞌiahuna. Godoni ira ꞌahi ichutoa rejara ꞌee mweꞌa ikaho toa vaji roe ꞌeꞌunana ꞌee toi tauhuhe namuna kaivo pu nihena kavu vo pu pataꞌarohu. Ijihuni vaji mweꞌakaho vea kajino sai hirame ruarahana. ꞌEnakaivo iviamaa ichutoa ꞌee mweꞌa ikaho Huni ira ꞌahi venae ꞌajaha irechavuꞌe navu ꞌee ꞌotua kaꞌene vehuna ꞌee ea sisea kaꞌene Godi pana ꞌwavujihi ruarahunaꞌe ꞌajiha navu. ꞌEnakaivo ike vuꞌa kwinu parunamiꞌamana. Ehu nuna na oja mihiꞌine Natohwi jihuni ꞌunamijaho juara mapoka mapoka (1,000) paꞌarejujaho areri vea kwinuna ꞌee vea kwino paꞌarenujaho areri vea mapoka mapoka (1,000) paꞌareju jaꞌina. Natohwijaho iraka kaꞌene Hura nahama ꞌwaramajaho marako pavenu rone ea ꞌahoꞌa ijaꞌinaꞌe vwihaju kaivo Hu ja masuani ꞌajiha avanu. Ijihuni maijaho nú eha sisea apehunijaho Hu ura parenu vo ea mahoꞌo ꞌunama taꞌarohe rohunaꞌe ura renu.
Mweꞌa ꞌEe Akúpa Maiuꞌina
10 ꞌEnakaivo Natohwi jihuni veijara roꞌamajaho areri nesa apejiꞌinapo roujaꞌinaꞌe rohuna. ꞌEꞌeje akúpa ꞌee ichutoi uneunecha kaꞌene navujija ira niꞌimaꞌuraꞌe reꞌeje uhoa rene hirama arihe paꞌarehuna ꞌee mweꞌa ikino uneunecha kaꞌene navujija mahoꞌo re parahuna. 11 Ijihuni maijaho uneunecha ikija mahoꞌo hirama arihe paꞌarehuni jihunaꞌe iviꞌa ja ea icháꞌina rehunaꞌe vwihajo? Joni kara ariramaaꞌe rene ꞌee Godi ura renu jaꞌinaꞌe hiꞌavara. 12 Ja Godira marako roꞌamajina roju. ꞌEnakaivo ijí vea kajaho ichutoi kahija veni reje paꞌarehuna ꞌee uneunecha kaꞌene ichutoi navujija vena uhoi niꞌimaꞌuri renaꞌe hirama arihe paꞌarehuna. 13 ꞌEnakaivo Hura nahama ꞌwarumajaho nú akúpa ꞌee mweꞌa maiuꞌina kaꞌene ꞌunama ariraru nahuniji kaꞌirono niriꞌi ꞌajaha hiju. 14 ꞌEnajihunaꞌe ehu nuna kaꞌene na ja oja mihiꞌine ja ura ijihi kihuna ura renaukúne harura vene hijakame Hura roe ja kiꞌamajaho ja mataume hine ꞌee sisea paꞌana ꞌee ea ja sisea panamahiꞌina kiꞌamana. 15 ꞌEnakaivo vwihaꞌavara. Natohwijara masuani vivinui ꞌajúha vaꞌujihuni maijaho emaa niꞌajihe maraniꞌamarono avanu areri núni vwea Poru kaꞌene nú oja mahiꞌiniji vwiha mamaa kaꞌene vajahume joni asura vene ꞌwaramajaho vwihaꞌavara. 16 ꞌEne hu ꞌuꞌo huni asura vajijija ikija vene ꞌwarumana. ꞌEnakaivo ijí hena kahuna ꞌahoꞌa kisina ꞌee ea kaꞌene panajahume hejara ꞌee pakirasahe namiꞌi kaivo vuꞌa ꞌeke arohiꞌinijija pura Godoni ira ꞌahoꞌa ꞌeke taꞌarohe ani ani puni ura ijino ruarahe ꞌwaravujara rejuꞌe pu eha sisea apehuna. 17 Ehu nune ijihunaꞌe ja nimarako hejajaꞌinaꞌe ojono ꞌajoꞌaraꞌavara. ꞌEjakame ea kaꞌene majikarino hijujipo ꞌunama siseijino ja pairisame vaꞌe joni ruha mamaa kaꞌene jara kirasahe hijujaho paꞌariꞌavara. 18 ꞌEnakaivo núni Natohwa ꞌee Niꞌajúhiꞌina Jesu Keriso oni maiji vwihaniꞌina ꞌee henaka vajijino emareꞌavara. ꞌEne iviamaakino rene vaꞌe majama aneja púsa paꞌana ꞌee pinana maijaho Huna. Ameni.