11
Ea Noꞌo Nii Kivajina
1 ꞌEne hu na mina vejuri pijuha mihe ijá ꞌwima Vaꞌe Godoni Temiporua ꞌee swasa vejuri ꞌaijua mina vene ꞌee ea kaꞌene ijino vaji Godi oja mahujaho taꞌamana.
2 Temiporu huni maꞌahijaho pamina vehuna. Ijihuni maijaho ijí maꞌaha kajaho Jenitaru mihana. ꞌEjume pu ara natohwa akuaviꞌina ꞌaha kajino masapa mapoka mapoka (42) namina ohuna.
3 ꞌEjakame Nara Nuni vuꞌa ꞌwaraviꞌina noꞌoheꞌi ateha tatari saviꞌina irechamiakame pura Nuni vuꞌa naꞌia mapoka mapoka (1,260) ꞌwarahuna ꞌwimana.
4 ꞌEjiꞌi ea kajija icha noꞌoheꞌi kaꞌene Arivi ꞌwavujine ꞌee naheha noꞌoheꞌi kaꞌene mweꞌa kehuni Natohwi jihuni unaꞌi namijujina.
5 ꞌEne ea ꞌahopo pu siseꞌi ꞌahiꞌi veꞌavajaho puni ira vaji veni useme puni naka kajijahija swirasaha parahuna. Ei pini ꞌunama nikwisuꞌina kajino siseꞌi ꞌahiꞌi veꞌamajaho hu ꞌanaa kwahuna.
6 Vea kaꞌene pu Godoni vuꞌa ꞌwaravuri veijaho harura kaꞌene akúpa kuve neha papihunijaho pu nunaꞌi navu. ꞌEne puni harura kajaho areri toa veje ꞌaa rehuna. ꞌEe mweꞌakaho atama sisesa ani aniꞌina areri veje rehuna.
7 Vea kaꞌene pu puni vuꞌa ꞌwarava paꞌareꞌavajaho hanuhijara maꞌoa kaꞌene tiha paꞌanijino roꞌeꞌune pu puꞌúmo ꞌarahe hura pu ꞌanie kwamasahuna.
8 ꞌEne puni hahijaho ijí ara niꞌimaꞌura kajihuni maꞌaha riri nahuna. Ara natohwa kaji hemahareꞌe ꞌwavujaho Satami ꞌee Ijipiti ꞌwavujino puni Natohwa ꞌuꞌo ꞌanaume kwamana.
9 Ea kaꞌene ea aniꞌina kachiꞌina ira aniꞌina ꞌee kwaa kwaa puni haha kaꞌene kwamasahiꞌinijija kiꞌeje naꞌia noꞌopisu paꞌareje ꞌee puni hahijaho tanuvaraꞌomo pakwaꞌananamihuna.
10 Vea kaꞌene poropeti noꞌoheꞌi kwamasaꞌavajaho ea kaꞌene iki mweꞌi hiju jihipuni hia ruarahia jihunaꞌe pu temarasahe mariꞌume ꞌee swara vajúsarahuna.
11 ꞌEjume vea noꞌopisu paꞌareꞌeme ura ohoa Godinaꞌi rene puni vaji roume pu ꞌurine namijara. ꞌEꞌeme ea kaꞌene pu kivajija nihoꞌo tea junamana.
12 ꞌEjume pu heꞌeme kahi akúpa ꞌahi ira natohwijara ijá ꞌiama Iki ajima roaha! ꞌiamana. ꞌEjume pu kahi akúpa ꞌahi ꞌimiti vaji vaꞌume puni naka pu kivara.
13 ꞌEjume ijí vea nikwisuꞌina vaja kajino mwevarivura niꞌimaꞌura roana. Ara natohwa pwinanaꞌa tirausahume ꞌee ea mapoka mapoka (7,000) mwevarivura kajara ꞌaniume kwamasahara. ꞌEꞌeme ea kaꞌene maiꞌo hijajija tea junavume akúpi jihuni Godiji taꞌarohara.
14 Eha sisea noꞌoheꞌi paraju kaivo heha! Eha sisea noꞌopisu ijaho maiꞌo marako rohuna.
Aja Iropu Noꞌoji Rasaꞌeme Kerisora Ea ꞌAjoahuniji Kavuta
15 ꞌEꞌeme Godoni ꞌona ojiꞌina kaꞌene iropu noꞌo ijara tauja hwasiꞌeme ira mapoka kahi akúpa ꞌahi ijá ꞌwava Mweꞌa kehuni ꞌajohiꞌini jihuni tinijaho núni Natohwa ꞌee Huni Kerisoꞌo rene mweꞌakaho majama ꞌajohuna ꞌwavara.
16 ꞌEjume eruta mapoka (24) kaꞌene puni toronu ꞌahi Godoni unaꞌi hijajihija mweꞌi arihi Godi oja mahiꞌi ijá ꞌwava
17 Oo Godi nihoꞌo harusimaꞌure A nitama hine ꞌee iviamaa hinunaꞌomo nú A teimani ꞌwavu. Ijihuni maijaho A Oni harura natohwijara rejuꞌe A mweꞌakaho aneja vene ꞌajoahu.
18 Ea kaꞌene ikino mweꞌi hijujija Onunaꞌi senavara kaivo iviamaa vu Oni senijara roana. Vea kaꞌene kwamasahiꞌiniji ꞌotua vetihuna roume ꞌee vea kaꞌene Oni kaukara vejiꞌina poropetia Oni ehija ꞌee ea maꞌuꞌumaa ꞌee ea mamaꞌina kaꞌene Oni hura vejiꞌini jihipuni eha mamaa vajihuna ꞌuꞌo roana. ꞌEne ea kaꞌene mweꞌake vejuꞌe siserana jihunaꞌe pura tirahuni vei roana ꞌwavara.
19 ꞌEꞌeme Godoni Temiporu kaꞌene akúpi ꞌahi namujaho jaraꞌeme Huni nimaa vetiꞌaravuri pukisijaho samaahiravume kahuna renana. ꞌEne vea piꞌivume akúpa natohwa ꞌumene mwevarivura roe ꞌee puura niꞌina hiramana.