33
ሙሴ ዒስራዔኤሌ ዓሶ ፃጶ ቢያ ዓንጄሢ
1 ሙሴ ሃይቃንዳሢኮ ቤርታ ዒስራዔኤሌ ዴሮም ሃጊ ማዓንዳ ባኮ ኬኤዚ ሂዚ ጌይ ዓንጄኔ፦
2 «ናንጊና ናንጋ ጎዳ ሲና ዹካፓ ሙኬኔ፤
ዔዶኦሜይዳፓ ዓቢጉዲ ፆርቄኔ፤
ፓኣራኣኔ ዹኮይዳኣ ፖዔኔ፤
ሚርጌ ዺቢ ኪኢታንቻ ዒዛና ዎላ ዓኣኔ፤
ዒዛኮ ሚዛቆ ዛላ ዔኤታ ታሚ ዓኣኔ።
3 ናንጊና ናንጋ ጎዳ ፔኤኮ ዴሮ ጎኔ ናሽካኔ፤
ዒዛም ዱማዼ ዴሮዋ ዒ ካፓኔ፤
ዬያሮ ዒዛኮ ቶኮ ዴማ ጉምዓቲ ኑ ዚጋንዳኔ፤
ዎጎ ዒዛሲ ኑ ካፓንዳኔ፤
4 ዒስራዔኤሌ ዴሮም ዔያቶሮ ማሂ ዒንጊንቴ
ሙሴ ኑም ኬኤዜ ቦንቺንቴያ ማዔ ዎጎ ኑ ካፓንዳኔ።
5 ዒስራዔኤሌ ዓሶ ፃጶና
ዴሮኮ ሱኡጎና ቡኩንቴ ዎዶና
ናንጊና ናንጋ ጎዳ ዒስራዔኤሌይዳ ካኣታዼኔ።»
6 ሙሴ ሃሣ ሮኦቤኤሌ ማኣሮ ዓሶ ዛሎ
«ፓይዳ ዔያቶኮ ዻካ ማዔቴያ
ናንጊና ናንጋ ጎዳሢዮ! ሮኦቤኤሌ ዴራ ናናንጎንጎ፤ ባይቆፓ።»
7 ሃሣ ዒዚ ዪሁዳ ማኣሮ ዓሶ ዛሎ
«ናንጊና ናንጋ ጎዳሢዮ! ኔ ባንሢ ዔያታ ዒላታ ዒላቶ ዋይዜ፤
ሃንጎ ፃጶ ዓሶና ዎላ ፔቱሞ ዓኣያ ዔያቶ ማሄ፤
ዶዲ ዎልቄ ዔያቶም ዒንጌ፤
ዔያታ ፔ ሞርኮና ዖልታ ዎዶና ዔያቶ ማኣዴ።»
8 ዒዚ ሃሣ ሌዊ ማኣሮ ዓሶ ዛሎ
«ናንጊና ናንጋ ጎዳሢዮ! ኔ ማሊፆ ዱማሲ ዔርዛ
ኔኤም ዱማዼ ባኮንሢና
ማሳሄና ሜሪባ ዋኣፆ ዓጮናይዳ
ዔያቶና ማርሚ ዔያቶኮ ጎኑሞ ኔ ዛጌ
ኔኤም ማዻ ሌዊ ዓሶም ማሊፆ ኔኤኮ ፔጋሲ ዻዌ።
9 ዔያታ ኔ ጋቴ ጌዒ ሾዔ ዓሶ ዋሌኔ፤
ፔ ዒጊኖይዳፓኣ ዱማዼኔ፤
ናኣቶዋ ፔኤኮ ዔያታ ሃሼኔ፤
ኔ ኬኤዛ ባኮዋ ዔያታ ቦንቼኔ፤
ኔ ዔያቶና ዎላ ጫኣቄ ጫኣቁሞዋ ዔያታ ካፔኔ፤
10 ኔኤኮ ዳምቦ ያይቆኦቤም
ዎጎዋ ኔኤኮ ዒስራዔኤሌ ዓሶ ዔርዛኔ፤
ኔ ቤርታ ዔያታ ዑንጆ ጩቢሻኔ፤
ኔኤም ሚቺ ዒንጎ ባኮ ዒንጎ ቤዞይዳ
ሚቺ ዒንጎ ባኮ ዒንጋኔ።
11 ናንጊና ናንጋ ጎዳሢዮ! ዔያቶኮ ዓኣ ባኮ ዓንጄ፤
ዔያታ ማዻ ማዾዋ ኮሺ ማሂ ዔኬ፤
ዔያቶ ሞርኮኮ ዎልቆ ላቢሴ፤
ዔያቶ ዒፃ ዓሳ ላሚ ዔቁዋጉዲ ዎልቄ ባይዜ!»
12 ሃሣ ሙሴ ቢኢኒያሜ ማኣሮ ዓሶ ዛሎ
«ናንጊና ናንጋ ጎዳ ዔያቶ ናሽካ ዓሳ ሂርጋ ባኣያ ናንጎንጎ፤
ዼኤፖ ፆኦዛሢ ሮኦሮ ቢያ ዔያቶ ካፓኔ።
ዒንዳ ፔኤኮ ናዖ ኮንቃሢጉዲ ዒዚ ኮንቄም ዔያታ ናንጋንዳኔ።»
13 ዒዚ ዮሴፔ ማኣሮ ዓሶ ዛሎ፦
«ናንጊና ናንጋ ጎዳ ሎ ጫሪንጫፓ ዒሮ ዋርቂሲ
ሉ ዴማ ዓኣ ዋኣፆዋ ዓልቂሲ
ሳዖ ዔያቶኮ ዓንጆንጎ።
14 ዬያጉዲ ዓባ ቃራ ዓቤም ካፃ ሃኣኮ
ሌዖና ሌዖና ሳዓ ዔያቶኮ ሚርጌ ካሣያ ማዖንጎ፤
15 ዔያቶኮ ሚናፓ ዓኣ ዹኮንታ ጌሜሮንታ
ሙዎ ባኣዚ ቃራ ቃራ ካፂሳያ ማዖንጎ፤
16 ዓጫ ዔያቶኮ ኮሺ ማዔ ባኣዚና ቢያ ኩሜያ ማዖንጎ፤
ካዮ ባኣካ ዔኤታ ታሞና ጴዼ ፆኦዛሢ ዓንጃ ዓንጆና
ዒዛ ሳዓ ዓንጂንቴያ ማዖንጎ፤
ዒዚ ፔኤኮ ጌርሲንሢ ባኣካ ሱኡጌ ማዖንጎ።
17 ዮሴፔ ዚያ ጌማይጉዲ ዶዲኬ፤
ካኣራ ዒዛኮ ሜኤኒ ካኣሪጉዲ ዶዳያኬ፤
ዬያና ዒ ዴሮ ዹዓንዳኔ፤
ዓጮኮ ጋፒንፆ ሄላንዳኣና ዒ ዳውሳንዳኔ፤
ዔፕሬኤሜኮ ታጶ ላምዖ ሺዮንታ
ሚናኣሴኮ ሺዮንታ ያኣዼ ማዓንዳኔ።»
18 ሃሣ ሙሴ ዛብሎኦኔና ዪሳኮኦሬ ማኣሮ ዛሎ፦
«ዛብሎኦኔ ዜርፃ ባዞይዳ ኮርማ ኮርሞና
ዖርጎጪ ዎዛዾንጎ፤
ዪሳኮኦሬያ ማኣራ ዓኣዖ ዎዛዻያ ማዖንጎ።
19 ዔያታ ሃንጎ ዴሮ ዹኮ ዔኤሊ ኬሲ
ፒዜ ማዔያ፥ ፆኦሲም ዒንጎ ባኮ ዒኢካ ሺኢሻንዳኔ፤
ዔያቶ ዖርጎጪሳንዳ ቆሎ ዔያታ ባዞና
ባዞ ዓጫ ዓኣ ማኣሻሎናይዳፓ ዴንቃንዳኔ።»
20 ዒዚ ሃሣ ጋኣዴ ማኣሮ ዓሶ ዛሎ፦
«ጋኣዴ ዓጮ ዳልጊሼ፥ ናንጊና ናንጋ ጎዳሢ ጋላቲንቶንጎ!
ጋኣዴ ዓሳ ሞርኮኮ ኩጮ ሜንሣኒና
ባሊቶዋ ጳርቂ ዑራኒ
ዞቢጉዲ ካታያ ማዓንዳኔ።
21 ዒዚ ሱኡጌ ማዒ ዶኦሪንቴሢሮ
ፔኤም ቃራ ማዔ ሳዖ ዶኦሪ ዔኬኔ፤
ዴሮኮ ሱኡጋ ቡኬ ዎዶና
ናንጊና ናንጋ ጎዳኮ ማሊፆንታ ዳምቦንታ
ዒስራዔኤሌ ዓሶም ማዺ ዒ ኩንሤኔ።»
22 ሃሣ ዒ ዳኣኔ ማኣሮ ዓሶ ዛሎ፦
«ዳኣኔ ሃጊ ዔቃ ዓዴ ዞቢጉዲኬ፤
ዒዚ ባኣሳኣኔይዳፓ ኮኦሚ ኬስካያ ማዓንዳኔ።»
23 ዒዚ ሃሣ ኒፕታኣሌኤሜ ማኣሮ ዓሶ ዛሎ፦
«ናንጊና ናንጋ ጎዳ ኒፕታኣሌኤሜ ኮሺ ናሽካያኬ፤
ፆኦሲ ሚርጌና ዔያቶ ዓንጄያኬ፤
ዔያቶኮ ዓጫ ጌሊላ ባዛፓ ዴንዲ
ዾኦሎ ዛሎ ዓጮ ሄላያ ማዓንዳኔ።»
24 ሃሣ ዒ ዓሴኤሬ ማኣሮ ዓሶ ዛሎ፦
«ዓሴኤሬ ማኣራ ሃንጎ ማኣሮይዳፓ ባሼ ዓንጂንቴያኬ፤
ዒዛ ጌርሲንሢ ናሽካያ ማዖንጎ፤
ሳዓ ዒዛኮ ዛይቶ ሪሚቶ ሚፆ
ሚርጌ ባቃልሳያ ማዖንጎ።
25 ካታሞ ጌሎ ካራ ዒዛኮ
ዓንጊና ዎዺንቲ ካፒንታያ ማዖንጎ፤
ዒ ናንጋ ዎዶ ቢያይዳ ዎልቄ ዓኣያ ማዖንጎ።»
26 «ዒስራዔኤሌ ዓሲዮቴ!
ዼኤፒ ዒጊቻ ቦንቾና ጫሪንጮ ቲቂ ዴንዳያ
ዒንሢ ማኣዳኒ ሻኣሮ ዑፃ ዴዒ ሙካ
ናንጊና ናንጋ ጎዳ ማዔ ኑ ፆኦዛሢጉዴያ
ዖኦኒያ ባኣሴ።
27 ናንጊና ናንጋ ጎዳ ቢያ ዎዴ ዒንሢኮ ዋርዲዮ ሹጫሢኬ፤
ናንጊና ናንጋ ዎልቃ ዒዛኮ ዒንሢ ማኣዳንዳኔ፤
ሞርኮ ዒንሢኮ ቤርታፓ ዒ ዳውሳንዳኔ፤
ዒንሢ ዔያቶ ዎዺ ባይዛንዳጉዲ ዒ ማሃንዳኔ።
28 ዬያሮ ያይቆኦቤ ዜርፃ
ጫሪንጫፓ ዖልኬ ፆዻያ
ሃኣኮና ዎይኖ ዑዦና ኩሜ ዓጬሎይዳ
ፔ ሼምፓሢኮ ሂርጉዋዖ ኮሺ ናንጋንዳኔ።
29 ዒስራዔኤሌ ዓሲዮቴ! ዒንሢ ዎዚ ባሊቲናዳይ!
ናንጊና ናንጋ ጎዳ ዓውሴ ዴሬ ዒንሢጉዴያ
ፔቴታዖ ባኣሴ፤
ናንጊና ናንጋ ጎዳ ፔ ቶኦኪና ዒንሢኮ ጊቲማሢ፤
ሃሣ ዖሎ ዒንሢ ዖሊ ባሻ ጬንቾ ዓፓራሢኬ፤
ዒንሢኮ ሞርካ ዒንሢ ሺኢቂ ሺኢቂ
ዒንሢ ኮይላ ሙካዛ፥
ጊኢሮ ዒንሢ ዔያቶኮ ሄርቂ ሜንሣንዳኔ» ጌዔኔ።