26
ዒዮቤ
1 ዬካፓ ዒዮቤ፦
2 «ዬያ ኔኤኒ ጌስቲፆና
ላቤሢ ማኣዴያ ኔኤም ማላ?
ኩጫ ላቤሢ ዶዲሼጉዲ ኔኤም ጋዓ?
3 ዔራታ ፓጬሢም ዓይጎ ዞሮ ኔ ዞሬይ
ዓይጎ ባኣዚ ኔ ዒዛ ዔርዜይ!
4 ዓካሪ ሃያ ኔ ጌስታንዳጉዲ ኔና ማኣዴሢ ዖናዳይ?
ኔና ማሊሲ ዔቂሴሢያ ዖ ዓያናዳይ?» ጌዔኔ።
[ቢልዳዴ]
5 «ሃይቄ ዓሶኮ ሼምፓሢ
ዼኤፖ ባዞኮ ዴማ ዓኣዖ
ሚርጌና ዒጊጪሢዳ ዓኣኔ።
6 ሃይቄ ዓሳ ናንጋ ዓጫ
ፆኦሲ ቤርታ ፔጋኣኬ፤
ዓይጎ ባኣዚያ ዬያ ዓኣቻኒ ዳንዳዑዋሴ።
7 ፆኦሲ ኬዶ ዛሎ ጫሪንጮ
ጉሮ ዢባሮይዳ ሂኢሤኔ፤
ዬያጉዲ ሃሣ ሳዖዋ ዢባራ ሱፄኔ።
8 ሻኣራ ዋኣሢ ዓርቃንዳጉዲ ፆኦሲ ማሄኔ፤
ዬይ ዋኣፃ ዴኤፂ ሻኣሮ ዳርዙዋሴ።
9 ዒዚ ዓጊኖኮ ፖዖ ሻኣሮና ዓኣቻኔ።
10 ፖዖና ዹሞና ዱማሳኒ
ዼኤፖ ባዞ ዋኣፆኮ ቤርቶይዳ
ጫሪንጮና ሳዖና ካኣማያ ማላ ቤዞዋ ዛጲ ማሂ ሂኢሤኔ።
11 ዒዚ ዔያቶ ጎራ ዎዶና
ጫሪንጮኮ ቱርቱራ ዲቃቲፆና ዓጊፃኔ።
12 ፔ ዎልቆና ባዞ ዒ ዚቲዳኔ፤
ፔኤኮ ዔራቶናኣ ሬዓቤ ጌይንታ
ዼኤፖ ቦዓሢ ዎዺ ባይዛኔ።
13 ፔኤኮ ዑኡዞና ዒ ጫሪንጮ ጌኤሻኔ፤
ፔ ኩጮና ዶርቢንታ ሾኦዣሢያ ጫርጋኔ።
14 ዬይ ቢያ ፆኦሲ ማዻ ባኮፓ ዻኮንሢኬ፤
ኑ ዋይዛሢ ዒዛኮ ካሽካሺፆ ሌሊኬ፤
ዒዛኮ ዎልቆ ጉጉንሢፆ ዖኦኒ ማሊ ጶቂሣኒ ዳንዳዓይ?» ጌይ ማሄኔ።