21
ዓይኑሞ ሱኡጋሢ ዓይሣ ጎይፆና ዓይናዺንታ ዳውቴ ዓይኑሞ
ባሼ ባሺሢሮ ጋላቲንቴ ጋላታ
1 ናንጊና ናንጋ ጎዳሢዮ!
ዎልቄ ኔ ዒዛም ዒንጌሢሮ ካኣቲ ዎዛዼኔ፤
ኔ ዒዛ ባሺሴሢሮዋ ሚርጌና ዒዚ ዎዛዻኔ።
2 ዒዛኮ ዒና ማሌ ባኮ ኔ ዒዛም ዒንጌኔ፤
ዒዚ ኔና ሺኢቄ ባኮዋ ኔ ዒዛ ላኣጊባኣሴ።
3 ሚርጌ ዓንጆ ኔ ዒዛም ዒንጊ ሾኦቺንሢ ዔኬኔ፤
ዒዛኮ ቶኦኮይዳ ጌኤሺ ዎርቄና ኮሺንቴ ቦንቾ ባኮ ኔ ዓጌኔ።
4 ናንጊ ዒዛም ኔኤኒ ዒንጋንዳጉዲ ዒዚ ኔና ሺኢቄኔ፤
ኔኤኒ ዒዛም ዖዶሲ ሌዔንታ
ጋፑዋ ናንጊያኣ ዒንጌኔ።
5 ኔ ዒዛ ባሺሴሢሮ ቦንቻ ዒዛኮ ዼኤፒ ማዔኔ፤
ቦንቾንታ ዼኤፑሞንታ ኔኤኒ ዒዛም ዒንጌኔ።
6 ናንጊና ጋፑዋ ዓንጆ ኔ ዒዛም ዒንጌኔ፤
ኔኤኒ ዒዛና ዎላ ማዒፆና ዒዛ ኔኤኒ ዎዛሳኔ።
7 ካኣታሢ ናንጊና ናንጋ ጎዳ ጉሙርቃኔ፤
ዼኤፖ ፆኦዛሢ ጋጋፑዋ ናሹሞና
ዒዛ ናሽኬሢሮ ዒዚ ዓጊፂንዱዋሴ።
8 ኔ ኩጫ ኔኤኮ ሞርኮ ቢያ
ኔኤኮ ሚዛቆ ኩጫኣ ኔና ዒፃዞንሢ ቢያ ዓርቃንዳኔ።
9 ፔጋዺ ኔኤኒ ጴዻ ዎዶና ናኣቦፓ ኬስካ
ታሚ ላኣፁሚጉዲ ኔ ዔያቶ ሚቻንዳኔ፤
ናንጊና ናንጋ ጎዳኮ ዻጎ ሼኤላኣ ዔያቶ ጋውላንዳኔ፤
ታማኣ ዔያቶ ሙዓንዳኔ።
10 ዜርፆ ኔኤኒ ዔያቶኮ ሳዖይዳፓ ባይዛንዳኔ፤
ሜሌ ዴሮ ባኣካፓ ዱማሲ ኔ ዔያቶ ዎዺ ኩርሳንዳኔ።
11 ኔኤም ፑርታ ማዻኒ ዔያታ ማሌያታቴያ
ጌኔ ማሊሢያኣ ማሊ ቱኬቴያ ዔያቶም ጊኢጋዓኬ።
12 ዔያታ ሙኬ ጎይፆና ማሂ ኔኤኒ ዔያቶ ጳሻንዳኔ፤
ኔኤኮ ሂኢዦናኣ ዔያቶ ኔ ዱካንዳኔ።
13 ናንጊና ናንጋ ጎዳሢዮ!
ኔኤኒ ኔ ዶዱሞና ዼግ ዼጊ ጌዔ፤
ዎልቆ ኔኤኮ ኑኡኒ ሄርሻኔ፥ ዓይናዺያ ኑ ዓይናዻኔ።