79
ዓሳኣፔ ዓይኑሞ
ዴሮኮ ኮሹሞ ዛላ ሺኢቂንቴ ሺኢጲሢ
1 ፆኦሲዮ! ሜሌ ዴራ ዴኖ ኔኤኮ ዓርቄኔ፤
ኔኤኮ ዱማዼ ጌኤዦ ማኣሮዋ ዔያታ ዒኢሴኔ፤
ዬሩሳላሜ ሻሂ ዔያታ ባይዜኔ።
2 ኔ ዓይሎኮ ሌዞ ጫሪንጮ ካፖም
ኔኤኮ ዱማዼዞንሢኮዋ ዓሽኮ ካዮ ቦዖም
ሙኡዚ ማሂ ዔያታ ዒንጌኔ።
3 ሱጉፆ ዔያቶኮ ዬሩሳላሜይዳ ዓዳ ዋኣሢጉዲ ዔያታ ላኣሌኔ፤
ዬያ ዓሶ ዱኡካ ዓሲያ ጴዺባኣሴ።
4 ኑኡኒ ኑ ዓሺኖም ሚኢቺ
ኑ ኮይላ ዓኣ ዓሶማኣ ዓማሊ ባኣዚ ማዔኔ።
5 ናንጊና ናንጋ ጎዳሢዮ! ሃይ ዓይዲ ሄላንዳኣናዳይ?
ኔኤኒ ዻጋዻሢ ናንጊና ጋፑዋያዳ?
ሜሌ ካኣሽኪንቱዋጉዲ ኮዓ ኔ ማሊፃ ታሚጉዲ ዔኤቴ ጎይሣ ናናንጋ?
6 ኔና ዔሩዋ ሜሌ ዴሮ ዑፃ
ሱንፆዋ ኔኤኮ ዔኤሉዋ ካኣቶ ዑፃ
ዱማ ዱማ ኔኤኮ ዎዻ ባኮ ዳኬ።
7 ዔያታ ያይቆኦቤ ሙዔኔ፤
ዔያቶኮ ናንጎ ቤዞዋ ዓሲ ናንጉዋ ዳውሌ ማሄኔ።
8 ኑ ዓዶንሢ ጎሞ ኑ ዑፃ ማሂፖ፤
ማኣሪፃ ኔኤኮ ዑኬና ኑ ባንሢ ሙኮንጎ፤
ኑኡኒ ዓኣሢያ ሜቶይዳኬ።
9 ኑና ዓውሳያ ማዔ ፆኦዛሢዮ!
ኔ ሱንፆ ቦንቾሮ ጌዒ ኑና ማኣዴ፤
ኔ ሱንፆሮ ጌዒያ ሄሊ ኑና ዓውሴ፤
ጎሞዋ ኑኡኮ ዓቶም ጌዔ።
10 ዴራ፦ «ፆኦዛሢ ዔያቶኮ ዎካዳዖ?» ዓይጎሮ ጋዓይ?
ኔኤም ማዻ ዓሶ ሱጉፆ ዛሎ ኮሞ ኮፄ፤
ኑ ዓኣፓ ዛጋንቴ ዬያ ማዼ።
11 ቱኪንቲ ዓኣ ዓሶኮ ሜቶ ዒላታ ኔ ቤርቶ ሄሎንጎ፤
ሃይቆንጎ ጌይ ዎጊንቴ ዓሶዋ ኔ ዎልቆና ዓውሴ።
12 ናንጊና ናንጋ ጎዳሢዮ! ኑ ዓሺና ኔና ሚኢጬ ሚኢጮ
ላንካይ ጳንጬ ማሂ ዔያቶ ኮንቂሴኔ።
13 ኑኡኒ ኔኤኮ ዴራ፥ ኔኤኒ ሄንቃ ማራታ
ናንጊና ጋላታ ኔኤም ሺኢሻኔ፤
ሾይንታፓ ሾይንቲ ሄላንዳኣና
ኔ ኑም ማዼ ባኮ ኑ ኬኤዛንዳኔ።