89
ዒዝራዔኤሌ ዓሢ ዔታኔኮ ካላሎ
ሜቶ ዎዴና ዓይናዺንቴ ዓይኑሞ
1 ናንጊና ናንጋ ጎዳኮ ሚጪንቶ ዛሎ ዓይናዼ ጎይሣ ታ ናንጋንዳኔ፤
ታ ዻንጎና ኔኤኮ ጉሙርቂንቲፆ ሙካ ሾይንቶም ታ ኬኤዛንዳኔ።
2 ሚጪንቲፃ ኔኤኮ ናንጊና ናንጋያ ማዔሢ
ጉሙርቂንቲፆዋ ጫሪንጫ ኔ ዶዲሻሢ ታ ኬኤዛንዳኔ።
3 ኔኤኒ ቤርታሲ፦ «ታኣኒ ዶኦሬ ዓሢና ዎላ ጫኣቄኔ፤
ታ ዓይላሢ ዳውቴም ታ ሳላዼኔ» ጌዔኔ።
4 ኔ ዒዛም ሳላዼ ሳላ፦
«ኔ ዜርፃፓ ናንጊና ካኣታዻንዳይ ኬስካንዳኔ፤
ካኣቱሞ ዖይቶ ታኣኒ ሾይንቲፓ ሾይንቲ ሄላንዳኣና ዶዲሻንዳኔ» ጋዓያኬ።
5 ናንጊና ናንጋ ጎዳሢዮ! ጫሪንጫ ኔኤኮ ዲቃሢ ሄርሺሳ ማዾ
ጉሙርቂንቲፆዋ ኔኤኮ ኔኤም ማዻ ኪኢታንቻ ፔ ቡኪንታ ሄርሾንጎ።
6 ናንጊና ናንጋ ጎዳና ጫሪንጮይዳ ዖኦኒ ቤቃይ?
ዒዛኮ ኪኢታንቾይዳፓ ዒዛጉዴይ ዖናዳይ?
7 ዒዛም ዱማዼ ኪኢታንቾ ባኣካ ሚርጌና ዒጊጪንታያ
ዒዛ ኮራ ዓኣዞንሢዳፓ ቢያ ዑሣ ዒ ዲቃሣያኬ።
8 ናንጊና ናንጋ ጎዳ ማዔ ዼኤፖ ፆኦዛሢዮ!
ኔጉዴያ ዖኦኒ ዓኣይ!
ናንጊና ናንጋ ጎዳሢዮ! ኔኤኒ ዼኤፒኬ፤
ኔኤኮ ጉሙርቂንቲፃኣ ኮሮ ማንጊ ዓኣኔ።
9 ኔኤኮ ቢታንቶና ባዛ ዓጊፃሢ ኔ ዔቂሳኔ፤
ባዞ ጉዳሢያ ኔኤኒ ዚቲዳኔ።
10 ሬዓባ ጌይንታ ቦዓሢ ጳርቂ ኔ ዎዼኔ፤
ኔኤኮ ዼኤፖ ዎልቆና ሞርኮ ኔኤኮ ኔ ላኣሌኔ።
11 ጫሪንጮንታ ሳዖንታ ኔኤሮኬ፤
ዓጮንታ ዒኢካ ዓኣ ባኮ ኔኤኒ ማዤኔ።
12 ኬዶ ባንፆንታ ዾኦሎ ባንፆዋ ማዤሢ ኔናኬ፤
ታቦኦሬንታ ሄርሞኔ ዹኮንታ ኔ ሱንፆና ዎዛዻኔ።
13 ቢታንታ ኔኤኮ ኮሺ ዶዲኬ፤
ኩጫኣ ኔኤሲ ዎልቄናኬ፤
ሚዛቆ ኩጫኣ ኔኤኮ ዼግ ዼጊ ጌዔያኬ።
14 ካኣቱሞ ዖይታ ኔኤኮ ፂሉሞና ፒዜ ዎጌና ዶዲሾናያኬ፤
ሚጪንቲፆንታ ጉሙርቂንቲፆንታ ኔኤኮ ቤርታ ቤርታ ዓኣዻኔ።
15 ናንጊና ናንጋ ጎዳሢዮ! ዎዛና ዒላሻዞንሢና
ኔኤኮ ፖዓ ናንጋዞንሢ ዓንጂንቴያኬ።
16 ሮኦሮ ጉቤ ኔ ሱንፆና ዔያታ ዎዛዻኔ፤
ኔ ፂሉሞናኣ ዔያታ ኮሺ ዎዛዻኔ።
17 ዔያቶ ዶዱሞኮ ቦንቻሢ ኔናኬ፤
ኔ ኮሹሞና ካኣሮ ኑኡኮ ኔኤኒ ዼግ ዼጊዴኔ።
18 ኑኡኮ ጊቲማሢ ናንጊና ናንጋ ጎዳሮኬ፤
ኑኡኮ ካኣቲያ ዒስራዔኤሌኮ ዱማዼ ፆኦዛሢሮኬ።
ፆኦሲ ዳውቴም ጫኣቄ ጫኣቁሞ
19 ኔኤኒ ፔጋሲ ዻዋ ባኮና
ሚና ኔ ናኣቶም ኔ ኬኤዛዖ ሂዚ ጌዔኔ፦
«ዖሎና ዔርቴሢ ታኣኒ ማኣዴኔ፤
ዴሮ ባኣካፓ ዶኦሪንቴሢ ታኣኒ ዼግ ዼጊዴኔ።
20 ታኣኮ ዓይላሢ ዳውቴ ታ ዴንቄኔ፤
ዱማዼ ዛይቶ ቲዦና ታ ዒዛ ቲሽኪ ዶኦሜኔ።
21 ታ ኩጫ ኬልቂ ዒዛ ዓርቃንዳኔ፤
ቃሳ ታኣኮ ዒዛ ዶዲሻንዳኔ።
22 ዒዛኮ ሞርካ ዒዛ ባሻዓኬ፤
ፑርቶ ማዻ ዓሳኣ ሄርቂ ዎይሣዓኬ።
23 ሞርኮ ዒዛኮ ታኣኒ ዒዛ ቤርታ ጋኣጫንዳኔ፤
ዒዛ ዒፃዞንሢ ታ ሺርኪ ባይዛንዳኔ።
24 ታኣኮ ጉሙርቂንቲፆንታ ሚጪንቲፃኣ ዒዛና ማዓንዳኔ፤
ታ ሱንፆና ካኣራ ዒዛኮ ዼግ ዼጊ ጋዓንዳኔ።
25 ዒዚ ዎይሣ ዓጮ ሜዲቴራኒያ ባዞ ሄላንዳኣና
ዒዛ ዓጮኮ ዛጶ ፄግሮሴና ዔፕራፂሴ ዎሮ ሄላንዳኣና
ታኣኒ ዳልጊሻንዳኔ።
26 ዒዚ ታና፦ ‹ኔ ታኣኮ ዓዶኬ፤
ኔ ታኣኮ ፆኦዛሢና ዻቂንቶ ላላሢናኬ› ጋዓንዳኔ።
27 ታኣኒ ዒዛ ታኣኮ ናኣዚ ቶይዲ ማሃንዳኔ፤
ዓጮ ካኣቶይዳፓ ዑሣ ዼጊ ዒ ጋዓንዳኔ።
28 ሚጪንቲፆ ታኣኮ ናንጊና ዒዛም ታ ማሃንዳኔ፤
ታ ዒዛና ጫኣቄ ጫኣቁማ ዶዲ ናንጋንዳኔ።
29 ዒዛኮ ዜርፆ ናንጊና ታኣኒ ናንጊሻንዳኔ፤
ካኣቱሞዋ ጫሪንጫ ናንጋማ ጎይፆ ታ ዶዲሻንዳኔ።»
30 «ጋዓንቴ ዜርፃ ዒዛኮ ታ ዎጎ ዑሣ ዓኣዼቴ
ታ ዳምቦና ዔያታ ናንጊባኣያታቴ፥
31 ታኣኒ ቱኬ ዳምቦ ዑሣ ዔያታ ኬስኬቴ
ታኣኮ ዓይሢፆዋ ካፒባኣቴ፥
32 ዔያቶኮ ጎሞሮ ታ ዔያቶ ኮኦሎና
ዻቢንቶሮዋ ታ ዔያቶ ዢራፓና ጳርቃንዳኔ።
33 ሂዴያታቴያ ሚጪንቲፆ ታኣኮ ታ ዒዛይዳፓ ሺኢሻዓኬ፤
ታ ጉሙርቂንቲፆዋ ታ ዒዛም ፓጪሳዓኬ።
34 ታ ዒዛና ጫኣቄ ጫኣቁሞ ሻሃዓኬ፤
ታ ዻንጋፓ ታ ኬሴ ባኮዋ ማሃዓኬ።»
35 «ፔቴና ታኣኮ ጌኤሹሞና ታ ጫኣቄኔ፤
ዳውቴም ታኣኒ ሉኡቃዓኬ።
36 ዒዛኮ ዜርፆ ናንጊና ታኣኒ ናንጊሻንዳኔ፤
ካኣቱማኣ ዒዛኮ ዓቢ ናንጋማጉዲ ታ ቤርታ ዶዲ ናንጋንዳኔ።
37 ጫሪንጮይዳ ጉሙርቂንታ ማርካ ማዒ ናንጋ ዓጊኒጉዲ
ዒዛኮ ካኣቱማ ናንጊና ዶዲ ዴዓያ ማዓንዳኔ።»
ካኣቲ ዳውቴ ባሺንቴሢሮ ሄሌ ዖዪሢ
38 ሃሢ ኔ ጋዓንቴ ዒዛ ቶኦቺ ሃሼኔ፤
ኔኤኒ ዶኦሚ ካታሤሢያ ሚርጌና ጎሬኔ።
39 ኔ ዓይላሢና ኔ ጫኣቄ ጫኣቁሞዋ ሻሄኔ፤
ቦንቾሮ ቶኦካ ዓጎ ባኮዋ ሲላላ ኔ ኬኤሬኔ።
40 ዒዛኮ ኬኤሎ ዲፆ ቢያ ኔ ሻሄኔ፤
ዋርዲዮ ቤዞዋ ዶይሲ ኔ ባይዜኔ።
41 ዒኢና ቱሮ ሊካ ዓኣዻሢያ ቢያ ዒዛ ቡሬኔ፤
ዒዛኮ ዓሺኖማኣ ዓማሊ ዒ ማዔኔ።
42 ዒዛ ሞርኮኮ ሚዛቆ ኩጮ ኔ ዼግ ዼጊዴኔ፤
ዒዛ ዒፃ ዓሶ ቢያ ኔ ዎዛሴኔ።
43 ዒዛ ጬንቾ ዓፓሮኮ ዓጪፆ ኔ ቱኒሴኔ፤
ዖሎ ዎዶና ኔ ዒዛ ማኣዲባኣሴ።
44 ዓሶ ዒዛኮ ዲቃሣ ዼኤፑሞ ኔ ባይዜኔ፤
ካኣቱሞ ዖይቶዋ ኔኤኒ ሳዓ ኬኤሬኔ።
45 ኔ ዒዛኮ ዼጋቶ ዎዶ ቃሚሤኔ፤
ቦርሲሲያ ኔ ዒዛ ዴይሤኔ።
ዻቂንታሮ ሺኢቂንቴ ሺኢጲሢ
46 ናንጊና ናንጋ ጎዳሢዮ!
ኔ ኑም ፔጋዹዋዖ ናንጊና ናናንጋኒዳ?
ዻጋ ኔኤኮ ታሚጉዲ ዔኤታሢ ዓይዲ ሄላንዳኣናዳይ?
47 ታኣኮ ናንጎ ሌዓ ዎዚ ቃሚሢታቴያ ሂንዳ ማሌ፤
ዓሲ ኔ ማዤሢ ዔኤቢ ጉሪ ባኣዚምዳ?
48 ሃይቢ ሃይቁዋዖ ናንጋንዳ ዓሲ ዓኣ?
ፔ ቶኦኮ ዱኡፒፓ ዓውሳንዳይ ዖናዳይ?
49 ናንጊና ናንጋ ጎዳሢዮ!
ዳውቴም ኔኤኮ ጉሙርቂንቲፆና ኔ ጫኣቄሢ
ኔኤኮ ሚናኣ ሚጪንቲፃ ዎካ ዓኣይ?
50 ጎዳሢዮ!
ዓይላሢ ኔኤኮ ዎማይዲ ቶኦቺንቴቴያ
ሚርጌ ዓሶኮ ቦሂፆ ዒዚ ዔኤዼሢያ ማሌ።
51 ናንጊና ናንጋ ጎዳሢዮ!
ሞርካ ኔኤኮ ዒዛ ሚኢጬሢ
ኔኤኒ ካኣታሤ ዓሢኮ ሄፆ ዔያታ ቶኦቼሢ
ሂንዳ ማሌ።
52 ናንጊና ናንጋ ጎዳ ጋላቲንቴ ጎይሣ ዴዖም!
ዓኣሜን! ዓኣሜን!