98
ዓይኑሞ
ፆኦሲ ዓጮ ዎይሣያ ማዔሢ
1 ናንጊና ናንጋ ጎዳም ዓኪ ዓይኑሞ ሺኢሹዋቴ፤
ፆኦሲ ፔ ዎልቄና ማዺንታ ዓኪ ባኣዚ ማዼኔ፤
ዒዛኮ ሚዛቆ ኩጮንታ ዱማዼ ቃሳኣ
ዻቂንታ ዔኪ ሙኬኔ።
2 ናንጊና ናንጋ ጎዳ ዻቂሺፆ ፔኤሲ ዔርዜኔ፤
ፂሉሞ ፔኤሲ ዴሮ ቤርታ ፔጋሴኔ።
3 ዒስራዔኤሌ ዓሶም ፔኤኮ ሚጪንቲፆ
ጉሙርቂንታያ ማዒፆዋ ማሌኔ፤
ዓጫ ማዓ ካሮና ቢያ ኑ ፆኦዛሢኮ ዓውሲፆ ዛጌኔ።
4 ሳዓ ናንጋ ዴራ ቢያ ናንጊና ናንጋ ጎዳም ዒላሹዋቴ!
ሄርሺሢያ ዒዛም ሚርጊሹዋቴ፥ ዎዛና ዓይናዺ ጋላቱዋቴ።
5 ናንጊና ናንጋ ጎዳም
ሚርጌ ሻዦ ዴንሢ ዋርቆ ጎኦሎና ዓይናዹዋቴ፤
ዓይኑሞ ዓንጋሞና ዑኡሲ ኬሲ ዒዛም ዓይናዹዋቴ።
6 ዲንኮና ዛዬ ዑኡሲና
ናንጊና ናንጋ ጎዳ ማዔ ካኣታሢ ቤርታ ዒላሹዋቴ።
7 ባዞንታ ዬያይዳ ዓኣ ባካ ቢያ
ሳዖንታ ዒኢካ ናንጋ ባካ ቢያ
ዑኡዞ ዋይዚሱዋቴ!
8 ዎራ ኩጮ ፔኤኮ ባዖንጎ፤
ዹካኣ ዎሊ ዑፃ ዓይናዾንጎ።
9 ዬያታ ፆኦዛሢ ቤርታ ዓይናዾንጎ፤
ዒዚ ሳዖይዳ ዎጋኒ ሙካንዳኔ፤
ዓጮ ዑፃ ዒዚ ፂሉሞና
ዴሮ ዑፃኣ ጎኑሞና ዎጋንዳኔ።