12
ቢኢኒያሜ ፃጳፓ ዳውቴ ጊንፆ ሺሬ ዓሶ
1 ዳውቴ ቂሴ ናኣዚ ሳኣዖኦሌይዳፓ ዓኣሺንቲ ፂቅላጌይዳ ናንጋንቴ ጉሙርቂንታያና ዖልዚ ዛላ ዔራያና ማዔ ሚርጌ ፖኦሊሴ ዒዛና ዎላ ፔቴ ማዒ ዒዛ ጊንፆ ሺሬኔ።
2 ዔያታ ሳኣዖኦሌጉዲ ቢኢኒያሜ ፃጲኬ፤ ዔያታ ሚዛቆና ሻውሎ ኩጮናኣ ቢያ ሂኢሺ ዱካኒ፥ ሃሣ ዎራ ዎራኒ ዳንዳዓያኬ፤
3-7 ዬያታ ጊቢዓ ካታሞይዳ ሾይንቴ፥ ዒሼማዓ ናኣቶ ማዔ ዓሂዓዜሬና ዮዓሼናኮ ቢታንቶ ዴማ ዎርቃያኬ። ዬያ ፖሊሶኮ ሱንፃ ሃይካፓ ዴማ ዓኣ ጎይፆ ፓይዲንቴኔ፦
ዓዝማዌቴ ናኣቶ ዪዚዔሌና ፔሌፄና፥
ዓናቶቴ ካታሞ ዓሶንሢ ቤራካና ዒዩና፥
ዖሎና ዔርቴያታዖ ጊንፃፓ ሃይሢታሞ ዔርቴ ሱኡጎ ማዔዞንሢኮ ፔቴያ ማዔ፥ ጌባዖኦኔ ካታሞ ዓሢ ዩሽማዕያ፥
ጌዴራ ካታሞ ዓሶንሢ፦ ዪርሜያ፥ ያሂዝዔኤሌ፥ ዮሃናኔንታ ዮዛባዴና፥
ሃሪፔ ዓጫ ሾይንቴ፦ ዔልዑዛዬ፥ ያሪሞቴ፥ ቤዓልያ፥ ሼማሪንታ ሼጳፂያንታ፥
ቆሬ ቶኦኮ ማዔ፦ ዔልቃና፥ ዩሺያሁ፥ ዓዛርዔሌ፥ ዮዔዜሬንታ ያሼብዓሜንታ፥
ጌዶሬ ካታሞ ዓሶንሢ ዪሮሃሜ ናኣቶ፦ ዮዔላና ዜባድያና።
ጋኣዴ ፃጳፓ ዳውቴ ጊንፆ ሺሬ ዓሶ
8 ዳውቴ ዓሲ ናንጉዋ ዳውሎይዳ ዋርዲዮ ቤዛ ዓኣንቴ ጋኣዴ ፃጳፓ ሙኪ ዒዛኮ ዖሎ ዓሶ ባኣኮ ጌሌ፥ ዖሎና ዔርቴያ፤ ሃሣ ዖልዚያ ዖሊ ዔሬ ፖኦሊሶኮ ሱንፃ ሃካፓ ዴማ ዓኣዞንሢኬ፤ ዬያታ ጊቲማና ዎርሢና ዔኪ ዖሊሢና ዔርቴያኬ፤ ዔያታ ዞቢ ዒጊቻሢጉዲ ዒጊቻያ፥ ሩኡሩማኣ ጌሜሪዳ ናንጋ ሹኡጌ ጳሽካሢጉዲኬ፤
9-13 ዔያቶኮ ሱንፃ ዔያቶኮ ሱኡጋቶጉዴያ ጉዴያ ዎሊ ጊንፆ ፓይዲንቴኔ፦ ዔዜሬ፥ ዓብዲዩ፥ ዔሊዓቤ፥ ሚሽማና፥ ዔርሚያሴ፥ ዓታዬ፥ ዔሊዔኤሌ፥ ዮሃናኔ፥ ዔልዛባዴ፥ ዔርሚያሴንታ ማክባናዬንታኬ።
14 ጋኣዴ ፃጶ ማዔ ዬንሢ ዓሶይዳፓ ዛላ ዓሲ ሺዮ ፖኦሊሶ ዓይሣ ሱኡጋቶ ዓኣያና ፄኤቶ ፖኦሊሶ ዓይሣ ሱኡጋቶ ዓኣያኬ።
15 ፔቴ ኬሊ ቤርታሳ ዓጊና ፄፄኤራኣና ዮርዳኖሴ ዎራ ሱካፓ ሱኮ ሄሊ ኩሚ ዓኣንቴ ዎሮና ዔያታ ፒንቄኔ፤ ዎሮኮ ዓባ ኬስካ ዛሎና ጌላ ዛሎናይዳ ዓኣ ዶኦጮ ጊንፃ ናንጋ ዴሮዋ ዔያታ ዳውሴኔ።
ቢኢኒያሜና ዪሁዳ ፃጶናፓ ዳውቴ ጊንፆ ሺሬ ዓሶ
16 ፔቴና ዪሁዳና ቢኢኒያሜና ፃጳፓ ኬስኬ ዛላ ዓሲ ዳውቴ ዋርዲ ዴዒ ዓኣ ቤዞ ዴንዴኔ፤
17 ዳውቴ ዬኖ ዓሶ ጎይሣ ዔካኒ ኬስካዖ፦ «ዒንሢ ሃይካ ሙኬሢ ታና ማኣዳኒ ማዔቴ ቃራኬ፤ ዒንሢ ታ ዛላ ማዒ ታኣና ዎላ ዔቃያ ማዔቴ ታ ዒንሢ ዔካኒ ጊኢጌያኬ፤ ጋዓንቴ ታ ዻቤ ባኣዚ ባኣያ፥ ጌኤሺ ዓኣንቴ ታ ሞርኮም ዓኣሢ ዒንሢ ታና ዒንጋያ ማዔቴ ቤርታኣ ኑ ዓዶንሢ ፆኦዛሢ ዛጊ ዎጎንጎ!» ጌዔኔ።
18 ዬካፓ ፆኦሲኮ ዓያና ዖሎና ዔርቴ ሃይሢታሞ ዓሶኮ ሱኡጋሢ፥ ዓሜሲያሴ ዑፃ ኬዴም ዒዚ፦
«ዳውቴ! ኑኡኒ ኔኤሮኬ!
ዒሴዬ ናዓሦ ዳውቴ፥ ኑኡኒ ኔኤና ዎላኬ!
ኔኤና ኔና ማኣዳ ዓሶናም ኮሹሞ ማዖንጎ!
ፆኦሲ ኔኤና ዎላ ማዒ ኔና ማኣዳንዳኔ»
ጌዒ ዑኡዞ ፔኤሲ ዼጊዲ ዒላቴም፥ ዳውቴ ዔያቶ ዎዛና ዔኪ ፔ ፖኦሊሶኮ ሱኡጌ ማሄኔ።
ሚናኣሴ ፃጳፓ ዳውቴ ጊንፆ ሺሬ ዓሶ
19 ዳውቴ ፒሊስፄኤሜ ዓሶና ዎላ ፔቴ ማዒ ካኣቲ፥ ሳኣዖኦሌ ዖላኒ ዓኣዼ ዎዶና ሚናኣሴ ፃጳፓ ዛላ ፖኦሊሴ ዳውቴ ፖኦሊሶና ዎላ ፔቴ ማዓኒ ዴንዴኔ፤ ዒማና ፒሊስፄኤሜ ዓሶኮ ሱኡጋ ጋዓንቴ፦ «ዳውቴ ኑና ዒፂ ቤርታ ዒዛኮ ጎዳ፥ ሳኣዖኦሌ ባንሢ ሺሪ ኑና ኩርሳንዳኔ» ጌዒ ዒዛ ዒጊጬሢሮ ዎላ ጌስታዖ ዒዚ ቲግላጌ ማዒ ዴንዳንዳጉዲ ዳኬኔ፤
20 ዳውቴ ቲግላጌ ማዔስካፓ ሚናኣሴ ፃጳፓ ዒዛ ጊንፆ ሺሬ ፔቴ ፔቴ ፖኦሊሶኮ ሱንፃ ሃካፓ ዴማ ፓይዲንቴ ጎይፆኬ፦ ዓድናሄ፥ ዮዛባዴ፥ ዪዲዕዔኤሌ፥ ሚካዔኤሌ፥ ዮዛባዴ፥ ዔሊሁና ፂሌታዬናኬ፤ ዬንሢ ቢያ ሚናኣሴ ዓጮይዳ ዓኣዖ ሺዮ ዓሶኮ ሱኡጋቶ ዓኣያኬ።
21 ቢያሢ ዔርቴ ፖኦሊሴታሢሮ ዖሎ ዖላ ዓሶ ባኣካ ዖሎ ዖሊሳ ሱኡጎ ማዒ ዔያታ ማዼኔ፤ ዬካፓ ናንጊቤቃ ዒስራዔኤሌኮ ዖሎ ዖላ ዓሶ ጉቤኮ ሱኡጌ ማዔኔ።
22 ቢያ ኬሊ ዓሲ ሙኪ ሙኪ ዳውቴኮ ዖሎ ዓሶ ባኣኮ ጌላሢሮ ኔጉዋዖ ዳውቴኮ ዖሎ ዓሳ ዑሣ ዓኣዼ ዎልቃዺ ሚርጊ ሚርጊ ዓኣዼኔ።
ዳውቴኮ ዖሎ ዓሶ ሚርጉሞ
23-37 ቤርታ ናንጊና ናንጋ ጎዳ ዳውቴም ጫኣቄ ጎይፆና ሳኣዖኦሌ ካኣቱሞ ዳውቴ ባንሢ ማሃኒ ኬብሮኦኔ ሙኬ ዓሳ፦
ዪሁዳ ፃጳፓ፦ ጊቲማና ዖልዚ ዓንጋሞ ኮይሳሢጉዴያ ዓርቄ ላሆ ሺያና ሳሊ ፄኤታ ፖኦሊሴ፥
ሲሞኦኔ ፃጳፓ፦ ኮይሳሢጉዴያ ዔሬያ ላንካይ ሺያና ፔቴ ፄኤታ ፖኦሊሴ፥
ሌዊ ፃጳፓ፦ ዖይዶ ሺያና ላሆ ፄኤታ ዓሲ፤
ዓኣሮኔ ዜርፆ ማዔያ፥ ዮዳሄና ዎላ ዓኣ ዓሳ ሃይሦ ሺያና ላንካይ ፄኤታ ዓሲ፤
ዖሎና ዔርቴያ ማዔ ፃዶቄ ዒጊናፓ፦ ላማታሚ ላምዖ ዔርቴ ሱኡጌ፤
ሳኣዖኦሌኮ ዒጊናሢ ማዔ ቢኢኒያሜ ፃጳፓ፦ ሃይሦ ሺያ ዓሲ፤
ዬያ፥ ቢኢኒያሜ ዓሶኮ ባሼሢ ዴንዲ ዬማ ሄላንዳኣና ሳኣዖኦሌም ጉሙርቂንታያ ማዒ ዓኣ ጎይሣኬ።
ዔፕሬኤሜ ፃጳፓ፦ ላማታሚ ሺያና ሳሊ ፄኤታ ዓሲ ማዓዛ ቢያሢ ፔኤኮ ቶኦኮና ቶኦኮና ዖልዚና ዔርቴያኬ።
ዓባ ጌላ ዛሎና ዓኣ ሚናኣሴ ፃጳፓ፦ ታጶ ሳሊ ሺያ ዓሲ፤ ዳውቴ ካኣታሢፆኮ ዔያቶ ዱማሲ ዶኦሮናያኬ።
ዪሳኮኦሬ ፃጳፓ፦ ላምዖ ፄኤታ ዓሲ ሱኡጌ ማዓዛ፥ ዔያቶ ቢታንቶኮ ዴማ ዓኣ ዓሳ ጉቤሢ ዔያቶና ዎላኬ፤ ዬንሢ ሱኡጎንሢ ዒስራዔኤሌ ዓሳ ዓይጎ ማዻኒና ዓይዲ ማዻኒ ኮይሳቴያ ዔራ ዓሶኬ።
ዛብሎኦኔ ፃጳፓ፦ ጉሙርቂንታያ፥ ዓጪ ናሽካ ዓቲንቄ ዖልዚም ጊኢጌያ ማዔ ዓይጎ ዓንጋሞና ማዔቴያ ዖላኒ ዳንዳዓ ዶንጊታሚ ሺያ ፖኦሊሴ፤
ኒፕታኣሌኤሜ ፃጳፓ፦ ጊቲማና ዎርሢና ዓርቄያ ሃይሢታሚ ላንካይ ሺያ ፖኦሊሴ ማዓዛ፥ ፔቴ ሺያ ሱኡጌ ማዓ ዓሲና ዎላኬ።
ዳኣኔ ፃጳፓ፦ ላማታሚ ሳሊ ሺያና ላሆ ፄኤታ ዖልዚ ዔራ ፖኦሊሴ፤
ዓሴኤሬ ፃጳፓ፦ ዖይዲታሚ ሺያ ዖልዚም ጊኢጊንቴ ፖኦሊሴ፤
ዮርዳኖሴኮ ዓባ ኬስካ ዛሎና ዓኣ ሮኦቤኤሌ፥ ጋኣዴና ሚናኣሴና ፃጳፓ፦ ዓይጎ ዓንጋሞናታቴያ ዖላኒ ዳንዳዓ ፔቴ ፄኤታና ላማታሚ ሺያ ፖኦሊሴ ዓኣኔ።
38 ዬይ ዖሎም ጊኢጊንቴያ ማዔ ፖኦሊሳ ቢያ ዳውቴ ዒስራዔኤሌይዳ ካኣታሣኒ ጋፒንሢ ማሊሢ ጌሢ ኬብሮኦኔ ዴንዴኔ፤ ዓቴ ዒስራዔኤሌ ዓሳ ዬያ ማሊፆ ቃራኬ ጌይ ዔኬኔ፤
39 ዬያታ ቢያ ዔያቶኮ ዒጊና ዒጊና ዔያቶም ጊኢጊሼሢ ዎዛና ሙዒ ዑሽኪ ዑሽኪ ዳውቴና ዎላ ሃይሦ ኬሊ ፔኤቄኔ፤
40 ዓጮኮ ኬዶ ዛሎና ዓኣ ዪሳኮኦሬ፥ ዛብሎኦኔና ኒፕታኣሌኤሜ ፃጳፓኣ ዓቱዋዖ ሚርጌ ዓሲ ሃሬና ጋኣሎና ባቁሎና ጌማይና ሚርጌ ሙኡዚ፥ ዺኢሊ፥ ቤሌሴ ሚፆ ዓኣፓ፥ ቤሌሴ ሚፆኮ ዓኣፖ ዺንቆና ላጫሢ፥ ዎይኔፓ ኮሾና ዑዦንታ ሪሚቶ ዛይቶንታ ጫኣኒ ዔኪ ሙኬኔ፤ ዬያጉዲ ሃሣ ሹኪ ዔያታ ሙዓንዳ ሚርጌ ባይና ማራይና ዔኪ ሙኬኔ፤ ዬይ ቢያ ዔያቶኮ ዓጮይዳ ዓኣ ዴራ ዎዛዼ ዎዞ ዔርዛያኬ።