15
ጋፒንፆ ማዔ ባይዛ ባኮ ዔኪ ዓኣ ኪኢታንቾንሢ
1 ዬካፓ ሜሌ ዼኤፒ ሃሣ ዲቃሢ ሄርሺሳ ማላታ ጫሪንጫ ታ ዛጌኔ፤ ዬይያ፦ ፆኦሲ ዻጋ ዔያቶና ኩማያ ማዔ፥ ላንካይ ባይዛ ባኣዚ ዔኪ ዓኣ፥ ላንካይ ኪኢታንቾ ታ ዛጌኔ።
2 ዒማና ሃሣ ታሚ ሲኢሪንቴያ ሌማሌኤሼ ባዚ ማላያ ታ ዴንቄኔ፤ ዒኢካ ባዞ ዓጫ ቦዓሢና ቦዓሢኮ ማላቶና ሃሣ ዒዛ ሱንፆ ፓይዶ ዖሊ ባሼ ዓሳ ዔቂ ዓኣንቴ ታ ዴንቄኔ፤ ዔያታ ፆኦሲዳፓ ዒንጊንቴ ጎኦላ ዔኪ ዓኣኔ፤
3 ዔያታ ፆኦሲም ማዻ፥ ሙሴ ዓይኑሞና ማራዓሢናኮ ዓይኑሞ፦
«ቢያ ባኣዚ ዳንዳዓ ጎዳ ማዔ ፆኦዛሢዮ!
ማዻ ኔኤኮ ዼኤፒ ሃሣ ዲቃሢ ሄርሺሳያኬ፤
ሚርጌ ዴሮኮ ካኣታሢዮ!
ኔኤኮ ጎይፃ ፒዜ ሃሣ ጎኔኬ።
4 ጎዳሢዮ! ኔና ዒጊጩዋያ
ሃሣ ሱንፆዋ ኔኤኮ ቦንቹዋይ ዖናዳይ?
ኔኤኒ ሌሊ ዱማዼያኬ።
ኔኤኮ ፒዜ ማዻ ፔጋዺ ዔርቴሢሮ
ዺቦ ዴራ ቢያ ሙኪ ኔ ቤርታ ኔኤም ዚጋንዳኔ»
ጌዒ ጌዒ ዓይናዻኔ።
5 ዬካፓ ሃሣ ዓፒላና ማዢንቴ፥ ፆኦሲም ዱማዼ፥ ጌኤሺ ማኣሪ ጫሪንጫ ቡሊንቲ ዓኣንቴ ታ ዛጌኔ፤
6 ዒማና ላንካዎ ባይዛ ባኮንሢ ዔኪ ዓኣ፥ ላንካይ ኪኢታንቻ ጌኤዦ ማኣራፓ ኬስኬኔ፤ ዬያታ ዓኣፒዳ ዱካ ቦኦሬ ማኣዖ ማይንቲ ዓኣኔ፤ ሃሣ ዳዶይዳኣ ዎርቄና ኮሺንቴ ቃልሾ ቱኡቲ ዓኣኔ።
7 ዬኖና ዖይዶ ባኮንሢዳፓ ፔቴሢ ናንጊና ናንጋ ፆኦዛሢኮ ዻጋ ኩሚ ዓኣ፥ ዎርቆና ኮሺንቴ ላንካይ ዑሺ ዓንጊ ላንካዎ ኪኢታንቾንሢም ዒንጌኔ፤
8 ሃሣ ጌኤዦ ማኣራ ፆኦሲኮ ቦንቾና ዎልቆናይዳፓ ኬስካ ጩቦና ኩሜኔ፤ ላንካዎ ኪኢታንቾንሢኮ ላንካዎ ባይዛ ባኮንሢ ማዺንቲ ኩማንዳያ ሄላንዳኣና ዖኦኒያ ጌኤዦ ማኣሮ ጌላኒ ዳንዳዒባኣሴ።