2
Pol Kʉn, Nombuⱡa Rung Wu Kʉⱡ
1 Pana 14 omba puⱡnga, na aldpa Jerusalem kona ila wu Barnapas kʉn, Taitas raⱡ kunda tʉp mep yant ur.
2 Na pur ei, nambuⱡ emel, Got ndi, na peimp nimba ora ndurum. Ni kʉn, na ndi, Rʉnang Ik Kai ei, mbo wamp rʉⱡaip elpa mbʉ kʉn, nʉmp ngur ei mel, wu Nuim mbʉ kʉn epʉndi mou rormʉn ila nʉmp ngur. Unt kep, akup kep, na nga kongun et ei, muⱡ pemba, muna pei mba nda, nʉmp uⱡ ei mel it.
3 Na nga tʉpa rʉpʉndi wu Taitas, Grik wu itim ndam kep, kʉng kupti uⱡ ei nga tangga nʉk, mou rurmʉn ila ronduⱡ mundʉk ni nandʉtʉng.
4 Ni wote, wu mat ʉngʉnʉl mul kʉmp ralk, mou ambrung ila, kiyang nʉk ruk ok molk kʉn, Taitas kʉng kupti uⱡ ei tangga nʉtʉng. Wu kʉⱡ kʉndʉp wamp mel ralk, ya tʉn Kraist Jisas ndi, mi ik ila kan pilinga ndurum uⱡ ei nga, etʉp kʉnmin nʉk orung. Tʉn aldpa etʉk tʉk, mi ik ila kan ngangga muⱡmin nʉk orung.
5 Wu kʉⱡ ndi, Taitas kʉng kupti uⱡ ei, tangga nʉtʉng ei, tʉn ndi ik ei nga neing nimbun, kandʉp kont iti nʉtʉtmʉn. I itmin uⱡ ei ndi, enim Rʉnang Ik Kupa ei, pilik teing nimbun itmin.
6 Wote, wu mat nuim mul kʉmp rarmin mbʉ, na ndi, mbʉ tʉp mel wei randʉnt. Got ndi, wamp nga kʉng ekit orunga kʉni nakʉndrʉm. Wu nuim nimbʉ, na nga ik nʉmp ngur mbʉ nga ik ti, tʉk mendʉk kʉn, ik kont nga mat pendʉp namin ni nandʉtʉng ku.
7 Ei kelik molk, tʉk mendʉk pʉtʉng ei, Got ndi, Pita Jura wamp mbʉ kʉn, elim nga Rʉnang Ik Kai nangga nitim ei mel, na wamp rʉⱡaip elpa kʉⱡ kʉn, Rʉnang Ik Kai ei, nʉmp nguimp uⱡ ei pʉtʉng.
8 Got nga ronduⱡ ila Pita etpa, Jura wamp kʉⱡ nga nombuⱡa rung wu mundrum ei mel, na wamp rʉⱡaip elpa kʉⱡ nga nombuⱡa rung wu mundrum.
9 Jeims, Pita kʉn Jon na wu kʉⱡ, wu Nuim morung ei ndi, na Got ndi, kongun ronduⱡ ngurum ei, tʉk mendʉk kʉn, na kʉn Barnapas raⱡ, ok ki tʉtʉng. Wote tʉn pora, numan tenda puⱡnga, tʉl wamp rʉⱡaip elpa kʉⱡ kʉn, kongun tambuⱡa, en enim Jura wamp kʉⱡ kʉn, kongun itmin nʉtʉng.
10 Ik tenda ti, tʉn kʉn nʉk ngurung ei, wamp kurpa mbʉ nga tʉp rʉpʉndʉmʉn nʉtʉng. Ei na nga numan ila ronduⱡ mundʉp elimba, nʉmp pʉt uⱡ ei.
Pol Ndi Pita Andiyok Kona Ila Ik Ngurum
11 Pita Andiyok kona ila urum ni kʉn, na ndi, elim ⱡawa itim uⱡ ei nga pilip kʉn, keta ila kun nont ndup ik mura ngur.
12 Jeims nga wu kat tʉpa mundrum kʉⱡ, ya kona ila ok ruk ui nʉwi kʉn, Pita mbo wamp rʉⱡaip kʉⱡ kʉn, kup etpa rʉng nurum. Wote, Jeims nga wamp kʉⱡ orung ei kʉn, Pita kʉn kup etʉk morung wamp kʉⱡ wak rurum. Ei nambuⱡ emel, orung wamp kʉⱡ nga kat kʉng kupti uⱡ ei nga etmin. Mbo wamp mbʉ pora, iteing nʉk minal pʉtmin ei nga, Pita ndi, pilpa mundmong etpa, mbo wamp kʉⱡ wak rurum.
13 Ni kʉn, Jura wamp kat Pita nga ik kol ropa itim uⱡ ila kunda etʉng. Uⱡ etʉng ei ndi, Barnapas omba tilinga, wamp kʉⱡ kʉn omba kup itim.
14 Na ndi, kʉndʉr mel, rʉnang ik kai ei nga nombuⱡa mam kupa ei, wak roⱡmina kandʉp, wu kʉⱡ pora kandʉk moⱡina, Pita kundʉp nʉnt mel, “Nim Jura wu ei, wote mbo wamp kʉⱡ mel pek morʉn, Jura wamp etmin ei mel mon. Namba uⱡ etkʉn nim ndi, mbo wamp kʉⱡ etkʉn, Jura wamp rʉndʉn en?” nʉnt.
Mondpa Pili Uⱡ Ila Mint Got Ndi, Wamp Pora Etpa Tʉmba
15 Kupa, tʉn Jura wamp mendpʉⱡ kʉⱡ, wote mbo wamp uⱡ kit etmin mbʉ mel mon.
16 Tʉn pora pʉtmʉn ni, wamp ti, mi ik ila pilpa pep ropa, Got nga mong waⱡ ila, kun kai muⱡi nambrʉm mon. Wote, Jisas Kraist kʉn mondpa pili uⱡ ila, kun kai moⱡmba. Tʉn kunda ku, Jisas Kraist kʉn mondpa pili uⱡ ila, Got kʉn kun kai mormun ei, Kraist Jisas kʉn mondpa pili uⱡ ila etʉm. Wote, mi ik ila nʉtʉm ei mel mon. Mi ik pep rui uⱡ ila, wamp ti, Got nga mong waⱡ ila kun kai muⱡi nambʉⱡʉmba.
17 Wote, tʉn Kraist ndi, etpa tʉmba nimbun mondʉp pʉtmʉn. Ei kʉn, Jura wamp mbʉ nga mong waⱡ tʉn uⱡ ⱡawa ti etmin. Ei mbo wamp mbʉ, mi ik pep rui narʉrʉmʉn ei mel, tʉn i ku etmin. I elimina ndam, Kraist ei, uⱡ kit mbʉ nga paka rondrum ku nilimina. Ei ama mon!
18 Wote na ndi, mel ti rokʉtʉp mana tit ei, aldpa oⱡa tʉp rʉkimp int ndam, uⱡ ei ndi, ora ndupa, na mi ik ei rop puⱡa ror.
19 Mi ik ei ndi, na ropa kondpa pora ndurum. I itim uⱡ ei ndi, na akup Got nga nʉmp kont mbo mor.
20 Na kunda, Kraist kʉn nde peta ila rorung. Ei nga, akup na kont mor uⱡ ei, nanim muⱡi nambʉr mon. Kraist ei na nga rukʉr orunga moⱡnga mor. Akup ui ila, kʉng orunga kont mor uⱡ ei, na nga mondpa pili ila mendpʉⱡ mor. Na Got nga kangʉm kʉn mondʉp pilip et uⱡ ei, na numan ngumba. Wote, elim nga kʉng orunga, wak ropa na nga nimba kurum.
21 Got nga wamp poⱡ ti uⱡ ei, wak rui narʉnt. Mi ik mbʉ ndi, uⱡ kun kai mbʉ, etpa oⱡa tʉtʉm ndam, Kraist ei wei kai kandpa kurum.