JEIMS
KUIMP TEPA IK KɄⱠ
Ya Buk Ei Nga Puⱡ Ei:
Wamp mbʉ ndi, uⱡ ⱡawa etmʉn mbʉ, omba pena ila pemba. Wote Kraist nga uⱡ kun kai etʉm mbʉ, wamp mbʉ mbo endʉtmʉn.
Ya Buk Ei, Nam Ndi Rurum:
Wu Jeims, Jisas nga ʉngʉn wu ei ndi, Got nga rapa tenda ila wamp mbʉ nga rʉp wu, Jerusalem kona ila murum wu ei ndi, mon ei rurum.
Mon Ropa Nam Ngurum:
Kraist nga Jura mondpa pili wamp kʉⱡ kʉn, wote Jura wamp rʉⱡaip 12 kʉⱡ, rok monduⱡʉngina, mbuⱡ mbaⱡ nʉk, wamp elpa mbʉ kʉn, pek morung kona ila, mon ei, ropa ngurum.
Ui Nant Ila Rurung:
Unt Kraist metʉng ei kʉn, mbuldung orunga pana, 49 (AD) ila mon kʉⱡ rurum, Jerusalem Kaunsil nga ui nondpa, AD 50 itim ui ei kʉn, mon ei rurum.
Ik Ronduⱡ: Jeims 2:18
Wote, wamp ti ndi, nimba mel, “Nim mondkʉn pʉtʉn ei nga, wote na ndi, uⱡ kai mbʉ et,” nimba. Wote na ndi, punt rop, nʉmp mel, “Nim nga mondpa pili, ei kongun mat iti natʉtʉm ei nga, na tʉkʉn ora ndum. Ei nga, na mondʉp pilip ila kongun et uⱡ ei, nim tʉp ora nduimp,” nʉnt.
IK PENG KɄⱠ
Rump
1:1-1:8 - Jeims nga mon ti rurum ei
1:12-1:18 - Oⱡa tʉpa kʉni uⱡ ei nga ik
1:19-1:27 - Pilpʉn kun, etpʉn pep ruimin
2:1-2:13 - Wamp pora tʉpa ou ndui uⱡ
2:14-2:26 - Mondpa pilpa iti uⱡ
3:1-1:12 - Tʉn nga keta anmbil ei, rʉp itmin
3:13-3:18 - Pilpa kungʉndi mbo raⱡ etpa
4:1-4:18 - Mʉi kona ila mel mbʉ, numan ngorum wamp ti, Got nga el rui wamp mel morum
5:1-5:6 - Wamp mel pi mbʉ nga ik ti
5:7-5:20 - Oⱡa tʉpa kʉni uⱡ ila, ronduⱡ mundʉp moⱡpʉn, atinga rʉmin
1
Jeims Nga Mon Ti Rurum Ei
Na Jeims ei, Got kʉn Nuim Jisas Kraist raⱡ nga kindmant wu ei mor. Enim Isrel wamp rʉⱡaip 12 kʉⱡ, mbuⱡ mbaⱡ nʉk puk, kona mbila elpa elpa pek andʉk mormun kʉⱡ nga, rawe etʉp mon ei, rop ngont.
Oⱡa Tʉpa Kʉni Uⱡ Ei Ndi, Mondpa Pili Uⱡ Ei, Etpa Ronduⱡ Mundrum
2-3 Na nga angmʉn! Oⱡa tʉpa kʉni uⱡ elpa elpa mat, enim kʉn om ndam, enim ambulk palk muⱡʉi! Nambuⱡ uⱡ emel, enim nʉk punmʉn enim. Oⱡa tʉpa kʉni uⱡ mat, enim kʉn om ndam, enim nga mondpa pili ei, etpa ronduⱡ mundʉmba ei nga, enim nʉk pilik ronduⱡ puk, mbun mbʉ koma rok muⱡʉi! Wote, enim ui mbila nga rʉk rʉk ronduⱡ mundʉk molk, mbun koma rʉi! I eng uⱡ ei ndi, uⱡ kun kai mbʉ, enim kʉn pemba. Wote, Got nga uⱡ kun kai mbʉ, enim kʉn kurpa nui nanʉmba mon. Enim kapⱡa itangga uⱡ kun kai mbʉ, etʉk mint muⱡing. Wote, wamp nam ti, pilpa kungʉndi uⱡ ei, pili napilim ndam, Got kʉn atinga ropa mawa etangga kʉn, elim ndi ngumba. Nambuⱡ emel, Got ndi pilpa kungʉndi uⱡ ei, wamp mbʉ pora wei ngorum. Ei nga, wamp ei, mondpa pilpa, Got kʉn atinga rangga. Numan ʉkpʉk ti nʉtangga! Numan ʉkpʉk tʉm ndam, kona kʉpkʉ ropa, num kuta noipʉp naipʉp nʉtʉm ei mel, kapⱡa etmba. 7-8 Wamp ei nga, numan raⱡ etpa pendpa uⱡ etʉm mbʉ, omba tenda ila pi napʉrʉm mon! Wote, wamp i etmin mbʉ, Nuim ei ndi, ngumba nʉk pili nʉpili.
Wamp Mel Pi Mbʉ Kʉn, Wamp Kurpa Mbʉ Kʉn
Wote wu ʉngʉn kurpa norum, ti Got ndi, mbi mepa oⱡa purum ei nga, ambuⱡpa paⱡpa muⱡangga. 10 Ei kʉn, wu mel pi ti, Got ndi, mepa mana omba mondrum ei nga, ambuⱡpa paⱡpa morum. Nambuⱡ emel, wamp ei mepa mana omba ei, nde kuk na ti oⱡʉl tepa mana purum ni mel, kapⱡa morum. 11 Kona ant ei ropa ronduⱡ mba morum ei kʉn, nde kuk mbʉ oⱡʉl tetʉm. Kuk kai nimbʉ kit morum. Ei mel ku, wu mel pi ti, mel mbʉ nga numan tʉpa mundpa moⱡpa, wote korum.
Oⱡa Tʉpa Kʉni Uⱡ Ei Nga Ik
12 Wamp nam ti ndi, oⱡa tʉpa kʉni uⱡ mbʉ nga mbun koma rom ndam, ei ambuⱡpa paⱡpa moⱡangga! Mbun koma ropa pora ndum ndam, wote Got ndi, kont mul uⱡ kai ti ngumba. Got ndi, nimba mʉi ropa nimba mel, “Na numan ngum wamp ti, uⱡ nga kunt nga kont mul uⱡ ei nguimp,” nitim.
13 Wamp ti ndi, oⱡa tʉpa kʉni uⱡ ila uⱡ kit mbʉ em ndam, “Na Got ndi, mepa mba uⱡ mbʉ, mbo rondnʉm,” ni nʉnangga mon! Nambuⱡ emel, uⱡ kit ei ndi, Got kundpa ti natʉtʉm. Wote, Got elim ndi, wamp ti uⱡ kit iti nʉtangga mon. 14 Ei kʉn, wamp ti nga kandpa kum pi ndi uⱡ ei ndi, elim nga numan ila kunt ropa elim tʉpa kan nguⱡnga, nombuⱡa mam kupa ei, wak rorum. 15 Wote, wamp ei nga kandpa kum pi ndi, numan kit ei ndi elinga, uⱡ kit mbʉ etʉm. Wote, akil tepa uⱡ kit ei ndi elinga kʉn, wamp kui nga, uⱡ ei ngorum.
16 Na nga angmʉn! Uⱡ ei ndi, enim ik kol ropa ngui ngʉngangga. 17 Mel kai mbʉ, muⱡ ila mana urum mbʉ, Got ndi, tʉn rʉk rʉk wei gem ngumba pendʉtʉm ei, rʉⱡang pi kona ei nga Wuta ei ndi etʉm. Elim unt murum, akup morum, wote moⱡpa mint mba ei nga rʉⱡang nga Puⱡ Wu ei ndi etʉm. 18 Got elim nga numan ndi pilpa, elim nga ik kupa ei ndi, tʉn wamp mbʉ mim itim. Ei nga, tʉn mel mbʉ nga kuimbal muⱡʉmin nimba itim.
Pilpʉn Kun Etpʉn Pep Ruimin
19 Angmʉn ye! Enim pilik kun itʉi! Enim wamp mbʉ pora ik ei, tʉk rʉk pilik tʉk, wote wang nduk nʉi! Wote popʉⱡ tʉk rʉk mundi nʉmʉndʉi! 20 Ei nambuⱡ emel, wamp nga popʉⱡ mundi uⱡ ei ndi, Got nga uⱡ kun kai mbʉ, etʉk kai mundi namʉndʉrmʉn. 21 Ei nga, enim uⱡ kit mbʉ, pendʉk kelik, wote enim Got nga ik mbo inditmʉn ik ei pilik tʉk, enim nga numan ila pindʉi! Ik ei ndi, enim nga min ei, etpa tʉmba. 22 Wote enim ndi, en enim ik kol rok nguk, Got nga ik ei kum ei ndi, mint pili nʉpilʉi mon! Enim ik ei pilik tʉk kʉn, wote ik nitim ei mel, pep rok itʉi! 23-24 Wamp nam ti ndi, Got nga ik ei, kum ei ndi mint pilpa, wote tʉpa apra ndupa ik nʉtʉm ei mel iti natʉtʉm. Wamp ei kiraipa ila, elim nga kuimp keta ei kandpa, wote tʉpa apra ndurum ei mel kapⱡa. 25 Ei kʉn, wamp nam ti ndi, wamp uⱡ kit etmin ila, etpa wei mondrum mi ik kun kai kʉⱡ pilpa tʉpa kʉn, tʉpa apra ndui nandpa, wote pep ropa em wamp ei, elim nga namba uⱡ mat em mbʉ, Got ndi, memp pendʉmba. 26 Wamp ti ndi nimba mel, “Na mondpa pili wamp ei!” nimba. Wote, el elim nga keta anmbil ei, rʉp iti natʉm ndam, el elim nga mondpa pili uⱡ ei nga, muⱡ ti mon! Ei nga, elim ndi, el elim ik kol ropa ngorum. 27 Tʉn nga mondʉp petmʉn uⱡ ei, Got Tipam ei ndi kundpa, eng nui kai mbʉ kʉn, ik kupa mint nimba ei, ya uⱡ ei mel itamin. Kangambuⱡa etpa mbʉ rʉp etpʉn, amp wiya na mbʉ, mbun tʉng mbila, tʉp rapundpʉn, wote mʉi kona uⱡ kit mbʉ, minda ndui nʉndʉmin.