5
1 Taunabunai, umui, Dirava natuna, ena lalokau, Dirava ba haḡoia.
2 Lalokau ai ba raka, Keriso ese e lalokau henida heḡereḡerena; ia sibona e heni, ita daidai, herahia ḡauna bona boubou ḡauna mai bonana namona, Dirava ena.
3 Heuda-hanai bona mata-dika bona mata-ḡaniḡani na bogaragimui ai basio herevalai; helaḡa taudia edia dala bunai.
4 Lebulebu, kavakava, hevaseha herevadia danu dia nanamo; a hahenamo herevadia hari namo.
5 Dibamui, auli, heuda-hanai tauna bona mata-dika tauna bona mata-ḡaniḡani tauna na asi ahudia, Keriso bona Dirava edia basileia lalonai; idia be kaivakuku itomadiho-henidia taudia na heheto.
6 Tau ta ese hereva kavakavadia basine koilaimui; badina be unu ḡau daidiai Dirava ena badu na gwau-edeede taudia latadiai e kaumu.
7 Badina bunai, idia ida basio hetura.
8 Badina be gunaguna umui na didibura, a harihari umui vada ome diari, Lohiabada lalonai: ba raka, diari memerodia heḡereḡeredia.
9 Badina be diari huahuadia na lalohadai namodia ai bona kara maoromaorodia ai bona hereva momokanidia ai e hedinaraimu.
10 Lohiabada ihamoalena karana na ba tahua.
11 Dibura karadia asi huahuadia na basio hetura henidia, a ba hahedinaraidia;
12 badina be edia kara hehunidia igwaurai-hedinaraidia na mai hemaraina.
13 A e hahedinaraidia ḡaudia iboudiai na diari ese e hahedinaraimu; badina be e hahedinaraimu ḡaudia iboudiai na didiari.
14 Badina bunai hereva na e tomu,
Mahuta taumu e, a noga;
Mase taudia bogaragidia amo ba tore isi;
Keriso ese diari baine henimu.
15 Taunabunai, emui raka nahuana ba tohoa; aonega taudia heḡereḡeredia ai ba raka, dia kavakava taudia na heheto.
16 E henimui negana ba ḡaukaralaia namonamo, badina be ina na nega dikana.
17 Benaini, basio kavakava; Lohiabada ena ura ba diba ḡoeva.
18 Vine ranuna basio inua momo, kekero garina; a Lauma ese baine hahonumui.
19 Ba hereva heheni, salamo ai bona ane ai bona lauma anedia ai. Ane bavabi, bona Lohiabada ba hanamoa lalomui ai.
20 Nega idoinai Tamada Dirava ba hanamoa, ḡau iboudiai daidiai, eda Lohiabada Iesu Keriso ladana ai.
21 Ba hemataurai heheni, Keriso o matauraiamu heḡereḡerena.
Hahealo herevadia
22 Hahine e, adavamui ba kamonai henidia, Lohiabada boma kamonai henia heḡereḡerena.
23 Badina be tau na adavana kwarana, Keriso na ekalesia kwarana na heto; ekalesia na ia tau-anina, ia danu ekalesia ihamaurina.
24 A ekalesia ese Keriso e kamonai heniamu heḡereḡerena, hahine ese ḡau iboudiai lalodiai adavadia unu bae kamonai henidia toma.
25 Tatau e, adavamui ba lalokau henidia, Keriso ese ekalesia e lalokau henia na heto. Ia dainai sibona e heni,
26 ena hereva amo ranu ai e huria, baine hahelaḡaia,
27 ma baine abia iena; ekalesia mai hairaina, asi toutouna, asi makukuna, asi berona; baine helaḡa asi bebeka-bebekana helaoreana.
28 Unuhetomana tatau ese adavadia bae lalokau henidia, sibodia tau-anidia e lalokau henimu heḡereḡerena. Adavana e lalokau heniamu tauna ese sibona e helalokaumu.
29 Badina be tau ta ese sibona tau-anina se inai heniamu, to e ubuamu bona e dosiamu, Keriso ese ekalesia e ubuamu bona e dosiamu heḡereḡerena.
30 Badina be ita na ia tau-anina regena.
31 “Badina binai tau ese tamana sinana baine rakatanidia, adavana mo enai baine tao, bena raruosi vada tau-anina tamona na heto.”
32 Ina hereva hehunina anina na bada; to lau ese Keriso bona ekalesia na gwauraidiamu.
33 Benaini, umui tatau ta ta adavamui ba lalokau henidia, sibomui o helalokaumu heḡereḡerena. Hahine danu adavana baine matauraia.