14
Aigupto taudia ese Israel taudia e ḡavadia
1 Bena Iehova ese Mose e hareva henia, eto
2 Israel taudia ba haduadia, bae lou, Pi-hahiroto vairanai bae taruha, Migdol bona davara padadiai, Baal-sefon vairanai; ia hevaira-hehenina ai davara badinai ba taruha.
3 Badina be Farao ese Israel taumui baine herevalaimui, baineto “Idia na tano ḡaḡaena ai e raka hehiri-hehirimu, lalodia vada e haboioboio”.
4 Bena lau ese Farao lalona baina ha-aukaia, bena ia ese baine ḡavamui; a lau ese Farao mai ena tuari oreana idoinai baina hadareredia, bena Aigupto taudia vada bae diba lau na Iehova. Bena unu e kara toma.
5 Una negana ai haida ese Aigupto pavapavana e hamaoroa Israel taudia vada e heau; bena Farao mai ena hesiai taudia ida e halalo, lalodia ma e idau Israel taudia ediai. Idia eto “Israel taudia ta kahudia nege, isiaida ilao-henina ai bae doko, anina be dahaka?”
6 Bena ia ese ena kariota e abia heḡaeḡae, bona ena orea taudia e hakaudia lao.
7 Kariota namodia sinahu tauratoi e abidia hidi, bona kariota oredia danu e laohai, Aigupto kariotadia iboudiai, ta ta mai biagudia.
8 Una negana ai Iehova ese Farao, Aigupto pavapavana, lalona e ha-aukaia, bena ia ese Israel taudia e ḡavadia; badina be Israel taudia vada e raka lasi, asi edia gari.
9 Aigupto taudia ese e ḡavadia, Farao ena hosi bona ena kariota iboudiai, ena orea taudia hosi ai e gui danu, bona ena tuari taudia, bena idia ese Israel taudia e lasidia tao edia taruha ai, davara badibadinai, Pi-hahiroto badinai, Baal-sefon vairani.
10 Farao na e raka kahira; bena Israel taudia e roha isi, Aigupto taudia e itadia vada e lasidia tao, bena e gari dikadika, Iehova e tai henia.
11 Bena idia ese Mose e gwau henia, eto, Aigupto ai gara gabudia lasi a? Una dainai oi ese vada o hakaumai lasi, tano ḡaḡaena ai baia mase totona a? Badina be dahaka Aigupto amo vada o hakaumai lasi?
12 Ai na Aigupto ai asia hereva henimu, a, asiato “Emai ai a raka oho, ai na Aigupto taudia isiaidia baia lao heni”, a? Badina be Aigupto taudia isiaidia baiama lao heni be namo, a tano ḡaḡaena ai baiama mase na dika.
13 A Mose eto, Basio gari, ba gini tutuka-tutuka, Iehova ena hahemauri do ba itaia, hari dina ai baine hamaurilaimui, badina be Aigupto taudia harihari o itadiamu na basio itadia lou, lasi ona lasi vaitani.
14 Iehova na umui daimui ai baine tuari; umui na ba noho boioboio.
15 Iehova ese Mose ma e hamaoroa, eto, Dahaka dainai o tai henigumu? Israel taudia ba haduadia, bae raka lao.
16 Oiemu itotohi danu ba duduia isi, imamu davara daenai ba toia roro, ba hapararaia; bena Israel taudia na tano kaukauna ai bae raka hanai.
17 A lau be Aigupto taudia lalodia baina ha-aukadia, bena bae ḡavamui: bena lau ese Farao mai ena tuari oreana idoinai, ena kariota bona ena hosi-gui taudia, baina hadareredia.
18 Bena Farao bona ena kariota bona ena hosi-gui taudia baina hadareredia negana ai Aigupto taudia na bae diba lau na Iehova.
19 Bena Dirava ena aneru, Israel ena taruha vairanai e nohova aneruna, na muridia kahana ela; bona ori dubuna danu idia vairadia kahana amo e heabi isi, idia muridia kahana ela,
20 Aigupto taudia edia taruha bona Israel taudia edia taruha padadiai eha gini. Bena ori na dibura ai e miava, to ia ese diari e henidia hanuaboi ai; bona una hanuaboi idoinai orea ta ese orea ta se raka henia kahi.
21 Bena Mose ese imana e toia roro davara daenai; bena Iehova ese lai gubana amo davara e haloua, una hanuaboi idoinai. Bena davara na e haheparara, tano kaukauna e hedinarai.
22 Bena Israel taudia ese tano kaukauna ai davara e rakaia hanai; davara ranuaia e kara haba na heheto, idibidia kahana ai bona lauridia kahana ai.
23 Bena Aigupto taudia ese davara bogaragina amo e ḡavadia, Farao ena hosi bena ena kariota bona ena hosi-gui taudia iboudiai ese e ḡavadia. ?
24 A daba kahana ai Iehova ese lahi mamana bona ori dubuna amo Aigupto edia tuari oreadia e nenedia, bena e hahekwarahdia:
25 edia kariota uilidia e hepuni, bena kariota na asie heau namonamova. Taunabunai Aigupto taudia e hereva heheni, eto, Israel taudia vairadia amo baita heau, badina be Iehova ese idia e durudiamu, ita e tuari henidamu.
26 Bena Iehova ese mose e hamaoroa, eto, Oi imamu na davara daenai ma ba toia roro, ranu ma baine lou, Aigupto taudia latadiai bona edia kariota latadiai bona edia hosi-gui taudia latadiai.
27 Bena Mose ese imana e toia roro daenai, bena daba matana ai davara ma e lou gabuna ai; bena Aigupto taudia na davara vairanai e heau. Unu amo Iehova ese Aigupto taudia e hadareredia, davara bogaraginai:
28 ranu na e lou, kariota bona hosi-gui taudia bona Farao ena tuari oreana idoinai, davara bogaragina amo Israel taudia e ḡavadia taudia iboudiai na e habubunidia; ta we roho mauri.
29 A Israel taudia na tano kaukauna ai e raka hanai, davara bogaraginai; ranu na e kara haba na heheto, idibadia kahana ai bona lauridia kahana ai.
30 Unuhetomana Iehova ese Israel taudia na Aigupto taudia imadia amo e hamauridia una dina ai. Bena Israel taudia ese Aigupto taudia masedia ai e itadia, kone ai.
31 Aigupto taudia na Iehova ese ede e karadia toma Israel taudia ese e itaia; bena iboudiai ese Iehova garina e gari. Idia ese Iehova e abidadama henia, ena hesiai tauna Mose danu e abidadama henia.