35
Mose ese Israel taudia e haḡanidia
1 Mose ese Israel hegogona idoinai e haheboudia, e haḡanidia, eto, Iehova ena hahe-gani emui ai bini:
2 Dina taura-toi ba ḡaukara, a dina ihahituna na baine helaḡa emui ai, Dina Helaḡa bona laḡa-ani dinana ai bainela, Iehova ena; una dina ai baine ḡaukara tauna na bavalaia.
3 Lahi be basio ha-ara emui ruma ai Dina Helaḡa ai.
4 Mose ese Israel hegogona idoinai ma e haḡanidia edia hebou ai, eto, Iehova ena hahedua binai:
5 emui herahia ḡaudia ba hulala, Iehova ena. Taigadia nanamo taudia iboudiai ese edia herehia bae mailai: gold bona silver bona auri labora-labora;
6 dabua vaiuridia bona mia-kakadia bona kakakakadia bona kurokurodia; nani huidia;
7 mamoe kopidia, e hakakakakadia ḡaudia, bona nani kopidia; kela audia;
8 lamepu dehorona, bona dehoro helaḡana muramuradia, bona muramura mai bonadia, bae gabu ḡaudia;
9 onuku nadidia, bona hahelaḡa taudia edia hahedoki bona edia vaina ihaheralaidia nadidia.
10 Bena karakara taudia iboudiai bae hebou, Iehova vada e haḡanilai ḡaudia iboudiai bae kara: dubu
11 mai kalagana bona mai guhina ida; ena igau bona ena haba kahadia bona ena raroraro bona ena du, mai ihahelai-kaudia ḡaudia ida;
12 maua helaḡana, mai ikaruhina bona mai ena maduna ida, bona iseseahulaina seseahuna;
13 pata helaḡana, mai ena maduna bona mai ena kohu idoinai ida, bona flaoa helaḡana;
14 lamepa patana mai ena kohu idoinai, bona ena lamepa bona ena lamepa dehorona;
15 muramura patana mai ena maduna ida, bona dehoro helaḡana, bona muramura mai bonaida; dubu iduarana seseahuna;
16 ihaboulaina patana mai iha-aukana auri labora-laborana, mai ena maduna bona ena kohu idoinai ida; auri labora-labora dihuna, mai ihahelai-kauna ḡauna ida;
17 maḡu dabuadia, bona maḡu duna mai ihahelai-kaudia ḡaudia ida, bona maḡu ikoukouna seseahuna;
18 dubu bona maḡu ikokodia, mai kwanaudia ida;
19 gabu helaḡana dabuadia mai heraheradia ida, bona Aaron, hahelaḡa tauna, ena dabua helaḡadia, bona ia natuna hahelaḡa karadia bae kara negadia ai bae doki dabuadia.
20 Bena Israel hegogona idoinai e didi karoho, Mose vairana amo e raka oho.
21 Bena taigadia nanamo taudia na laumadia ese e hagoadadia heḡereḡerena ta ta ena herahia ena herahia e mailai, Iehova ena, hebou kalagana ḡaudia bona kohudia bona dabua helaḡadia ikaralaidia ḡaudia.
22 Idia na ema, lalo-namo tataudia bona hahinedia iboudiai, gold ḡaudia idau-idau e mailai: pini bona gadei bona vaḡivaḡi bona ageva. Ibouboudiai ese edia gold e herahialai, Iehova ena.
23 Mai edia dabua taudia danu, vaiurina eiava mia-kakana eiava kakakakana eiava kurokurona, vada e heni. Haida danu nani huidia bona mamoe kopidia, e hakakakakadia ḡaudia, bona nani kopidia e heni.
24 Mai edia silver bona mai edia auri labora-labora taudia iboudiai ese danu edia silver eiava edia auri labora-labora Iehova e henia. Bona mai eida kela audia, una ḡaukara heḡereḡerena, taudia iboudiai ese e heni.
25 Dabua ḡaukaradia mai dibadia hahinedia iboudiai ese danu dabua e hatu, bena imadia ḡaukaradia e heni: dabua vaiuridia bona mia-kakadia bona kakakakadia bona kurokurodia.
26 Bona mai dibadia hahinedia ese nani huidia e moḡe, bena e hatu.
27 Iduhu lohiadia ese onuku nadidia, bona hahelaḡa taudia edia hahedoki bona edia vaina ihaheralaidia nadidia,
28 bona muramura, bona lamepa dehorona, bona dehoro helaḡana, bona muramura mai bonadia, e heni.
29 Israel taudia bona hahinedia iboudiai ese edia lalo-namo dainai edia herahia ḡaudia Iehova e henia, Iehova ese Mose e haḡanilaia ḡaukaradia ikaradia totona.
30 Bena Mose ese Israel taudia e hamaorodia, eto, A itaia, Iehova ese Besalele, Uri natuna, Huru tubuna, Iuda iduhuna tauna, vada e abia hidi.
31 Dirava ena Lauma ese vada e rohea, lalo-parara bona aonega vada e henia, bona ima karakara daladia idau-idau vada e hadibaia;
32 ḡau namo-hereadia ikaradia daladia baine haero, gold amo bona silver amo bona auri labora-labora amo baine kara.
33 Herehera nadidia iutudia danu, bona au ikorodia, bona ima karakara daladia iboudiai baine diba.
34 Siahu danu ia vada e henia, bona Oholiab, Ahisamaka natuna, Dan iduhuna tauna, danu vada e henia, raruosi ese haida ma bae hadibadia ini ḡaukara ai.
35 Aonega vada e henidia, ima karakara daladia iboudiai bae haero bona bae kara; dabua ḡaukaradia danu bae diba: dabua vaiuridia bona mia-kakadia bona kakakakadia bona kurokurodia bae hatu bona bae turi. Ima karakara ḡaudia iboudiai bae haero ḡoevaḡoeva bona bae kara ḡoevaḡoeva.