1 Yooyo ukati uyo Aparahamu ahooluvala ni Mwaneene Nluku ahonvaha iparakha wo citthu cothene. 2 Vano Aparahamu amwiihanaka karumeyi awe omuulupale owapuwani arina nlamulo no citthu cothene cariwo, ahomwiirela: Weese ntata naa nno wanatarani waka, 3 ni ulupele wa Mwaneene Nluku, mwaneene irimu ni itthaya wiira wamphavele nthiyana oonthela mwamwanaka uhinthanle iriyari ya asithiyana annakanaa anakhalaneehu ala mu. 4 Nanso urwee uwaani, ilapo iyareliyaka ni wamucyaka ni wanthanle nthiyana nohala unthela mwanaka Isaki.

5 Vano karumeya uyo ahokoha: Kaahiki nthiyana uyo ahitthuneke uwa ni miyano uno, kaankuseke mwamwaninyu uyo nuunrwana ilapo ikhumileenyu?

6 Aparahamu ahomwiirela: Kaasope. Akinphela wiira mwamwanaka uyo unturusele uwaani. 7 Mwaneene Nluku, Nluku o wirimu kikumihile ilapo yo mayapaapa ni iyareelyaka aholupela ni ahokikhuluveliha ukivaha mi ni ucuulu aka ila ilapo ela. Ayo anaahala wuveleelihera ncelo uhoolo waa, wiira we waanthanle woonwo nthiyana omaana oohala unthela mwanaka. 8 Nanso nthiyana uyo ahithuneke uwa ni we uno, unahala wothopwa ulupela waa nwo. Itthu ihimphavelaka iri unturusela mwana uyo uwaani. 9 Vano karumeya ule aheesa ntata nawe wanatarani wa Aparahamu nkunya awe ni aholupela upanka.

10 Vaavale karumeya ule ahokusa inkamira khumi ca nkunya awe, ni ahokhuma ni mihakhu ca nkunya awe ule mmatatani mwawe, ni ahorwaa uMesapotamiya, iparasa yo Nakoori. 11 Ni ahokhoromihaca inkamira cawe uta woparasa, vakhiviru ni iluusi, yocoocilo ukati asithiyana unrwaya urika maasi. 12 Vano aheera: Mwaneene Nluku, Nluku a nkunya aka Aparahamu, ukivahe ilelo ukumaana wooreera, ni umpanke nnema nkunya aka Aparahamu. 13 Kinawoona va kemeenle waluusi, ni asaana asithiyana a atthu oparasa ela ammweesa urika maasi va. 14 Nna va kinoolepelani wiira, mwali nohalaka umwiirela uyo: Wiinamihe mwaapu uyo kiwuryee; ni uyo akiirelaka mmuryeke ni kinavaha maasi inkamira cinyu nnyo; yooyo phimwacileenyu wiira anthele karumeya enyu Isaki, ni mi kinahala ucuwela wiira nhonpanka nnema nkunya aka.

15 Vaavale, hinamaliha uswali, ahowa Repeka, mwana a Petuweli, mwana a Milka, amwaara a Nakori, munnaawe Aparahamu, nakusile mwaapu wanikhatani. 16 Mwanthiyana ole aari ooreera venci, mwali oohipaca urupa ni nlopwana; ahophiya waluusi nuucariha mwaapu awe nuuturuwa. 17 Karumeya awe Aparahamu ahontthimakela nuumwiirela ukivahe maasi aari mmwapuni ayo kiwurye. 18 Ule ahaakhula: Uwuryeke nkunya. Wowakuvyaca ahorula mwaapu ule nuunvaha mmatatani mwawe wiira awurye. 19 Vano namanleene unvaha maasi owurya aheera: Kinarika tho maasi kivahe inkamira caa nnyo wiira ciwurye maasi ootosa. 20 Wowakuvyacawene aheetthela maasi ale nwuryeryoni monkamira, ni ahorwaa tho uluusi urika maasi mpaka uvaha inkamira cothene. 21 Nlopwana ole anomaala aweehaka ni awehereryaka wakhala wiira Mwaneene Nluku khaamweettihacile mahala ikwaha awe eyo.

22 Wahoolo inkamira nnyo umala waya uwurya, karumeya a Aparahamu ahokumiha ipaara imoca yopirinku cowooru cookhala imaara siita ceelemelelo aya ni ikhankani piili cowooru cookhala imaara iminya wosirini ceelemelelo aya nuunvaha mmatatani mwawe. 23 Vano ahonkoha eeraka: We mwana awani? Kinawulepela ukihimyacere. Ni kahiki nihaawo nipuro waathumwana nwo wiira nomake? 24 Mwanthiyana ole ahaakhula eeraka: Mi ki mwana a Petuweli, mwana awannyawe Milka, yariye ni Nakori. 25 Ahomwiirela tho: Nihaana malasi, coolya cinci ni nipuro noorupa. 26 Vano nlopwana ule ahooroma phinlepelaka Nluku 27 eeraka: Areerihiye Mwaneene Nluku a nkunya aka Aparahamu, hitamihile nifento neekhweeli wa nkunya aka. Ni Nluku uhokihola mi ikwaha yothene mpaka ukipiha walokwawe nkunya aka.

28 Vaavale mwanthiyana ole ahokhuma atthawaka mpaka waanumwane ni ahottonka yakhumeleenle. 29 Repeka ahaana nrokorawe eehaniya Lapanu. Ni Lapanu wiiwa wawe mwaha oyo, wowakuvyaca ahokhuma atthawaka mpaka umphwanya nlopwana ule uluusi. 30 Kontha weenre coo: Lapanu wamonnyawe mwanrokorawe nawanre ipirinku ni ikhankani nnye, ni wamwiiwilyawe mwanrokorawe uyo ni weewilyawe moolumu amwanrokorawe ayo eeraka: Coo phikulumacenryawe nlopwana uyo. Vano Lapanu ahonrwela ni ahomphwanya neemenle waluusi ni inkamira cawe nnyo. 31 Ni ahomwiirela: Nrwee uwaani we ooreerihiya ni Nluku unhala urupelani vate? Kontha mi uwaani nwo kihotthenkemaniha mapuro oorupa we mpaka inkamira caa nnyo. 32 Vaavale nlopwana ule uphiya wawe uwaanyawe Lapanu, ahovahiya nipuro noorupa, maasi oorapiha inyaa cawe, wamoca na atthu yarinawe, ni inkamira nnye cahoheleliya malasi ni makukhu. 33 Vano nawiiheriyeene yoolya, ule aheera: Akinlya mpaka kipacereke uhimyaca itthu yawenlyaka eyo. Lapanu ahomwaakhula eeraka: Wuulumaceke. 34 Ule phenryawe: Mi ki karumeya a Aparahamu. 35 Mwaneene Nluku honvaha iparakha ciinci nkunya aka, hokhala thaciri, honvaha ikhontwaa ni imope ciinci, ipheeta ni iwooru, haana ipottha cilopwana ni cithiyana, inkamira ni apuuru. 36 Mpaka Asaara mwaara a nkunya aka, honnyarana mwana nooluvanleene ni citthu cothene honvaha mwana uyo. 37 Vano nkunya aka hokilupeliha mi eeraka: Uhinkuse nthiyana Annakanaa ri yeela ilapo inkhalaka ila unvahaka mwanaka wiira anthele, 38 nanso urwee uwaani, ilapo yo mayapaapa ni wamucyaka wonwo wanthanle nthiyana nohala unthela mwanaka. 39 Phimaana mi kahonkoha nkunya aka, wiira kaahiki nthiyana uyo ahitthuneke ukitthara uno? 40 Ule ahokaakhula eeraka: Mwaneene Nluku ri ni mi. Uyo naahala wuuvelelihera ncelo owuuhola iphiro wiira wankuse nthiyana o wanrukuluni waka, o wapuwani wa apaapa wiira anthele mwanaka. 41 Nna unhala wothopwa itthu yurumilyaka weeraka uphiya wamucyaka nwo ukhottiheriyaka uvahiya nthiyana oyo. Paahi uhotopwa itthu yurumilyaka eyo

42 Phimaana ilelo uphiya waka uluusi kiholepela kiiraka: Sontte Mwaneene Nluku, Nluku a ankuya aka Aparahamu, wakhalaka wiira ikwaha impankaka ila iri yotthuna winyu nkeettihe ratta. 43 Nna va kiri waluusi yo maasi, nkiiwe, mwali nohala uwa urika maasi uyo, ni mi kimwiirelaka: Ukivahe maasi kiwurye ommwaapuni mwa ayo; 44 ni uyo akiirelaka: Uwuryeke we, ni ciicammo kinahala uvaha maasi inkamira caa nnyo paahi yooyo phi nthiyana mwacilyawe Mwaneene Nluku wiira akhale amwaara a mwana a nkunya aka.

45 Wanowiira kihinamaliha uswali nwo, pha wawe waluusi va Repeka nakusile mwaapu awe wanikhatani ahophiya mpaka waluusi ni ahorika maasi. Vano mi kahomwiirela: Ukivahe maasi kiwurye. 46 Ule wowakuvyaca aheenamiha mwaapu awe nuukiirela uwuryeke, ni ahovaha uwurya inkamira caka nnyo. 47 Vano kahonkoha wiira we mwana awani? Uyo ahokaakhula eeraka: Mi ki mwana a Petuweli mwana a Nakori nnyanryawe ni Milika. Phimaana kihommwariha ipirinku nnyo, ni ikhankani mmyononi mmo; 48 ni kahoromela vathi kinlapelaka nuunsukuru Mwaneene Nluku, Nluku a nkunyaka Aparahamu, kiveleenle iphiro yomaana wiira koonkuse mwana a alokwawe nkunya aka wiira anthele mwanawe.

49 Nna va munthonyihere ikhweeli nkunya aka, mwatthuna nkihimyacere, ciicammo mwahitthune nkihimyacere wiira mi kicuwele yoweettela.

50 Vaavale Lapanu ni Petuweli yahaakhula: Cothene cipankaciye ni Mwaneene Nluku, hi khaninoona yowuhimerya yoonanara atthuna yooreera. 51 Nna va Repeka uyo phu ula. Unkuseke ni urweke wiira atheliye ni mwana akunya aa, toko cihimilyawe Mwaneene Nluku. 52 Vano karumeya Aparahamu, ahoromela vathi anlapelaka Mwaneene Nluku. 53 Ni ahokumiha mihaca copheeta, cowooru ni ikuwo phummahaka Repeka. Ciicammo ahokumiha citthu comaana phummahaka nrokorawe eehaninya Lapanu ni anumwane.

54 Wahoolo, ule na alopwana yarinawe ale aholya nuurupa. Usa waya, karumeya Aparahamu aholeeha eeraka kihorwaa wankunya aka. 55 Nanso anumwane ni mwanrokorawe Repeka yaheera: Unihiyere mwanthiyana ula mahuku vakani, atthuna mahuku khumi paahi uhoolo nwo naarwaka. 56 Vano ule aheerela nhikiporonkanihe. Ikwaha ila Mwaneene Nluku hokireeriha. Nkihiye kituruwele ratta wankunya aka.

57 Ale yaheeraca: Nrwee nimwiihane mwanthiyana uyo nankohe. 58 Vaavale yahomwiihana Repeka phunkohaka: Unatthuna urwaa ni ula nlopwana ola? Ule ahaakhula eeraka: Kinatthuna.

59 Vano amucyawe yahonleeha Repeka wamoca ni nthiyana amwamwihile, karumeya Aparahamu na alopwana yarinawe. 60 Ni yahonreeriha Repeka amwiirelaka:

61 Vaavale Repeka nacikhwawe yahowelaca inkamira, nuntthara karumeya ule. Phimaana karumeya ule ahonkusa Repeka nuurwa.

62 Yooyo ukati uyo Isaki aakhuma iphiro yoluusi Ulayi-Royi, kontha akhala ilapo yohitto. 63 Nihuku nimoca ukati wococilo, Isaki anaswali mmattani, ahowusa miitho awe ayo ni ahoona inkamira ciwaka. 64 Ciicammo Repeka, ahowusa miitho awe ayo ahomoona Isaki, ni ahokhuruwa munkamirani, 65 ni ahonkoha karumeya ule eeraka: Tipani ule nonisicerya mmattani ule? Karumeya ule ahaakhula: Yoole phi nkunya aka. Wowakuvyaca wene Repeka ahekhunela wiitho nwo nikuwo.

66 Wahoolo karumeya uyo ahonttonkela Isaki citthu cothene ceeranele. 67 Paahi, Isaki ahonkusa Repeka mpaka nheemani mwa anumwane yeehaniya Asaara, ahonthela nuunfenta. Phimaana Isaki ahomaalihiya ni Repeka, ukhwa waya anumwane.