1 Yooyo ukati uyo, Yutta ahaahiya asunnawe ni ahorwaa ukhala inupa ya nlopwana mmoca eehaninya Hiira, ilapo yo Atulami. 2 Vano Yutta ahomoona mwanthiyana mmoca nKanaa eehaninya Suuwa. Ule ahonkusa nuunthela. 3 Ni mwanthiyana ole ahorupala ni onyara mwana nuummaha ncina na Eeri. 4 Ahorupala tho irukulu, ahonnyara mwana nlopwana nuunvaha ncina na Onani. 5 Ahaakulela tho nuunyara mwana ni ahonvaha ncina na Seela. Yooyo annyanre nari uKisipi. 6 Vano Yutta ahomwaverya Eeri, mwanawe oontthaara, nthiyana eehaninya Tamari wiira anthele. 7 Nanso Eeri, mwana oontthaara a Yutta, aari oohiloka wamiithoni wa Mwaneene Nluku, phimaana Mwaneene Nluku ahomwiiva. 8 Vano Yutta ahomwiirela Onani: Ukhale nkelanupa a munnaa, wiira munnaa akhalane ipyo. 9 Nanso Onani wacuwenlyawe wiira asaana ayo khanhala ukhala awawe, ukati wathukumananawe amwaara a munnaawe, aarihakacela vathi wiira hinyarele asaana munnaawe. 10 Ni yaapankawe ile yaari yoonanara wamiithoni wa Apwiya, phimaana nuuyo yahomwiiva. 11 Vano Yutta ahomwiirela Tamari: Weenaneleke unankhwelyaa uyo wapuwani wa athumwana mpaka wanhalawe wunnuwa mwanaka Seela. Kinawuvaha wiira unthele, kontha Yutta oolumacenre commo aaceraka wiira Seela ni uyo hikhwe toko cikhwilyaya asunnawe. Phimaana Tamari ahorwaa waathumwane.

12 Anavinrene mahuku menci, yahokhwa amwaara a Yutta, yaari mwana a Suuwa. Wahoolo Yutta aheepisiha nrima ni ahorwaa ni mpwanawe Hiira, Nnatulami, waweha ahakheli awe okhontwaa oTimina. 13 Vano ahohimerya Tamari wiira atiithyaa anrwaa oTimina uthikila mapururu okhontwaa. 14 Tamari ahorula ikuwo coonankhwele ni aheettiyelela wiitho nwo ni nleso wiira hicuweliye, ni ahonkoma wankhora wo Nayimi, uri iphiro yo Timina, kontha ahoona wiira Seela honnuwa ni khanvahiya tho wiira akhale awannyawe. 15 Vaavale Yutta umoona wawe Tamari amoonihile toko puuta, kontha anookhuneela ikhove awe iyo. 16 Yutta ahorwaa waryawe Tamari nuumwiirela: Nkawe, kinawuvekela kuuthukumanane. Kontha khacuwela wiira amwaara-mwanaka. Ni ule ahonkoha: Unhala ukivahani wowiira ukithukumanane? 17 Ule ahaakhula eeraka: Kinawuveleelihera ipuri yo muncicini mwaka. Ni Tamari aheera: Mwemesere itthu mpaka wanhalenyu uwiiha. 18 Vano ule ahonkoha eeraka: Kemesereke isiyani? Ule ahomwaakhula: Ikanyero eyo, ni nleso naa nno ni nttontto uri mmatatani mwa uyo. Yutta ahonvaha calepenlyawe, nuunrupana mpaka unrupaliha. 19 Wahoolo Tamari ahonwa nuurula nleso nawanryawe, ni ahowara ikuwo coonankhwele cawe.

20 Yutta ahonvaherera mpwanawe Nnatulami wiira oopole citthu cemesenryawe mmatatani mwa nthiyana ole, nanso khaamphwanyile. 21 Hiira ahaakoha alopwana o yoole nttetthe ole eeraka: Ri vayi namararuwa nonkomesa vakhiviru waya iluusi piili ciri ni iphiro yo Nayimi? Ayo yahomwaakhulaca: Mu mmwani mu khanirina namararuwa. 22 Vano uyo ahohokoleela wa Yutta ni ahomwiirela: Akimphwanyile. Uhiya commo, atthu o yoole nttetthe ule yiinre nwo khaawo nthiyana namararuwa. 23 Yutta aheera: Mweeco, ahalaneke cennyo cinhiyenryaka nyo. Akintthuna wiira nitarawyaace. Maana mi kahoovaherera ila ipuri ila wiira wanvahe, nanso we khumphwanyile.

24 Cinavinre myeeri miraru, Yutta ahohimerya wiira: Tamari aheetta uluva ni horupala irukulu. Vano Yutta aheera: Akumiheriye vate ni apahiye. 25 Ukati wakumiheriya awe vate wiira apahiye, Tamari aholeehera nhupi wa amaathi awe eeraka: Kirupalihile phi mwaneene nnya citthu nnya. Ni ahopwaherera eeraka: Nkoonani nnya, ni mmwaavye mwaneene ila ikanyero ila, nna nleso nna ni ula nttontto ola. 26 Vano Yutta ahocuwela citthu nnyo ni aheera: Amwaara-mwanaka ayo ahaana isariya yookivikana mi kontha kinoohavaha mwanaka Seela. Ni khaathukumananne tho.

27 Vano waphiilyaya ukati wooyara, wahoonnyaa wiira haana mavatta mmirimani mmo. 28 Wayaraawe va, mmoca uyo ahokumihera ntata nawe vate ni nthiyana mayooyariha ahonvara moono uyo nuuntthuka nluuci nookhwiila, eeraka: Ula phi oopacera. 29 Ukati waturusa awe mwana ule ntata nawe nno, nhimaawe ule phaphovawe nuupacera uyaryaa, ni nthiyana mayoyariha aheera: Uphwanyile cani ikhato yoovira? Ni ahovahiya ncina na Peresi manaaya wiira ikhato. 30 Wahoolo ahoyarya munnaawe, natthukiye mmoononi nluuci nookhwiila, ni ahovahiya ncina na Seera.