129
Lisingising Ti Lok Pe
Lavamunepen
Mi Limixin Me Israel
1 Limixin me Israel, mina tong asu mo levenngas ua limixin munepen minemi diga lox asongot nemi min, ga ruka i at lurutu kaxat at lubung mixin atnedik.
2 Ap mo levenmaares limixin munepen minema digak lox asongot kapmek tinotno nema, ketla di goxo epovo ri vas asi nema.
3 Ga lok ngan ta do diga tara lempat nin kooxing at leven antuno atnema, la gak milik ngan ta laxangka ding kin li i ritlotlo vanga anan.
4 Ketla Leeme Silok, ni Laradi Manmanton, gara lox asepmus pam nema basinge lasaksaxango at limixin munepen.
5 A vara Leeme Silok do, neni naba sep aoo nedi limixin ua di belengatngas ti limixin me Saion.
6 A vara i do dinaba lok ngan levempivilis i suu xat ro vana at lavatlak gu, ua naba mang soso mun.
7 La teta noxo dik kaka tempanga ren kopla nap kos eburu i la na xip kaka i uto at loogu ren.
8 La do tentaba na ekip tangarang midi ro at langa nedi noxo tong i ridi do, “Ma sing Leeme Silok kusu na lox anarong nimi. Ma lox anarong nimi mi laasen at Leeme Silok.”