128
Sua pombolŋana pa zin wal ta timototo Merere mi tileŋleŋ la kalŋaana
Mboe kizin wal ta tizalla pa Yerusalem
1 Zin wal ta so timototo Yooba mi titoto zaala kini,
nako lelen ambai pa kampeŋana tabe ise kizin i.
2 Nu sombe kam ta kembei, na uraata ta kamam pa nomom na, ko iur ŋonoono, mi kom kini ma lem koroŋ irao.
Tana ko lelem ambai pa kampeŋana tabe imbotmbot se ku i, mi mbotmbot ambai.
3 Mi kusim moori ta imborro ruumu ku, nako ipeebe lem pikin boozo, kembei ta ke baen ipiyotyooto ŋonoono ambaimbaiŋan.
Tana niomŋan lutum bizin ko kaparlup yom pa kini kanŋana, mi zin tiliu u kembei ta ke olib iweene tindomdom ma tizze pa ke uunu na.
4 Tana kampeŋana ta kembena,
ta ko ise ki tomtom ta imototo Yooba mi ileŋleŋ la kalŋaana.
5 Yooba, ni imbotmbot kar Sion. Itunu ko ipombolu mi ikampe u.
Mi mazwaana ta so nu mbotmbot su toono na, nu ko re Yerusalem imbotmbot ambai men.
6 Mi ko mbotmbot ma molo su toono,
ma irao re tumbum bizin tipet.
Yooba ko imboro zin Israel ma timbot ambai men. Ŋonoono.