87
Karkari ta boozomen ko tiwe Yerusalem lutuunu bizin
Mboe kizin Kora
1-2 Yooba itunu ta ipamender kar biibi Sion sala lele kini abalabalŋana ta potomŋana na.
Mi ni iur kat leleene pa kar tana
ma ilip pa kar boozomen ta Yakop popoŋana kini timbotmbot pa na.
3 O Yerusalem, nu ta Anutu kar kini.
Tana tomtom tiwidit urum ma iwe biibi.
4 Anutu iso ta kembei: “Nio ko aŋkam zin Aikuptu kan mi zin Babilon kan ma tiute yo, mi aŋpaata zin be wal tio.
Mi ko aŋso pa zin Pilistia kan, Tiro kan, mi Etiopia kan tomini ta kembei:
‘Niom tina, kewe Yerusalem lutuunu bizin, kembei zin wal ta nan bizin tipeebe zin ma tisu Yerusalem na.’ ”
5 Ŋonoono kat. Kar Sion, nako tiso ka sua ta kembei:
“Anutu kor kana kat iyo wal kini pa lele ta boozomen, mi ikam zin ma tiwe Yerusalem lutuunu bizin.
Kar tana, ni itunu ta ipamender.”
6 Mi sombe Yooba ibeede tomtom ta boozomen zan ise ro kini,
nako ibeede wal tana kan sua sotaaraŋana ta kembei:
“Zin tiwe Yerusalem lutuunu bizin kek.”
7 Tana tomtom ko tizze kombom mi timbombo raama menmeen zin ma tizzo ta kembei:
“O kar Yerusalem, nu kembei ta yok bukbukŋana. Pa nu piyotyooto kampeŋana boozomen piam.”