7
Dobo sę dabe yali silimainu ebo ofa dabe po
1 Te Godigo Mosesbolo walama, te Israel dabeba e tiwai po walomainogo yali, “Te dobo sę yali silimainogo ebo ofa dabe te Godiba dolo mu ebao, te habu mu selibao. Te ofa dabe ebo bomai po e tiwai dao.
2 Augwaligo te ofa yabo sipsip dabe elainogo da, augwa te sipsip dabe elama, te ofa eyu, te isiba tigidali ulama, dela silibo pesagede te sę yao. Tama augwa te sipsip kaneme te alta bogo me si me si te badu sąsągą bilao,” po wali.
3 “Augwaligo te sipsip kibu ili selama, te altade Godiba ofa ilao. Augwaligo te kibugo nisali danu sobadi, te kibu haliga tigidali bealubo te ili delegabe me sao,” te po wai.
4 “Tama augwa te hobuludu si dali, tede daganalubo ili me sobadi yao, te sipsipgo polalubo dini homu me deli sao. Augwa te polalubo dini homu me deli siyu, te si wabo homu hobuludu si me sao.
5 Tama prisgo te kibu ili tigidali te alta siaba ulao, augwa te Genuai Bidiba mabo ofa tiwai ebao. Te sipsip ofa ebogo te augwa yali dobo kolesaga silimainu ebo dao.
6 Te pris hani dabe mena bidigo tuabo homu godolo ebaso, aga te ofa yali sipsip mi tumainao. Te Godiba dolo ofa tama ebao, agai te pris dabebolo dąį ilali. Tama tialima, augwa te Godigo sel Ugwa Be obo tomode tubaso usu dao,” wali.
7 “Te dwai sęgę sela sąbo ofago bomai po me, te dobo kolesaga silimainogo ebo ofago bomai po me, te si te augwa bomai po dedeli naga elalubao. Tibaso, prisgo te kibugo ofa ebo side te tobage ofa si yaibao, aga digi te ofa ebo bulmakau mi ma sipsip mi somainu ebo dao.
8 Te prisgo te isigo tigidali dela silibo ofa me deli te kibu dabego ebo sogo da, teda aga digi te kibugo tigi wali somainu yaibao.
9 Te tiwai tama naga te prisgo te augwa wit te moni nai ulubo be nogi aven ma sospende, me praipende ulai wit te ofa ebaso da, aga digi te sela tubo usu dao.
10 Te tigidali ulusiąwai witgo ofa ebaso, te augwaligo ni oliv wel dali taluali, te tigidali Arongo hani prisgo dao. Te olo plauago ofa yali nai me, te me prisgo saibao. Augwaligo te pris deli deli usu nama, tama te nai dobola sao,” te po wai.
Te God dali deli haliga pedalubo ofa dabe ebo po
11 Te Godigo Mosesbolo walama, te Israel dabebolo te tiwai po walomainogo yali, “Te God dali deli haliga pedelabo ofa ebo bomai po, e tiwai elalubo dao.
12 Te bidi me deligo Godiba buba hwi wabo homu eyu, agai te deli haliga pedelabo ofa yainu eyu da, agai te hasa dali te bret pedai dage agai yis meni yai plauago nigai, tego ofa yao. Agai te ni oliv wel dali taluali plauago nigai bretgo te ofa yao. Te agai te tama tiabo homu me ebaso da, aga te bisket dabe te oliv ni welgo pilai, tego ofa yao. Te meni baso da, agai te wiegi yai plaua dali, te ni oliv wel dali taluama, tama skon nigai, tego ofa ebaso usu dao.
13 Tama me agai te yis elalubo bret me badu pedai dage selama, tama te Genuai Bidi dali deli haliga pedalubo ofa yabo usu yaibao,” te po wali.
14 “Agai te ofa yabo haniani bret deli deli pedai dage me deli selama, te Genuai Bidiba mao. Te prisgo te kibugo kaneme selama, te alta bogo badu sąwai te pris bidigo te bret pedai dage dabe somainao.
15 Te bidigo ofa ebo side augwaligo te kibu mi me badu elaluali tigidali tuao. Augwaligo te nosali kigamude tueibao olama, te kibu mi me elalumainu sula tagalamu dao,” wali.
16 “Te bidi me deligo deli haliga pedelabo ofa yabo homu yai, te aga Godiba po dąų wali usu nainogo, ma te aga homu godolo ebaso, te ofa Godiba olo dali mobaso da, teda augwa te ofa yali kibu mi te bidigo ofa ebo side tubadi, te nosali me tubo usu dao.
17 Tama te si wali side augwa te nai tula silisąma, te sela wabo sogoba usu nubaso da, teda augwaligo te isiba ulama, te isigo tigidali dela silaibao,” wai dao.
18 “Augwaligo te sela wabo side te kibu mi tubaso da, teda Godigo te bidigo ofa ebo me sogobeo. Menio. Te Godigo te homu yaibao, te agai ofa te dwai kugumini yai da homu yaibao. Tama niwai bidigo te kibu mi tubaso da, te agai dagede dobo sę ebao, te sęgę elalubao,” wali.
19 “Te deli haliga pedalubo ofa ebo kibu mi te Godigo gedude wiegi yai isąwai naide diąnalubaso da, teda augwaligo te kibu mi munu me tulamuo. Menio. Augwaligo te nai mi dabe tigidali isiba ulama, te isigo mu dela silimainao.”
“Te Godigo gedude meda meni yai wiegi yai we bidi augwaligo te deli haliga pedalubo ofa ebo kibu mi tubaso da, te usu dao.
20 Tiali goli, bidi me deli wiegi yai pedalisąbadi agai te ofa ebo mi tubaso da, teda aga te Genuai Bidigo we bidi hani tomode me bidigobeo,” wai dao.
21 “Te Godigo gedude wiegi yai me isąwani naiba nogo diąwani bidi, tagalao, agai te wiegi yai isąwai meda yai naiba nogo diąwani, ma te bidigo tigide pedalubo naiba diąwai baso, ma te wego tigide pedalubo naiba nogo diąnama, tama nosali agai te ofa yali kibu mi tubaso da, teda aga te Genuai Bidigo we bidi hani tomode me bidigobeo,” po wai dao.
Te Israel dabego te kibu hasa dabego kaneme tugobe olama, habu mu selali
22 Genuai Bidigo Mosesbolo walama,
23 te po te Israel we bidi dabeba mao wai. Genuai Bidigo e tiwai po wali, “Dagego te kibu bulmakau me sipsip meme ili me tugio,” po wai dao.
24 “Te bulmakau me deli aga digi odolali isaibaso, te ili dagego me tugio. Te me bulu uni hasago te kau kibu ela mueibaso me, dagego kau kibu ili me tugio. Tialima, dagego te kibu ili selama, gasa sę yao. Te usu dao.
25 Te augwaligo Genuai Bidiba ofa ebo kau kibu ili te bidi me deligo tubaso da, teda aga te Genuai Bidigo we bidi hani tomode me bidigobe dao,” wali.
26 “Dage Israel, dage te mena bulu pedaide bidibo we bidi, dagego munu me te kibu hasa me ba dabe te kaneme dali me tulamu dao. Te kolesaga ebo habu mu selibao.
27 Bidigo ma wego te dąų wali bomai po bolobaso da, teda aga te Genuai Bidigo hani tomode munu me bidigobeo,” wali.
Te ofa ebo kibu mi pedai dage augwaligo te pris dabe mao wali po
28 Te Genuai Bidigo Mosesbolo waliyu,
29 te Israel we bidiba te po momainogo yali. Agai te tiwai po wai, “Bidigo te deli haliga pedelabo ofa sela aselama, agai te kibu pedai te Genuai Bidiba dolo dąį ilao, te aga ofa te dao,” wai dao.
30 “Te bidi aga digi te Genuai Bidiba ofa yabo nai kibu sesemainao. Te Genuai Bidiba maiabo kibu pedai dage e tiwai sesao, te kibu ili me kibu baugo mi tama dao. Tama te bidigo Genuai Bidiba ofa e tiwai ilao. Agai te kibu bau mi te nogo tolaluyu, te Genuai Bidigo gedude iba oba hogabo sę yao.
31 Tama nosali prisgo te alta siade te kibu ili ulao, tialima te pris augwa te kibu bau sao, te augwa tuabo nai dao.
32 Te kibugo dolo sągą dagego prisba mao, te olo dali maiabo nai dao. Te pedai badu te deli haliga pedelabo ofa eyu,
33 te prisgo te kibu kaneme me ili tego ofa ebo dao. Tama te ebo pris bidigo te dolo sągą somainao.
34 Genuai Bidigo digi te kibu bau me dolo sągą dage Israel we bidide selama, tama te kibu pedai dage si te pris dabeba mawai, te augwali Arongo hani dabe dao. Tama tialima, sesemane sogo nosali te pris dabego te ofa ebo nai pedai dage somainogo yao.
35 Te hasa pedai dage Genuai Bidigo digi sali, te dage we bidi dabego agaba ofa ebo nai dao. Te Genuai Bidigo te hasa pedai dage te Aron aga ogomani dabe daliba dąį ilama, te side agai augwali te pris sęba munama bidai dao.
36 Te side naga tama Genuai Bidigo te Israel augwaliba walama, augwaligo te ofa yali kibu pedai dage te pris dabe augwaliba mao po wali. Tama augwaligo te bomai po sesemane sesemane sogo wali pidubadi geąo,” te po wai dao.
37 Te tigidali po te siaba tigidali ulama dela silibo ofa dabego bomai po, te wit ulubo ofa dabe me, te sęgę sela sąbo ofa dabe me, te dobo kolesaga augwa dagede yali silimainu ebo ofa me, te bidi pris pedalumainogo ofa ebo me, te God dali deli haliga pedalubo ofa me, te tama ofa dabego bomai po dao.
38 Genuai Bidigo te bomai po dabe te Israel dabe te masigi kemi tǫ wa pai bulude bidali sogo, te bulu du Sainaide Mosesbolo te bomai po mawai. Te Godigo te Israel we bidi augwaliba te ofa yao po wali side, agai te bomai po dabe augwaliba mawai dao.