4
Nago Godigo po mu pusao
1-2 Timoti, te God de Krais Jisas si gedude eno nagebolo e moni sęgę yai po bomo elama wainogo ebao. Krais Jisas agai te tigidali we bidi, te bidibo ula elalubo bidi badi, te isali bidi dabe dali me po tų eyu dagalaibao. Te aga tǫba ma asiyu, tama tigidali bidi geduba pedalama, tama tuni bidi mu bidaibao. Tama tibaso, eno e sęgę yai po bomo elama nagebolo obao, nago Godigo po mu pusao. Tama te po odainu sisi elalubo bidi dabe ebaso, ma augwali sisi elalusiąbaso me, te homu eyu tagalao, te sesemane sogo nago te Kraisgo po bomo elama pusubo sę yao. Nago te augwali homuba te po eniyu, te augwali homu begelemainu te augwali hodolao. Augwaligo dwai sę ebaso, tama nago te pogo te dwai sę tagalabo po augwalibolo pusao. Nago te augwaligo Godigo kolesaga wali pomainu homu hodolao. Tama te tobage haniani sę eyu, sesemane sogo nago augwalide sę dua digi eyu, sębę polo isąyu tama augwali bugagia ola mao.
3 Magi baso meni, nosali te gasa sogo pedalaibao. Tama te sogo te bidi dabego Godigo mu po ola mabo odobo hagela yaibao. Odogobeo. Menio. Te augwa digi augwa homu kolesaga naga wali peyu, tama augwaligo te po ola mabo tisa bidi hauwa saibao. Augwaligo godolo ebo po odomainogo te bage saibao. Tama te po ola mabo bidi dabe augwaligo te augwali sali we bidi dabebolo Godigo po pusugobeo. Menio. Augwaligo te we bidigo godolo ebo po naga pusaibao. Te we bidi augwaligo olo te dini ebaso, te tibo po ola mabo bidi dabego te augwaligo olo te pogo kieibao.
4 Tama te we bidi augwaligo te mu po odobo tagaliyu, te tudiba munama, tama te haniani olo namu po waboba olo munama odaibao.
5 Tiali goli naga digi te polobo bidi tiwai bidisiąyu naga homu sesemane sogo bugagia tonaludao. Tama tiyu nago te sęgę tolao. Nago te bidi dabe augwalibolo te Godigo gesi dwagi yai po pusubo sę yao. Nago te we bidi dabe augwali tau sabo haniani sę elalubaso, te sę nago bugagia mu yao.
6 Magi baso meni, te ena isąma pabo sogo pąba yagasalio. Nago koneani, te polobadu te bidi dabe augwaligo te wain ąį gelama te Godibolo ofa mabo, te tiwai naga te eno kaneme gelabo sogo pąba yagasali.
7 Te Kraisde konealubo po dąų wabo bidi te usu si yainogo udabo tiwai sę elalubao. Te usu si yainu ena bugagia udawai dao. Megi da te dąį ilaliba ena mu sabolalio. Eno Kraisde konealubo po homugo dąų mu wai dao, te eno munu me tagalobeo.
8 Megi da te udabo dąį ilaliba pedalali bidigo genuai nogi yai namba te sisi elama ena tonalubao. Te genuai nogi sabo namba te tiwai yaibao: te Genuai Bidigo ena te doloba pai bidi nogi poaibao. Genuai Bidi aga te doloba pai po tų ebo bidi jas, tama te genuai sogo pedalubode agai te doloba pai bidi nogi enabolo mawaibao. Tama agai enaduba delibolo naga te me magobeo. Menio. Te aga hania pedalubo suainu godolo homu ebo bidi dabe tigidalibolo te doloba pai bidi nogi mawaibao.
Po silagasu wabo po
9 Nage asesą tama nage ena bidibo madi polo asao.
10 Te bidi Demas agai ena taga palio. Agai te megi tǫde elalubo kolesaga godolo mu elama, tama agai ena tagalama te Tesalonaika hanuba pai. Te Kresens aga te Galesia tǫba pobadi yali, tama te bidi Taitus me te Dalmesia tǫba pai dao.
11 Luk deli naga ena dali bidibao. Nago te Mak selama, tama odasa nage dali asao. Agai te bugagia te sęde ena tau somainu usu yaibao.
12 Eno te bidi Tikikus te Efesus hanuba tagala palai dao.
13 Nage enaba asobadi tama nago te eno kedau sogo gudubo bobage ugwa sela asao. Te ugwa eno te Troas hanude tagalali, te bidi Karpus aga bede munalubao. Tama tede muani buku dabe me sao. Tama bugagia dua mu nago te eno sipsip wali dabego nigali te buku dabe sabo te homu munu me gegeda peyu tagalamu dao.
14 Te bidi nogi Aleksander, agai mone ge sabo sę da te haniani nai te aga kapago nigibo bidi, te bidi agai enabolo dwai sę mu ilali. Nosali te Genuai Bidigo agabolo te dwai dene wei ponoyu, te aga yali dwai kolesaga usu nama te dene mawaibao.
15 Nage me nage te bidi Aleksanderde dua dao, bugagia tonaluao. Agai bomo mu elama, tama te dago ola mabo po mu aiyaba elaluainu eyu, tede boi bidi homu yai dao.
16 Te ena ede Rom hanude bidiyu, tama te hasia sogo eno te po tųde te po wei ponani sogo te bidi me deli ena tau sabo po me wagasobeo. Menio. Tigidali bidi augwaligo ena tagalali. Eno homugo te augwaligo te dwai sę te Godigo homu kone me elamuo, wei ponamuo.
17 Tiali goli Genuai Bidi aga ena dali bidaluyu, tama enabolo bomo mani. Eno te Godigo po sese pusubo te usu mu emainu, tama te agai po odisąwai hani tigidali augwaligo odomainogo eyu, agai bomo enabolo mani. Tama augwali te bidi ela tubo dwai hasa laion tiwai bidiyu, tama augwaligo ena ela muidali weyu Godigo ena tau selama dwagi yai madiba muanio.
18 Te augwaligo dwai kolesaga tigidali ena dali yainu ebo, tede te Genuai Bidigo ena tau selama, tama agai ena ma sai hagede eyu, tama ena oda selama, te aga bomo elalubo bulu te dagaluba sese muaibao, aga we bidi tonalubo sę ebo madiba. Te genuai nogi me bomo te agade sesemane sogo mu bidada peyu, bidada pomainao. Mu dao.
19 Nago eno te siade da wali po te we Prisila dali, aga bidi Akwila si dali me, te Onesiforus me te aga we wai puluba augwalibolo te po wao.
20 Te bidi Erastus te Korin hanude me bidibao. Tama Trofimus te gasi elalubaso, tama eno aga te Miletus hanude tagalama bidibao.
21 Nage asesa polo asiyu, tama te kedau eyu dwai wali asobo sogo asisąbadi nage eba polo sabolao.
Te bidi dabe Yubulus me, te Pudens badi, te Linus me, te we nogi Klodia me, augwaligo te siade dao po nagebolo ola tolobao. Te gasa ede bidibo ama dede dabe tigidaligo me te po ola tolobao.
22 Eno homugo te dago Genuai Bidi te nage dali bidao. Te agai olo mu tau sabo wiegi yai kolesaga te dage dali bidao. Te tama dao.