Yaka abwe sauga etega tohouwa enuna hi nem elau ge no wasa hi pem hi ba, “Topowon, un Libai ge Isileli bolauiliyau hi gewi iyaka avaliyau boda getogal bolo hi minaa labelaa natuliyau meluyowau hi alolon, yaka hi olak wali pagan bwaibwaikikinina ona elal. He tohouwa heliya te nak ya ana toginoginol houwan.” Sauga wasa o ya hago, o kaliko ya kukuleli yaka amnau i pulowan hot ge ya lomwautuutu lau* bilibiliya. Inoke ya miola o ana siga kokoyavi powon ana sauga. (puna 1-4)

Kokoyaviya powon ana sauga elana ya lut, ya na ya loepwakoku ge ya awanun Yehoba elana ya ba, “No Yabowaine, ya puluwawi nabi, kaiwena i telipunaa tubumeyau wali sauga elana ana siga sauga ya, ha gegi nabi eliyam. Wama gegi o kaiweliya, boda getogal wali kin hi apapanak-agima ge ha mipuluwawi wali logugui gabulanaa. (puna 5-7)

“Yaa owa u atilomwan-agima inoke ama enuna ha mwal iyahe ha minamina. He wam nunuwana u pamasal eliyama Pesiya wali kin mataliyaa: u pagasisi-agima yaka wam Limi ha tal pasikal, ge u palibu-agima ha mibubun Yuda ge Yelusalema elal. He sauga ya nige wama ababaaba etega i gagan, kaiwena toto o enaa wam logugui ha leke, toto i ba, ‘Labi toto abwe nuku minaa gamagaliliyau wali pagan i bwaikikin, inoke bahi alomiyau nuku pepealalolon-agimiu.’ (puna 8-12)

“Ama wama gegi i bwata! Wama gegi o bosowaina ana lahi ni bwata, yaa lahi toto u pem nige i bwabwata, yaka ama enuna ha mwal iyahe ha minamina. Yaka sauga ya wam logugui ha leke al! Tab nasi nu huga hot ge nu apapanak-agima yaka nige al etega naha mwamwal? Aloma wama gegi ama iyahe matamwa!” (puna 13-15)