30
Deibid Amaleki I Pakokovel
Deibid alonau wana hevalau hi nawanawa, yaka lan etonina elana abwe hi vin Siklag. He mulaa abwe hi vin, Amaleki iyaka hi tuk Siklag, yaka panuwa hi ton. I ola al, yowau ge wawayau gegewel hi libil avaliyau hi egon. Inoke sauga Deibid alonau wana hevalau hi vin, hi pwawa topihigelgel enuna iyaka panuwa hi ton yaka lagoliyau ge natuliyau hi ahel egonagil. He gamwaliyaa Deibid lagonau labui, Ahinowam ge Abigeil. Yaka nuwaliya i nak ge hi kahin nabi. (puna 1-5)
6 I pulowan hot Deibid eliyana, kaiwena wana hevalau hi nuwaleyan hot lagoliyau ge natuliyau kaiweliya yaka hi ba, “Deibid ta loipati ni aliga.” Yaa gasisi i pwawaa Yehoba wana Yabowaine elana, yaka atena i matuwa.
7 Deibid i baek topowon Abaiyada elana i ba, “Am holahola ipod u galoi ge u nem elau.” Inoke i galoi ge i nok,
8 yaka Deibid i nel Yehoba elana i ba, “Tokaluoyaoya ya na takel o bahiwa? Tab na kukuhikagil o nigeya?”
Anana Yehoba i lahe i ba, “E, nu takel. Tunahot nu kukuhikagil ge bolo hi libil nu pwamwalil.”
9-10 Yaka Deibid alonau wana hevalau ali gewi sikis handeled (600) hi nok. Sauga hi vin sinawel Besol, ali gewi tu handeled (200) hi minaa to, kaiwena tuwaliya i aliga nabi, nige bosowailiya opopwina nihi kalapanet-an ge nihi mwena ha labi etega al. Yaa Deibid alonau wana hevalau ali gewi po handeled (400) hi petaki vevehe tokaluoyaoya eliyaa.
Yaka abwe Itipita gamagalina etega hi pwawa. Deibid wana wasa i pek i ba, “Nau Amaleki tonowakina etega wana totuwalali loloyowanina. Ya kasiyebwa inoke hi eguluwagau. He valila panuwa Siklag ha ton.” Yaka Deibid i neli i ba, “Tab nu nulau ta na eliyalil?” Inoke i talam. (puna 11-15)
Yaka i nulil hi na Amaleki hi pwawal hi anan, hi imwim ge hi yaliyaliyaya. Yaka hi tuk elal ge hi gulil. Inoke gamagalau ge bugubugul gegewel bolo valila Amaleki hi ahel egonan, Deibid i ahel pasikalil. I ola al, Amaleki wali sipi, goti ge bulumwakau i bugulagil al. (puna 16-20)
Yaka Deibid ge wana hevalau hi sikal sinawel Besol, yaka avaliyau bolo valila hi eguluwagiliya o hi pwawal. Yaa bolo Deibid alonau hi nok, enuna sisigal ge nanakil hi ba, “Nige hi totoulilima, inoke bugubugul bolo ha oem haveyana, nige etega naha pepek elal.” (puna 21-22)
23 Analiya Deibid i lahe i ba, “Taliwau, bahi nuku oola! Ku kite hauna Yehoba i pem elala! He iya i matahikagila, yaka ala topihigelgel bolo valila hi kaluoyaoya elala, i telel nimalaa.
24 Inoke nige bosowaina anamiu naha hago! He gamagal toto i misikal bugubugul i matahikan ana gabom ni olaolaek gamagal toto i na i lohaveyan ana gabom. Ali gabom ni olaolaek ya.”
25 Inoke Deibid logugui i pagasisi i ola to, i tabwa Isileli ali logugui ana siga lan ebe.
Sauga hi sikal Siklag, yaka bugubugul bolo hi oem haveyana, enuna i patuna labi Yuda ana tonowakau elal, bolo valila hi labe sauga iya ge wana hevalau hi lou nawanawa wali labiya. (puna 26-31)