☰ Gina Ngü 14
14
Dene ngü ka Abarama ake miri ka Sodomo
1-5 Ta gbü wü re la, gara mere miri ta ladü de ïrï ye Kedora-Lawomera. Ah ngbü ka-ye ta to kpa fügö, gbü tö ka wü Elama. Ah de mere kpeke miri, de mere bi wü kpara esa lö ye. Fü Kedora-Lawomera aza wü marajümïya ka-ye, anü de ewü, atï gü gbü nzö mere bi nguwa wü kpara, baka wü kpara ka *Sodomo,* Gomora,† Adema,‡ Zeboyima,§ bete wü Bela.* Fü Kedora-Lawomera ayia afa wü kpara la, adu angbü gbü nzö ewü ꞌburu de wazi. Fü ah ato rïrï fü ewü, de wüh di eto mere bi jiase fü ni, te nga wü re ꞌburu. Fü wü kpara la ale, akpo angbü eto jiase la, teka wü re nzükpa de füh-ye ꞌbasu. Fütanga re nzükpa de füh ye ꞌbasu, fü nguwa wü miri de ꞌburuve, te Kedora-Lawomera ngbü gbü nzö ewü ne, adu ace ka-wü kpo da eto jiase fü Kedora-Lawomera. Fü re afü biringbö.
Fütanga re biringbö la, fü Kedora-Lawomera ayia amala ngü, agü ba, “Te di bala, ni ena ato kuru te wü kpara te ewü gü ba, ‘Ani le ngü ka-ni tïne de,’ ne.” Fü wü Kedora-Lawomera ayia abiti te-wü de wü gara wü miri bata, teka de wüh le ta-ngü te ni. Wü miri la ta miri ka wü Sïnara† de nda wü Elasara,‡ bete nda wü Goyi.§ Fü ewü adu amaka wazi, teka wü mene wü miri, de te ewü gü ba, “Ani le tïne aje rïrï ka Miri Kedora-Lawomera de,” ne. Fü ewü ayia de wü marajümïya ka-wü la, anü atï de gü gbü nzö nguwa wü Refe,* de wü Zuza,† de wü Eme,‡ ayia aza esaka ewü. 6 Fü ewü adu kpah, atï de gü gbü nzö wü Oro, kpa füh da.§ Fü ewü aliki wü Oro zalü akoro di kpa gbü ndu, agbü Eleparana. Fü ewü afa wü Oro. 7 Fü ewü adu kpah anü agbü Ene-Misapata,* afa wü Amaleke, de wü Amora† kpah bala.
8-9 Ta te miri ka Sodomo, de wü gara wü miri gbü nga nzö sü la, je ngü la bala, fü ewü ayia abiti wü marajümïya ka-wü, anü akoro gbü mere sü tele tele de ïrï ye Sidimi.‡ Fü ewü areke te-wü sela, teka atï de gü gbü nzö wü Kedora-Lawomera.
10 Fü wü Kedora-Lawomera ayia asö gü, afa wü miri ka Sodomo de wü bu ye la ꞌburu. Fü wü miri ka Sodomo ayia de wü bu ye, auru de woro. Fü miri ka Sodomo ake miri ka Gomora akpe atï gbü wü cudu, te ewü cu fa sü, angü angbe cögbörö wü cudu fa ta gbü sü la sü. Fü wü gara wü bu wü ayia akpe nda-wü to kpa enzö mere gümba, aküwa ka-wü.
11 Fü wü marajümïya ka Kedora-Lawomera ayia arï gbü wü mere kötï ka Sodomo ake Gomora, akö wü e ka-ewü, de wü gara kpara gbü nga ewü ꞌburu. 12 Fü ewü ayia azoro kpah Loto, te di de ye enga ni ye Abarama, de wü e ka-ye ꞌburu, angü engu ra kötï ta gbamari ede Sodomo. Fü ewü ayia anü sü de engu, de wü e kaka-na la ꞌburu.
13 Ta gbü wü lakï la, Abarama ngbü ta la fï esa mere rü ka Mamare ne. Wü Mamare ngbü ta kpah gbü sü la, de wü di enga ni ye ꞌbasu. Ah de wü Esokole ake Anera. Nguwa wü Mamare ta de Amora. Nguwa Abarama nda de *Ebere. Nguwa wü Mamare nzö ta ngüte de wü Abarama.
Fü gara kpara ta te kpe küwa gbü gü la, ayia akoro amala ngü fü Abarama, gü ba dene, 14 “Wü Kedora-Lawomera koro de gü, siti wü sü ka-ani eyi ꞌburu. Wüh zoro Loto, nü sü di kpah eyi.” Te Abarama je ngü la, fü engu ayia ꞌduwa, abiti wü komoko ka-ye, te ewü wu ngü ka gü kpah kpo. Fü ah adu kpah abiti wü vüngüte ka-ye ꞌburu. Fü ewü ayia, baka wü kpara kama bata nzükpa de füh ye ꞌbajena la (318), anü afa nga wü Kedora-Lawomera, zalü akoro di kpa gbü Dana. 15 Te wü Abarama nü koro tete kpala, fü ah ayia afï nga gara mani. Fü ah ayia aye süka wü kpara ka-ye la, gü ba, “Wü gara fü nda-wü bane, de wü gara fü nda-wü to bane.” Fü ewü ayia gbü biti, anü atï de gü gbü nzö wü Kedora-Lawomera, agüka ewü gbü ïrï-to. Fü wü Abarama ayia asö gü, afa ewü ka. Fü ewü ayia aliki ewü, anü akoro de ewü nengete kpa gbü Oba.§ 16 Fü wü Abarama akö wü e de esaka wü Kedora-Lawomera, de ta te ewü kö gbü gü ne ꞌburu. Fü Abarama adu kpah aza Loto, de wü gara kpara, ta te wüh zoro ewü, de wü würüse ne ꞌburu, adu di.
17 Te Abarama ngbü edu tete, fü miri ka Sodomo ayia anü amaka Abarama kpa te kaje, ede Yerüsalema.* 18 Miri ka Salema ta ladü de ïrï ye Meleke-Sadiki. Engu ta de *mürü gele ka Mere Me. Fü Meleke-Sadiki ayia aza e-mazü bete fï *vinü, akoro di, ato fü wü Abarama. Fü ewü ayia azü. 19 Fü Meleke-Sadiki ayia asü ngüsü gbü nzö Abarama, amala ngü fefe, gü ba dene, “Ma ngbü eku gba fü Mere Me, te o tö ake kpï ne, de ah to wazi fü mü. 20 Ma gbo nga ïrï Me, angü ah to wazi eyi fü mü, fü mü afa wü vügü ka-mü di.” Fü Abarama ayia aza mere bi wü e, de te engu kö gbü nga wü Kedora-Lawomera ne, aye süsüka ba e nzükpa. Fü ah ayia aza bibiri na, esüka wü nzükpa la, ato fü Meleke-Sadiki te ïrï Me, baka tari-e, teka agbo nga ïrï Me di.
21 Fü miri ka Sodomo ayia amala ngü fü Abarama, gü ba dene, “Ye za du wü e, ta te wü vügü ka-ani kö esaka ani la, eza fü ye. Ni ele nda-ni bü wü kpara ka-ni, de ye lügü ewü fü ni.” 22 Fü Abarama alügü ngü fefe, gü ba dene, “Ye za wü kpara ka-ye eza, de wü e la ꞌburu. Ni le aza wü e la nda-ni de, angü ni kïna kïna eyi, de ïrï Mere Me, te o tö ake kpï ne, 23 gü ba, ni tï aza e ꞌduwa kpo de. Te ah ena adi kpah mene engu, te di mba cüküꞌdaye la, ni za nda-ni kpah de. Angü ye ena agü ba, ‘Ni to wazi fü ni, Abarama, me-ni.’ 24 Ni za nda-ni eyi bü wü e-mazü, de te wü kpara ka-ni la zü te kaje. Wü vüngüte ka-ni, de te ani di de ewü ne, wüh za nda-wü e eza.”
Dela ngü ta te Abarama mere, te engu küwa Loto esaka wü Kedora-Lawomera, te wüh zoro engu tete gbü gü ne.
* 14:1-5 Ïrï miri ka Sodomo ta de Bera. † 14:1-5 Ïrï miri ka Gomora ta de Birasa. ‡ 14:1-5 Ïrï miri ka wü Adema ta de Sinaba. § 14:1-5 Ïrï miri ka wü Zeboyima ta de Semebere. * 14:1-5 Wüh du ngbü ta eï Bela kpah Sügara. † 14:1-5 Ïrï miri ka wü Sïnara ta de Amurafera. ‡ 14:1-5 Ïrï miri ka wü Elasara ta de Ariyoka. § 14:1-5 Ïrï miri ka wü Goyi ta de Tïdala. * 14:1-5 Wüh mere gü de wü Refe ta kpa gbü Asetorata-Karunema. † 14:1-5 Wüh mere gü de wü Zuza ta kpa gbü Ama. ‡ 14:1-5 Wüh mere gü de wü Eme ta kpa gbü Save-Kïratema. § 14:6 Ïrï da ka wü Oro ta de Seyira. * 14:7 Wüh du ngbü ta eï Ene-Misapata kpah Kadesa. † 14:7 Wü Amora ngbü ta agbü Acacona-Tamara. ‡ 14:8-9 Mere yï-ngu du gbala sü tïtïne eyi füh mere sü tele tele la. § 14:15 Oba ta gara ꞌbaranga ede Damaseke edebu sü kpala. * 14:17 Sü la ka-ye kpa gbü mere kpanguwa ka Save.
☰