3
Bibi na pipigona mine Salemo
1 Tamtamaigu, lisa eau ma mapigogoi ete na ade ane amutou tomane eau ade ane sou a vanua sou ogomuli a Maolona Nunu. Eau ade ane amutou tomane sou a vanua sou ogomuli a lilomumuguna me sou e selebanini mine Krais.
2 Eau masusi e amutou. Eau ma bilii ete amutou a gona inani i sagali, vuna maido amutou saboa masusulu a gualena gona inani i sagali. Me seidei tamai amutou saboa masusulu,
3 amutou saboa nana ogomulimuli a lilomumuguna. E, lilogegeluna ane tamtamaimu ma maisinoana, ei saboa nana ne amutou. Ma inigogona amutou goligoli ie, ede a inigogona mina lilomumuguna. Sou a inigogona mina magamaga moni.
4 Bibi tasa ei veivei, “Eau mine Pol.” Me tasa lou ei vei, “Eau mine Apolos.” Na inigogona maido amutou maite e amutou tomane a vanua mina magamaga.
5 Amutou damutale kube. Apolos ei e sei? Eau e Pol, eau e sei? Amilu a bibi na pipigona moni. Bibi Taula ei bilii e amilu a pipigona tastasa, me na pipigona mine amilu ieli amutou silimuli e Krais.
6 Eau dani a vuavua na gona inani. Apolos ei bilii e sou a nanu. Moni e Salemo ei mapale a gona inani.
7 Maido ma bibi ei dani a vuavua ma bibi ei bilii a nanu, sulu a bibi sabubu. Salemo ei mapalele a gona inani, ei tasa moni ei isa a aisa buo.
8 Bibi ei dani a vuavua ma bibi ei bilii e sou a nanu, pipigona mine sulu i tasa moni, tastasa mine sulu ni guale a mapa mapigogoi a pipigona sulu goli.
9 Amilu maitama a pipigona mine Salemo, me amutou tomane a mauma ma luma minei.
Bibi na pipigona mina viepiluna kinaka ei tomane a bibi na tinigena luma
10 Na dinodo mine Salemo eau palea tomane a bibi na tinigena luma ei isa a muadana doana sele, me eau tau iiti a vatu vuso mina tinigena luma muata ne ei. Ma bibi tasa sea ei tige a luma muata na vatuvatu eau tau odo, moni eitou tastasa neitou tilale kube a inigogona mina tinigena luma.
11 Amutou muada, Salemo ei tauosi e Iesu Krais tomane a munugana vatu mina luma, ma bibi tasa boa i mapigogoi ni tau a vatu tasa sea mina tinigena luma muata ne ei.
12 Ma ilala vanunua sou tige a luma muata na vatu odo, sanii ne sou tige a gol, me sanii ne sou tige a silva, me sanii ne sou tige a vatu malasolosolo mapane sou i sae sele, me sanii ne sou tige a obu, me sanii ne sou tige a unei, me sanii ne sou tige a amo na vit.
13 Io mulimuli a pipigona mina vanua vuso ei ni palea muada na malada e Salemo ei tau mina vavasana ane sou a vanunua ma tavivine. Malada do ei ni palea tomane a oavi, ma oavi iodo ei ni tove a pipigona mina vanunua vuso tastasa, mina pogevutina pipigona mine sou ei doana ue boa.
14 Mane a luma minei ei ma lulu oto, io a bibi na pipigona do ei ni guale a mapa.
15 Moni mane a luma mina bibi na pipigona tasa ei lulu vuso, io a pipigona vuso mina bibi iodo ei ni buale. Moni a bibi na pipigona oto ei ni ma buale oto, ei ni muina tomane a bibi eitou gualeliu na oavi.
Amutou oto amutou a luma mine Salemo
16 Amutou oto amutou a luma mine Salemo, ma Nunu mine Salemo ino lilo ne amutou. Nane amutou ma muada oto a golu ie?
17 Mane a bibi tasa ei toegegeli a luma mine Salemo, io Salemo ei ni toegegeli a bibi iedo. A luma mine Salemo ei maolo, ma luma do, ede amutou moni.
Neitou ma masalailai lei a vanunua
18 Amutou ma aualala lou ane amutou oto. Mane a bibi tasa balivua ne amutou ei damutale maido, “Eau isa a muadana doana sele,” io puiale ei ni palea a vautana bibi pala, maido me ei ni palea a bibi i muada sele.
19 Vuna maido, a muadana doana mina magamaga ie ei tomane moni a vautana inigogona na matane Salemo. Laulau mine Salemo ei ade a golu ieli maido, “Vanunua sanii sou damutaletale a matamatana inigogona mina toegegelina vanua sanii, moni e Salemo ei toe a inigogona mine sou i toegegeli e sou oto.”
20 Ma Laulau mine Salemo ei ade tamai maido, “Bibi Taula ei damu i a damutatalana mine sou a vanua na muadana ei golu sabubu moni.”
21 Maido me namutou litase a inigogona mina masalaina bibi. A golugolu vuso ei mine amutou.
22 Pol, ue Apolos, ue Pita ma magamaga ie, ma maulina, ma minate, ma golugolu eili seidei ma golugolu ni palea mulimuli, sou vuso mine amutou.
23 Me amutou mine Krais. Me Krais ei mine Salemo.