14
Sou a buobuo sou maiademuli a valiputene Iesu
(Mat 26:1-5; Luk 22:1-2; Ioa 11:45-53)
1 Tauluna malada lua, Malada na Asuleletasena me a Malada Buo mina ulalu a is boa ni palea. Me sou a munuganuga mina prist me sou a vanua na muadana binea sou vei maido, “Neitou auala ane Iesu me neitou lapitole ei me neitou valipute ei matina?”
2 Sou vei, “Eitou ma goligoli lei a inigogona ieli na malada buobuo. Dae ne sou a vanunua ma tavivine sou ite me ne sou sinoa me ne sou mailisi a maubina.”
Tavine tasa ei singi a nanu manginangina na letene Iesu
(Mat 26:6-13; Ioa 12:1-8)
3 Iesu ei ino na aubu e Betani na luma mine Saimon, ei a bibi tasa lisa ei isa a sinobe a kolokolo. Ilala ei aaniani, tavine tasa ei asuale ei. Tavine dolo ei iududi a malasana taogo na vatu tasa, a nanu manginangina sele ino i, ma mapana i oata oto sele. Me ei valipole a taogo dolo mei singi a nanu manginangina do na letene Iesu.
4 Moni a vanunua sanii ino do sou ite ma lilone sou i mamau i. Me sou maiadeade balivua mine sou oto maido, “Posa matina ei mapuli sabubi a nanu manginangina do?
5 Mane eitou masosove ieli, eitou mapigogoi neitou guale a vatu denarii savulu sobo tolu ma gegena me neitou bilii e sou a kapelabe.” Me sou sinoa ane tavine do.
6 Moni e Iesu ei vei, “Amutou litase a tavine de. Posa matina amutou bilii e ei a mavaana? Ei goli a inigogona kubaana sele usinani minau.
7 Taliuliu sou a kapelabena vanunua ne sou muina pilu e amutou. Sei malada amutou isa a masagana buloine sou, de ne amutou buloi e sou. Moni eau na ma malu pilu oto e amutou taliuliu.
8 A golu a tavine do ei mapigogoi ni goli, ei goliosi. Ei tauosi a nanu manginangina na vovogu mina masusuluna peilaine eau.
9 Eau vei patotona le amutou, na aveavena magamaga vuso sou asuale me sou malongo a malongolongona kubaana, ne sou ade tamai a golu a tavine ieli ei goli, me ne sou damutaletale ei.”
Iudas ei adegatuna ni bilii e Iesu usino na limane sou a vanua buobuo
(Mat 26:14-16; Luk 22:3-6)
10 Na malada iedo, Iudas Iskariot, ei a bibi tasa mine sou a disaipel savulu tasa timana lua, ei asu usino ne sou a munuganuga mina prist. Ei kale ni bilii e Iesu usino ne sou.
11 Sou longesi me sou mongemonge. Me sou ade ivu ne sou bilii e ei a vatu sanii. Seido Iudas ei soke a punogena vea mina biliine Iesu usino ne sou.
Iesu ei aani pilu e sou a disaipel
(Mat 26:17-25; Luk 22:7-14; Ioa 13:21-30)
12 Munugana malada mina Malada Buo mina inani na ulalu a is boa ei palea. Na malada iedo sou valiputepute a natatuna sipsip mina inani. Me sou a disaipel sou vei le Iesu maido, “Oo kale ne amiteu asu usiva me namiteu masusulu a gona inani oo no ani na Malada na Asuleletasena?”
13 De Iesu ei peltase a disaipel lua usino mei vei le sulu maido, “Amulu asu ulilo na aubu buobuo. Me a bibi tasa ei tabulebule a taogo na nanu taula, amulu ni poge ei na vea. Amulu ogomuli e ei.
14 Mane amulu ite ei gali ulilo na luma tasa, amulu vei ana tamana luma maido, ‘Bibi na matetengina ei tagu, “Vilo minau ino iva ne eau pilu e sou a disaipel minau namiteu aani a inani mina Malada na Asuleletasena?” ’
15 Me ei ni maite e amulu a vilo tasa buo ino muata, a poso ma niugugu ma golugolu ino masusuluosi. Amulu masusulu a inani mine eitou na vilo iedo.”
16 De a disaipel sulu asu sibitala na aubu buobuo do, me su ite a golugolu vuso ino tomane Iesu ei vei le sulu. Me sulu masusulu a gona inani.
17 Matavilioliona Iesu ei sibitala pilu a disaipel savulu tasa timana lua.
18 Sou ugu me sou aaniani, me Iesu ei vei maido, “Eau vei patotona le amutou, bibi tasa balivua ne amutou ei ni bilii e eau usino na limane sou a vanunua sou butuale eau. Ei a bibi tasa ei aani pilu e eau ie.”
19 Sou a disaipel sou longe a inade maido, lilone sou i mavaa, me sou tastasa sou soke a tinagine ei maido, “Nane oo veivei eau, io?”
20 Iesu ei vei le sou, “A bibi iedo ei e tasa balivua ne amutou savulu tasa timana lua. Ei a bibi tasa ei guale a ulalu mei tau ulilo mina taogo pilu e eau.
21 Ivu, e Natuna Bibi ei ni mate tomana Laulau mine Salemo ei veiosi ve ei ni mate. Moni maula bibi iedo ei bilii e Natuna Bibi usino na limane sou a butu. I puiale tinana ni ma maalepose ete ei.”
22 Sou saboa so aaniani, me Iesu ei guale a ulalu tasa, mei toledadangi e Salemo mei lee mei bilii e sou a disaipel. Me ei vei, “Amutou guale. Ieli ei a mainigu.”
23 Me ei guale a taogo na vain tasa mei toledadangi e Salemo mei bilii e sou. Me sou vuso sou inu.
24 Me Iesu ei vei le sou maido, “Ieli ei a dalagu ni toesagali a magilipiluna pilu e Salemo. Eau singi mina buloine sou a vanunua ma tavivine papaina.
25 Eau vei patotona le amutou, eau na ma ini ete a vain lou mapigogoi a malada eau na ini a vain alaba lilo na niitealalena mine Salemo.”
26 De sou ale a inala tasa, me sou ilisitase a aubu buobuo me sou asu usino na loena e Oliv.
Iesu ei vei maido Pita ni lametase ei
(Mat 26:31-35; Luk 22:31-34; Ioa 13:36-38)
27 Iesu ei vei le sou a disaipel minei maido, “Silimulina mine amutou vuso ni bosa, vuna, a Laulau mine Salemo ei isa a inade maido,
“ ‘Eau na valipute a bibi na itealalena,
me sou a sipsip ne sou oava maisaba.’
28 Moni eau na ilisiliu, mea na muga pala ane amutou usino ne Galili.”
29 Pita vei le ei, “Muina, mane a silimulina mine sou pilu e sou a vanunua sanii i bosa me sou veletase oo, moni eau na ma asutase ete oo.”
30 Me Iesu ei vei lei maido, “Eau vei patotona lio, seidei na lodo ieli, a kuleko ei saboa tangi malua, oo no vei matolu maido oo ma muada oto e eau.”
31 Moni e Pita ei ade sagali lou, “Muina, mane eau na mate pilu e oo, eau na ma mapigogoi ete na vei maido eau ma muada oto e oo.” Me sou a disaipel sou goli a inade tasa moni.
Iesu ei kaka ne Getsemani
(Mat 26:36-46; Luk 22:39-46)
32 Iesu pilu e sou a disaipel sou asu sou sibitala na avena tasa sou tole e Getsemani. Me Iesu ei vei le sou maido, “Mu ugu na. Eau kale na kaka.”
33 Me ei guale e Pita me Iemus me Ioanes, me sou ogomuli e ei. A lilona i mavaa, mei somiale gegeli sele.
34 Me ei vei le sou maido, “Lilogu i mavaa mamau sele, bisii moni eau na mate. Amutou muine amutou nani me mu ulago kuba.”
35 Me ei asu sapa usino, mei totopatulu na magamaga mei kaka maido, mane a vea tasa ino, ei kale a matailala odo ni asuleletase ei.
36 Ei kaka maido, “Aba, Ouma, oo mapigogoi no goli a golugolu vuso. Eau kale no tauleletase a mavaana minau ie. Moni oo ma ogomulimuli lei a masagana minau. Boa. Oo ogomuli moni a masagana minio.”
37 Me Iesu ei veteliuale sou a disaipel tao tolu, mei ite sou ngolo. Me ei tagi e Pita maido, “Saimon, o ngolo, io? O ma mapigogoi ete no ulago mapigogoi a maduna matailala tasa, io?
38 Amutou ulago me mu kaka. Dae a tinovo ni palea le amutou me ne amutou bosa. Ivu, lilone amutou ei kale ni goli a golu, moni a vovone amutou ei ma sagali oto.”
39 Me Iesu ei asu lou mei goli a kinaka tasa lou tomane ei goli palesi.
40 Me ei veteliu lou usino ne sou a disaipel mei ite sou so ngolongolo, vuna, matane sou i mavaa sele. Me na ilala ei toleluti e sou, sou ma muada oto ve ne sou goli a sei inade usino ne ei.
41 Mulimuli Iesu ei veteliu matolunai, mei vei le sou a disaipel maido, “Amutou manoa me mu ngolongolo, io? Ei mapigogoiosi. A ilala i paleasi, me seidei sou bilii e Natuna Bibi usino na limane sou a vanua na sinusu.
42 Amutou ilisi, neitou asu. Mu ite, a bibi ei kale ni bilii e eau usino na limane sou, ei diviosi.”
Iudas ei bilii e Iesu usino na limane sou a butu
(Mat 26:47-56; Luk 22:47-53; Ioa 18:3-12)
43 Iesu ei saboa adeade, saga e Iudas, ei tasa mine sou a disaipel savulu tasa timana lua, ei asu maino. Abuna vanunua taula sou asu pilu e ei, me sou lapitole a viso ma butu. Sou a munuganuga mina prist me sou a vanua na muadana binea me sou a vanua buobuo sou peltase sou usinani.
44 Bibi ei kale ni bilii e Iesu usino na limane sou, ei veiosi le sou a matailala tasa maido, “Eau na gamumi a galena bibi tasa. Bibi iedolo e Iesu. Ne mu saavi ei me mu maasi ei usino.”
45 De Iudas ei sibitala mei asu asi usino ne Iesu, mei vei, “Magiligilina.” Me ei gamumi a galena.
46 Me sou sautole e Iesu me sou saavi e ei.
47 Tasa mine sou a disaipel i magiligili odo, ei lapuale a viso minei mei vali a bibi na pipigona mina mapana prist mei uti a tulina me a tulina i pu.
48 Me Iesu ei vei le sou maido, “Amutou guale a viso ma butu, me mu asu usinani mina saavine eau, tomane amutou kale ne mu saavi a bibi na paaalina tasa, io?
49 Maladalada vuso eau pilu e amutou lilo na luma mine Salemo, me eau matetengi e sou a vanunua ma tavivine, amutou ma kale ete ne mu saavi eau na malada iodo. Moni muina, inade ino na Laulau mine Salemo ei ni palea ivu.”
50 Me sou a disaipel sou ilisitase e Iesu me sou oava.
51 A bibi alaba tasa ei ogomuli e Iesu usinani, ei avisobe ei a malo keakea tasa. Me sou saavi ei,
52 ei lubetase a malo keakea do mei iava a aina moni.
Iesu ei magili na matane sou a vanua na toebilelesina inade
(Mat 26:57-68; Luk 22:54-55, 63-71; Ioa 18:13-14, 19-24)
53 Vanunua sou saavi e Iesu me sou maasi ei usino na luma mine mapana prist. Me sou a munuganuga mina prist me sou a vanua buobuo me sou a vanua na muadana binea sou viepilu.
54 Pita ei ogomuli e Iesu usino, moni ei ino bulago sapa. Ei asu ulilo mina bigomu na luma mina mapana prist. Me ei ugu pilu e sou a papai mei amimilu na oavi.
55 Sou a munuganuga mina prist pilu e sou a vanua na toebilelesina inade, sou toleale a vanunua sanii usinani ne sou veipale a inigogona vuso Iesu ei goli. Sou kale ne sou poge a sinusu tasa Iesu ei goli i mapigogoi ne sou valipute ei, moni sou ma poge ete.
56 Vanunua papaina sou ubi ei a inadena aualana, moni a inade ne sou i ma tasa moni oto.
57 Ma vanunua sanii sou magili me sou auala ane Iesu a inade maido,
58 “Amiteu longe ei vei maido, ‘Eau oto na lope a luma mine Salemo sou a vanunua so tige a limane sou. Mulimuli na malada tolu eau na mamagili lei tasa sea, moni eau na ma tige ete a limagu.’ ”
59 Moni a inade sou goli iedo, ei tamai maisaba mei ma tasa moni oto.
60 De a mapana prist ei magili na matane sou mei tagi e Iesu maido, “Oo ma kale ete no adeliu a inade tasa, io? Inade sou ubi e oo do i matina?”
61 Moni e Iesu ei asebuu moni, mei ma adeliu oto a inade tasa usino ne ei. De a mapana prist ei tagi lei e ei, “Oo Krais? Oo e Natune Salemo oata oto sele ue boa?”
62 Me Iesu ei vei, “Iede eau moni. Me ne amutou ite e Natuna Bibi ni ugu na limane Salemo e gata, ei isa a sagagalina buo, mei ni asu usinani pilu a ausa na langi.”
63 Ma mapana prist ei singe a kinainai minei oto mei vei maido, “Neitou ma tolealale lei a vanunua sanii lou ne sou vavasa a bibi ie. Boa.
64 Amutou longesi, ei salaitavole e Salemo. Amutou damutale neitou goli a sava usino ne ei?” Me sou vuso sou vei maido, “Ei isa a sinusu, ei ni mate.”
65 Seido a vanunua sanii sou soke a apisosoline ei. Me sou papalesobe a matane ei a malo me sou ubi ei, me sou vei, “O no vei sei ubi e oo.” Me sou a papai so guale ei me sou valigalegale ei.
Pita ei vei maido ei ma muada oto e Iesu
(Mat 26:69-75; Luk 22:56-62; Ioa 18:15-18, 25-27)
66 Pita ei ino masala na muina vavasana lilo mina bigomu na luma. Ma tavine na pipigona tasa mina mapana prist ei asu maino,
67 me ei ite Pita ei amimilumilu. Ma tavine na pipigona do ei amusoepute ei, me ei vei, “Oo tamai o pilu e Iesu maino ne Nasaret.”
68 Moni e Pita ei vei maido, “Boa. Eau ma muada oto a inade oo goli iede.” Me ei gali usala agavuale a tema na luma. Ma kuleko tasa i tangi.
69 Ma tavine na pipigona do ei ite lei ei, me ei vei le sou a vanunua sou magili agavuale ei maido, “Bibi ieli ei a bibi mina abuna mine sou.”
70 Moni ei vei lou, “Boa.” Ma tabaa oto, sou a vanunua sou magili agavi sou vei lou ane Pita maido, “Patotona sele, oo moni oo a bibi maino ne sou. Oo a bibi ne Galili moni.”
71 Seido Pita ei ade sagali sele maido, “Ivu uata, eau ma muada oto a bibi amutou veivei iede. Mane eau ma vei patotona oto, de Salemo ei ni toegegeli eau.”
72 Ei veiosi, me ma tabaa oto kuleko ei tangi maluanai. Me Pita ei damutale lei a inade Iesu ei vei le ei, “Matailala a kuleko ei saboa tangi malua, oo no vei matolu maido oo ma muada oto e eau.” Me Pita i tangi mamau sele.