15
Neitou ogomuli a damutatalana mine Krais ma inigogona minei
1 Eitou a vanunua eitou isa a silimulina sagali, neitou buloi a vanunua sou ma isa oto a silimulina buo me neitou tabule a mavaana mine sou. Neitou ma damutaletale lei a buloine eitou oto moni.
2 Eitou vuso tastasa neitou buloi e tamtamaine eitou ne sou guale a inigogona doana ma silimulina mine sou ni palea sagali.
3 Eitou muada, Krais tamai ei ma buloi ete ei oto. A inigogona i palea minei tomane a Laulau mine Salemo ei vei, “Sou a vanunua sou adegegelu ane oo, ma mailobena mine sou ieli ei pu muata minau tamai.”
4 Inade vuso lisa sou niage na Laulau mine Salemo, iede sou niage mina matetengine eitou. A inade li ei mina masagalina lilone eitou me na buloine eitou to magili sagali me magitali e Salemo ni guale eitou.
5 Salemo tasa moni ei toe e eitou magili sagali a silimulina. Salemo ei ni buloi e amutou namutou ogomuli sele a inigogona mine Krais Iesu me sautole a damutatalana tasa moni ie. Maido ma lilone amutou ni tasa moni,
6 me amutou vuso pilu namutou beilange a aisane Salemo, ei e Salemo, Tamane Bibi Taula mine eitou e Iesu Krais.
Krais ei buloi e sou e Iuda pilu e sou a abuna sea
7 Maido me amutou vuso namutou mongemonge a gualene sou a Kristen sanii usinani ne sou ugu pilu e amutou, tomane Krais tamai ei mongemonge e amutou namutou ugu pilu e ei. Me na inigogona li namutou masalalai a aisa buo mine Salemo.
8 Eau vei maido, Krais ei palea a bibi na pipigona mina buloine sou a abuna mine Iuda. Ei goli maido ni maite a inade mine Salemo ei patotona, me na inigogona li ei toesesele a adegatunana vuso Salemo ei bilii e tubutubune sou.
9 Me tamai, ei kale ve sou a abuna sanii ne sou ite a dinodo mine Salemo me ne sou beilange a aisane ei, tomane a Laulau mine Salemo ei vei,
“Maido me eau na beilange a aisane oo balivua ne sou a abuna vanunua ma tavivine sanii.
Me eau na ale a inala mina beilangena aisamu.”
10 Ma inade tasa lou mina Laulau mine Salemo ei maido,
“Amutou a vanunua ma tavivine mine sou a abuna sea, namutou mongemonge pilu a vanunua ma tavivine mine Salemo.”
11 Me Laulau na vinalu sanii mine Salemo ei vei maido,
“Amutou a abuabuna vanunua sea, mu beilange a aisane Bibi Taula.
Amutou a vanunua ma tavivine mina aububuna vuso, mu beilange a aisane ei.”
12 Me Aisaia tamai ei vei maido,
“A mapana alaba na abuna mine Iesi ei ni palea,
me ei ni iteale a abuna vanunua ma tavivine vuso. A vanunua ma tavivine mine sou a abuna sea sou magitali a ilala ei ni palea ni toekube sou.”
13 Salemo ei adegatuna ni bilii e eitou a golugolu kubaana ieli eitou magitalitali a gualena. Amutou silimuli e ei, me ei ni goli a munonge buo ma lilomeana ni palea me ei ni vonu ne amutou. Me na sagagalina mina Maolona Nunu, a inigogona magitalina ilala Salemo ei ni bilii e eitou a golugolu doana ieli, ei ni vonu sele ne amutou.
Pipigona malongona mine Pol usino na abuna sea
14 Tamtamaigu, na lilogu eau silimuli sele e amutou goli a inigogona kubaana taliuliu. Me amutou isa a matamatana muadana, maido me amutou tastasa mapigogoi namutou matetengi e sou a vanunua ma tavivine mine Salemo.
15 Moni a inade sanii eau niage le amutou, ei a inade sagali sapa. Eau kale na mailisi a damutatalana mine amutou, vuna maido Salemo ei dode eau me ei vileale eau
16 ne eau na muigu a bibi na pipigona mine Krais Iesu, mina gunolina pipigona balivua mine sou a abuna vanunua ma tavivine sea. Na pipigona eau goli mina veipalena malongolongona kubaana mine Salemo do, eau pipigo tomane a prist, me eau kale na maasi e sou a abuna sea usino ne Salemo tomane a niabi ei kale mamai sele. Ma Maolona Nunu ei ni toe e sou ne sou palea a abuna vanunua ma tavivine sele mine Salemo.
17 Maido me eau pipigo pilu e Krais Iesu me eau masalai e Salemo na pipigona eau goli le Salemo.
18-19 Eau na ma veipale ete a golugolu sanii. Boa. Eau kale na veipale moni a pipigona Krais ei goli na limagu mina mailisina vanunua ma tavivine mine sou a abuna sea ne sou ogomuli a inade mine Salemo. Me ei bilii e eau a sagagalina mina gunolina matamatana gona sinaga. Ma Nunu mine Salemo tamai ei pipigo sagali na lilogu. Maido me eau soke ne Ierusalem me eau veipale a inade vuso mina malongolongona kubaana mine Krais, me eau gaga usino na aveavena vuso pea na avena ne Ilirikum.
20 Na pipigona li eau kale sele na veipale a malongolongona kubaana mina aveavena a vanunua ma tavivine saboa sou muada a aisane Krais. Eau ma kale ete na tige a luma muata na baobao a bibi tasa ei mamagiliosi.
21 Boa. Eau kale na goli tomane a Laulau mine Salemo ei vei,
“Sou a vanua sou ma longe ete a mapamulina minei lisa, ne sou ite ei.
Ma vanunua sou ma longe ete a inade minei, ne sou muada kuba.”
Pol ei kale ni ite sou e Rom me ei asu usino ne Spein
22 Pipigona li ei sautole eau mapapaina, me eau ma mapigogoi ete na asu usino me na ite amutou.
23 Moni seidei eau a pipigona boasi na avena ie. Na avala makuba eau kale sele na ite e amutou.
24 Maido na ilala eau asu usino na avena buo Spein, eau damu ve eau na asu muga usino na ite amutou, me mulimuli eau na asu usino ne Spein. Eau na mongemonge a niitene amutou ma niugu sapa pilu e amutou. Me mulimuli eau kale ne amutou buloi e eau a inasu usino ne Spein.
25 Moni seidei eau kale na asu usino ne Ierusalem mina buloine sou a vanunua ma tavivine mine Salemo ino na avena do.
26 Sou a vanunua ma tavivine mine Salemo ino na avena ne Masedonia me Akaia, sou maiademuli i me sou taupiluosi a vatu sanii sou kale ne sou maasi usino ne Ierusalem mina buloine sou a vanunua ma tavivine mine Salemo sou kapelabe.
27 Sou oabi a vatu odolo na masagana mine sou oto, ma inigogona dolo ei doana, vuna sou isa a golu tomane a ginau ne sou maliu usino ne sou e Iuda. Sou e Iuda sou maasi a golugolu kubaana sanii mine Salemo usino ne sou a abuna sanii sea. Maido me sou a abuna seasea sou isa a pipigona mina buloine sou e Iuda na golugolu sanii na vovo.
28 Io eau kale na mapuli muge a pipigona li. Eau kale na maasi a vatu ieli usino ne sou e Ierusalem, me mulimuli, na ilala eau asu usino ne Spein, eau na asu usino na ite pale amutou.
29 Me eau muadasi i, mane eau asu usino ne amutou, a maibalavana mine Krais ei ni vonu na lilogu, me ei ni toekukube sele amutou.
30 Tamtamaigu, eau kale namutou damutaletale Bibi Taula mine eitou e Iesu Krais, me na inigogona li mina biliina lilone eitou usino ne sou sanii, iede a Maolona Nunu ei mapale le eitou. Me eau kale a damutatalana li ei ni mailisi e amutou a kinaka pilu e eau. Namutou kake Salemo ei ni buloi e eau
31 me ei gualeliu e eau na limane sou a vanunua mine Iuda sou saukikiki a inade mine Salemo. Me ne amutou kake Salemo ei ni toe a vanunua ma tavivine minei ino ne Ierusalem ne sou guale a pipigona li eau goli mina buloine sou.
32 Maido me mane Salemo ei kale, eau na mongemonge sele na ilala eau asu usino me eau ite amutou, me eau na manoa sapa pilu e amutou me eau guale lei a sagalina.
33 Salemo ei iabi a lilomeana minei usinani ne eitou, ei ni ugu pilu e amutou vuso. Moliana.