2
Bilesina vavasana mine Salemo
1 Maido me amutou a vanunua vuso mu ububi a inade usino na vanunua seasea, eau vei le amutou vuso, oo no ma adeade lou ve oo ma isa oto a sinusu. Longe, ilala oo ubi a vanua sanii a inade, o ubi a inade tamai ne oo oto, vuna maido, oo oto oo goligoli a matana inigogona tasa moni tomane sou goli.
2 Eitou muada, Salemo ei maliuliu a mapa pagu ane sou a vanunua sou goli a matamatana inigogona pagu odo, ma inigogona Salemo ei goli iodo, ei patotona vuso.
3 O ububi a inade usino na vanunua sou goli a matana inigogona pagu maido, moni oo oto oo goligoli a matana inigogona tasa moni tomane sou. Oo damu e Salemo ei ma mapigogoi ete ni vavasa ane oo tamai, io?
4 Ue, oo ma muada oto e Salemo ei goli a inigogona doana ne oo, mei magitali oo tabaa selesi mei ma maliu asiasi ete a inigogona pagu oo goli. Maido me nane oo ite ei tomane a golu sabubu, io? Salemo ei kale no sauvule a lilomu, maidolo me ei goli a inigogona doana ane oo.
5 Oo tabesobe sele a lilomu me oo ma sauvulevule ete a lilomu. Me na inigogona iede ei tomane o taupili a mapa pagu i buo minio oto. Me na malada Salemo ei goli a bilesina vavasana minei, lilotivulana minei ni palea muada sele me oo no guale a mapa pagu odo.
6 Salemo ni bilii a mapa ne sou a vanunua ma tavivine vuso mapigogoi a inigogona sou goli.
7 Sanii sou ogomulimuli sagali a inigogona doadoana taliuliu me sou tilotilo a vea mina minaluna doana pilu e Salemo ma aisa buo pilu a maulina ei ma pulupulu oto. Salemo ei ni bilii a maulina i kubaana taliuliu taliuliu usino ne sou a vanunua ma tavivine do.
8 Me sanii sou damutale sou oto moni, me sou lametase a inade ivu me sou ogomuli a inigogona ei ma bilesi oto. Salemo ei ni sinoa ana vanunua ma tavivine sou odo, me ei ni maliu a mapa pagu sele usino ne sou.
9 Mavaana buo ma davutina ni palea na vanunua vuso sou goligoli a inigogona pagu, ne sou e Iuda pala, me ne sou a abuna sea tamai.
10 Moni Salemo ni bilii a minaluna doana ma aisa buo ma lilomeana usino ne sou vuso a vanunua sou goligoli a inigogona doana, ne sou e Iuda pala, me ne sou a abuna sea tamai.
11 Vuna maido Salemo ei vivileale a vanunua ma tavivine vuso na matana inigogona tasa moni.
12 Ei maido. Vanunua vuso sou ma isa oto a binea me sou goli a sinusu, sou ne sou buale, muina sou ma isa oto a binea. Ma vanunua vuso sou isa a binea me sou goli a sinusu, Salemo ni ogomuli a inade ino na binea me ei ni vivileale a inigogona mine sou.
13 Vanunua sou longetase sabubi a binea, sou ma palea oto a bilesina vanunua na matane Salemo. Boa. Vanunua sou ogomuli a binea, vanunua moni iodo Salemo ni tole sou a bilesina vanunua.
14 Mane sou a abuna sea sou ma isa oto a binea sou ogomulimuli a inigogona mina binea na damutatalana mine sou oto, io a damutatalana mine sou oto ei muina tomane a binea mine sou oto.
15 Na inigogona mine sou ie, inade na binea Salemo i tau na lilone sou ei palea muada. Ma damutatalana ivu ino na lilone sou, ieli tamai ei maite i maido, binea ei ino na lilone sou.
16 Maidolo me na malada Salemo ei tau mina vivilealena inigogona vuso i ovu ma adeoovuna mina vanunua vuso, damutatalana mina vanunua sou odo ei ni vavasa ane sou na inigogona sou goli. Malongolongona kubaana eau veipale ei maido, Salemo ei ni vivileale a inigogona mina vanunua vuso ne Iesu Krais.
Sou Iuda sou damu i a binea ei mapigogoi ni buloi e sou
17 Amutou e Iuda, amutou veivei maido, “A binea ei ni buloi e amiteu na vavasana. Amiteu a abuna mine Salemo.”
18 Amutou gualesi a matetengina mina binea me amutou muada a masagana mine Salemo, maido me amutou veivei ve, sou a inigogona i bilesi sou kubaana.
19-20 Amutou damudamu i maido, “Na binea amiteu gualesi a vuna muadana i doana ma inade patotona, maidolo me amiteu mapigogoi namiteu maite a vea ane sou so mata ego. Amiteu eili tomane a muada mina vanunua ino na tunuui. Amiteu a vanunua mina matetengine sou a vanunua sou ma isa oto a muadana. Amiteu a vanunua na matetengina mine selebanini.”
21 E, amutou matetengitengi e sou a vanunua ma tavivine seasea, moni posa matina amutou ma matetengitengi ete amutou oto? Amutou veivei ve a vanunua ne sou ma paaaliali lou, moni amutou paaaliali?
22 Amutou veivei ve, “A vanunua ma tavivine ne sou ma goligoli lei a inigogona sualolona,” moni nane amutou oto mu goligoli maido? Amutou ma kale ete sou a salemo auala, moni nane amutou paaaliali a golugolu mina luma na kinaka mine sou masala?
23 Amutou beilangelange a binea mine Salemo, moni amutou seutiuti a binea, me na inigogona ieli amutou toegegeli a aisane Salemo.
24 Laulau mine Salemo i isa a inade na inigogona do maido, “Sinusu mine amutou moni, me sou a abuna seasea sou adepintola me sou taupui a aisane Salemo.”
Inigogona ivu mina munogena
25 Mane eitou ogomuli a binea, io a inigogona munoge mine eitou e Iuda, ieli ei ni a inigogona doana. Moni mane oo seuti a binea, io muina sou moge a uliuline oo, oo muimu moni tomane a bibi sou ma moge ete ei.
26 Me mane a bibi sou ma moge ete ei, ei ogomuli kube a inigogona bilesi vuso mina binea, de bibi iedo ei ni muina tomane a bibi sou moge a uliuline ei.
27 Amutou Iuda amutou isa a laulau mina binea, me sou moge a uliuline amutou. Moni mane amutou seuti a binea, io bibi ei ogomulimuli ivu a inade mina binea ei ni ubi a inade usino ne amutou.
28 Mane a bibi ei Iuda na aisa moni, ei ma Iuda ivu oto. Ma inigogona na munogena, ei a golu mina vovo moni.
29 Moni a bibi ei e Iuda ivu, lilona ma damutatalana minei i maolo. Ma inigogona ivu mina munoge na uliuli, ieli tamai ei ni palea lilo mina lilona ma damutatalana mina bibi. Ei ma palealea oto na inigogona mina ogomulina inadenade sou niage na binea. Boa. Ei a golu a Nunu mine Salemo ei mapale. Matana bibi maido ei ma gualeale ete a aisa buo na matane sou a vanunua. Boa. Moni ei guale a aisa buo mina matane Salemo.