7
Vanunua ma tavivine savuluvulu savulu sobo tasa timana savuluvulu savulu iva timana savuluvulu iva (144,000) mine Israel sou guale a matailala mine Salemo
1 Tauluna golu ieli, io eau ite a bineanea iva sou magili na sugu iva na magamaga. Sou lapitole liu a avivili iva mina magamaga ne sou ma mapigogoi ete ni vali a magamaga, dasi ma obuobu.
2 Me eau ite a bineanea tasa sea ei ilisi na avena oaso tala i me ei asu maino. Ei lapitole a matailala mine Salemo ei mauli taliuliu, me ei tola sagali ane sou a bineanea iva Salemo ei bilii e sou a sagagalina mina toegegelina magamaga pilu a dasi.
3 Ei vei maido, “Amutou ma toegegeli lei a magamaga, dasi ma obuobu pea amiteu tau pale a matailala mine Salemo mine eitou na palala ne sou a vanua na pipigona minei, mulimuli namutou toegegeli a golugolu.”
4 Me eau longe sou vate a savulu na vanunua ma tavivine sou guale a matailala i savuluvulu savulu sobo tasa timana savuluvulu savulu iva timana savuluvulu iva (144,000) balivua ne sou a abuna mine Israel.
5 Vanunua ma tavivine savuluvulu savulu tasa timana savuluvulu lua (12,000) na abuna mine Iuda sou guale a matailala,
me savuluvulu savulu tasa timana savuluvulu lua na abuna mine Ruben,
me savuluvulu savulu tasa timana savuluvulu lua na abuna mine Gat,
6 me savuluvulu savulu tasa timana savuluvulu lua na abuna mine Aser,
me savuluvulu savulu tasa timana savuluvulu lua na abuna mine Naptali,
me savuluvulu savulu tasa timana savuluvulu lua na abuna mine Manase,
7 me savuluvulu savulu tasa timana savuluvulu lua na abuna mine Simeon,
me savuluvulu savulu tasa timana savuluvulu lua na abuna mine Livai,
me savuluvulu savulu tasa timana savuluvulu lua na abuna mine Isakar,
8 me savuluvulu savulu tasa timana savuluvulu lua na abuna mine Sebulun,
me savuluvulu savulu tasa timana savuluvulu lua na abuna mine Iosep,
me savuluvulu savulu tasa timana savuluvulu lua na abuna mine Beniamin. Vanunua ma tavivine vuso do sou guale a matailala mine Salemo.
Abuna vanunua ma tavivine makuba sou totopatuliale Salemo
9 Tauluna golu ieli, eau ite a vanunua ma tavivine makuba sele sou viepilu i ma mapigogoi ete a bibi ni gi a savulu ne sou. Vanunua ma tavivine do sou mina abuna vanua vuso me mina avena buobuo vuso, me mina matamatana vovo vuso, me mina matamatana inade vuso, sou magili na laguna niugugu a mapana me na matane Natuna Sipsip. Sou kai a kinainai lagolago keakea, me na limane sou, sou lapitole a laulau na obu a lou.
10 Sou tola sagali maido, “Salemo mine eitou ei ugu na niugugu a mapana minei, me Natuna Sipsip, sulu moni su gualeliuliu e eitou me sulu toe eitou malu kuba.”
11 Me sou a bineanea sou magili saiili a niugugu a mapana me sou a vanua buobuo me sou a golu iva sou mauli, me sou totopatulu me sou taupute a letene sou utano na magamaga, me sou totopatuliale Salemo.
12 Sou vei maido,
“Moliana!
Neitou veipale a maibalavana ma malasana buo minei.
Ei isa a damutatalana doana vuso, me eitou toledadangi e ei, me eitou beilange a aisane ei.
Ei isa a sagagalina ivu. E, a sagagalina buo vuso ino ne ei.
Taliuliu taliuliu golugolu vuso do sou mine Salemo mine eitou moni.
Moliana sele!”
Davutina seidei ei pulosi
13 Io tasa mine sou a vanua buobuo ei tagi e eau maido, “Sou a vanunua ma tavivine sou kai a kinainai lagolago keakea do, ede sei sou? Sou asu maino ne sei avena?”
14 Me eau maliu a inade minei maido, “Bibi buo, oo oto oo muada.” Me ei vei le eau maido, “Sou a vanunua ma tavivine do sou guale a mavaana buo ma davutina na limane sou a butu. Me sou loloi a kinainai mine sou a dalane Natuna Sipsip, ma kinainai sou odo i palea kea sele.
15 Maido me,
“Sou magiligili na laguna niugugu a mapana mine Salemo. Me na oaso me na lodo sou ino na luma mine Salemo me sou pipigopigo ane ei.
Me Salemo ei ugugu na niugugu na mapana, ei oto ei ni muina pilu e sou mei iteale sou.
16 ‘Ne sou ma vitolo lou oto, ma loone sou ni ma tagasa lou oto.
Oaso ei ni ma mapigogoi ete ni voe a vovone sou, ma golu tasa boa ei ni toe a vovone sou i tivula mamau sele.
17 Vuna maido, Natuna Sipsip ei ino balivua sele na niugugu a mapana,
ei ni muina a bibi na niitealalena mine sou.
Ei ni maasi e sou usino na aopu na nanu, ede a nanu mina biliina maulina.’
Me ‘Salemo ei ni saveitagase a matananu ne sou vuso, me ne sou ma tangi lou oto.’”