3
Wãn³txa² kwa³na³jau³xu¹tai²na² wxa²wa²su¹kxi²nẽ³te²la¹xã³?
1 Nxe³ha²kxai³ Ka³la²si²a²ko³xan¹te²nãu³ ĩ³nxa² ne³the³the³kxi²yah³lxa³lxa². Kãin² ĩ³ki³ha¹kxi¹nx2tain¹nũ²hẽ³la². Je³su² Kris²tu³jah¹la² ĩ³hxi²kĩ¹la³kxain¹ju³ta² wain³txi³ ĩ³yau¹ũ¹nx2ta¹tai¹ti²tu³wa². Wi¹la³la³kxi²yah³lxin¹tai¹ti²tu³wa².
2 Nxe³yah³lxi¹nha²kxai³ yau³ka³na³ka³nat3sxã³ ĩ³yau¹ũ¹sah¹lxi³hẽ¹la². Txa²wã¹sũ̱³na² A²yãu³ka³txa² ĩh¹nxe² ĩ³nxũ²kwa̱i³wi¹nx2ti³lhai¹la²? Moi³se²ah³lu¹tai²na² kwa³na³jau³xu¹tai²na² sa²yxo²we¹jah³lxin¹ju³tan¹te²kxa³ya̱n³tu̱³ ta̱³nxa² hãi¹sxã³ Je³su²jah³lai²na² wãn³txa² yxo²ĩ²ah³lxin¹ju³tan¹te²kxa³ya̱n³tu̱³ ta̱³nxa² ĩh¹jau³su² hĩ̱³te³la¹xã³?
3 Ne³kan²kxi²khaix1yah³lxi¹lxa². Nxe³ha²kxai³ Je³su²jah³lai²na² wãn³txa² ãn³si³tẽ³kxi²yah³lxi¹nhĩ¹nai³tã² Txa²wã¹sũ̱³na² A²yãu³ka³txa² ĩ³hxi²ka¹txa²lxi³tai¹ti²tu³wa². Yxah³lxin¹ta¹ hĩ¹nai²li² Sũ̱³na² Yãu³ka³txa² ã³yah³lxin¹ta²lu¹wa². Nxe³yah³lxin¹sxã³ wxa²ẽ¹nãn¹jau³kxai³lu¹:
— Txa²sa²nẽ¹nha¹ju³khai³xa² so¹lxi³ ãn³si³tẽ³kxai¹na¹nha¹. Yah³lxin¹jau³xai²li² wain³ti³he¹nx2nxa³wa².
4 Te²yã¹nxe³sxã³ Je³su²jah³lai²na² wãn³txa² ãn³si³tẽ³kxi²yah³lxin¹ju³tan¹te²kxa³ya̱³lhu² khãuh³lxa³ti³nha²khai¹yxah³lxin¹tai¹ti²tu³wa². Nxe³yah³lxin¹sxã³ Txa²wã¹sũ̱³na² Yãu³ka³txa² ĩ³hxi²kat1jah³lxin¹tai¹ti²tu³wa². Nxe³ju³tai³tã² kwa² ã³na¹sxã³ sa²yxo²ã³ah³lxin¹ta¹thai¹la²?
5 Te²yã¹nxe³sxã³ Txa²wã¹sũ̱³na² hi²sen³kxai³lu² A²yãu³ka³txa² ũ³hũ¹nx2ti³ha²kxai³ wã³nxĩn¹sxã³ o²la³kxi¹nx2ti³ha²kxai³ nxe³nxa²lxi³tai¹ti²tu³wa². Hai³txi³ Moi³se²ah³lu¹tai²na² kwa³na³jau³xu¹tai²na² sa²yxo²we¹jah³lxin¹ju³tan¹te²kxa³ya̱³lhu² Sũ̱³na² Yãu³ka³txa² ũ³hũ¹nx2ti³xa³tai¹ti²tu³wa². Yxãn¹ta¹ Txa²wã¹sũ̱³na² wãn³txa² wi¹jau³xa² yxo²ĩ²sxã³ yxau³yah³lxi¹nha²kxai³ Sũ̱³na² Yãu³ka³txa² ũ³hũ¹nx2ti³tai¹ti²tu³wa².
6 Nxe³ha²kxai³ Txa²wã¹sũ̱³na² ũ³wha²li¹txã³nxu¹tai²na² e³te³nah¹lxi¹:
— A³bra³ãu²ah³la² sa²kxai³lu² Txa²wã¹sũ̱³na² wãn³txa² yxo²ĩ²ta¹hxai²hẽ¹li¹. Nxe³ju³tan¹te²kxa³ya̱³lhu² Txa²wã¹sũ̱³na² hi²sen³su² a²ko̱³nxe³ti³ kãi³ju³ta² ne³wã²na³sxã³ wain³te²lo³ta¹hxai²hẽ¹li¹. Nxe³ta¹hxai²hẽ¹la².
7 Nxe³ha²kxai³ te²yã¹nxe² Je³su²jah³lai²na² wãn³txa² yxo²ĩ²sxã³ yxau³te²na² so¹lxi³ A³bra³ãu²ah³la² a²ne³tah²nãu³la³ti³hit1jah¹lai²la¹wa².
8 Te²yã¹nxe³sxã³ a²kxã³nhxĩ¹nu¹tai²na² Ju³te²a² nũ̱³ka̱³txi³sxa³te²a² yxo²ĩ²ju³tan¹te²kxa³ya̱³lhu² Txa²wã¹sũ̱³na² hi²sen³su² wain³te²lo³tain¹si¹ja³kxa³nũ³sxu² ã²la² a³la³kxi²ta¹hxai²ti³ai¹ti²tu³wa². Txa²wã¹sũ̱³na² ũ³wha²li¹txã³nxũ¹tai²na² nxe³ta¹hxai²ti³ai¹ti²tu³wa². Nxe³ha²kxai³ A³bra³ãu²ah³lu¹tai²na² sa²kxai³lu² Sũ̱³na² wãn³txa² wi¹jau³su² ĩ³yau¹ũ³ta¹hxai²ti³ai¹ti²tu³wa². Nxe³te³nah¹lxi¹:
— Wxãi²kxai³ hĩ¹na² yxo²ĩ²in¹ju³tan¹te²kxa³ya̱³lhu² kxã³nãu³a¹ a²nũ²a² nũ̱³ka̱³txi³nãu³xa² yxo²ha³kxa¹ ul²yxaun³ta³kxi² kxan²ti³ wi¹lhin¹ti³hi¹tai¹na¹tu¹wi¹. Txa²wã¹sũ̱³na² nxe³ta¹hxai²ti³ai¹ti²tu³wa².
9 Jã¹nxe³ha²kxai³ A³bra³ãu²ah³lu¹ta²kxai³ yxo²ĩ²ju³tan¹te²kxa³ya̱³lhu² Txa²wã¹sũ̱³na² hi²sen³kxai³lu² wi¹lhin¹ti³hi¹ta¹hxai²ti³ai¹ti²tu³wa². Te²yã¹nxe³sxã³ a²nũ²a² ĩ²li³te²a² yxo²ĩ²kxai²nãn²tu̱³ wi¹lhin¹ti³hi¹tũn³tu¹wa².
10 Nxe³yãn¹ta¹ a²nũ²a² ĩ²li³te²a² a²ẽ¹nãn¹jau³kxai³lu¹:
— Wain³te²lot3sa²ju³ta² ten³sa³nha¹. Nxe³nha¹ha²kxai³ kwa³na³jau³xu¹tai²na² sa²yxo²wet1sxã³ kãi³a¹tũ¹xã¹. Nxe³jau³tu̱³ nxe³to³ta¹ hai³txi³ wain³te²lo³ju³ta² yũ²nxa³lho³la². Moi³se²ah³lu¹tai²na² kwa³na³jau³xu¹tai²na² hxi²kan¹txi³ sa²yxo²we¹thxa³te²sxa³yu²hẽ³la². Nxe²nxa³sxã³ Sũ̱³na² ũ³wha²li¹txã³nxu¹tai²na² e³te³nah¹lxi¹:
— A²nũ²a² ĩ²li³te²la³ kwa³na³jau³xu¹tai²na² sa²yxo²wet1sxã³ kãi³kxai²nãn²tu̱³ yxãn¹ta¹ yau³ka³na³ka³nat3sxã³ sa²yxo²we¹txa³jau³su² on³kxai²nãn²tu̱³ a²nxe³jah¹la² sa²kxai³lu² Txa²wã¹sũ̱³na² hxi²ki³kxai³lu² ko̱³nxe³te²lo³ju³ta³lon³na³li¹. Nxe³ta¹hxai²ti³ai¹ti²tu³wa².
11 Jã¹nxe³ha²kxai³ Sũ̱³na² wãn³txu¹tai²na² ũ³wha²li¹txã³nxu¹tai²na² jã¹nxũn³te³nah¹lxi¹:
— Sũ̱³na² wãn³txa² yxo²ĩ²sxã³ yxau²xai³te²na² so¹lxi³ wain³te²lo³jah¹lo²su² na³li¹. Nxe³ta¹hxai²ti³ai¹ti²tu³wa². Nxe³ha²kxai³ kwa³na³jau³xu¹tai²na² hãi¹nxe³jau³xa¹ hxi²kan¹txi³ sa²yxo²we¹thxa³te²sxa³yu²hẽ³la². Nxe²nxa³sxã³. Txa²wã¹sũ̱³na² wi¹lin¹ti³hi¹ju³ta² yũ²nxa³wa². Ju¹tai²li² e³lxah²lxi²na³la².
12 Jã¹nxe³ha²kxai³ kwa³na³jau³xu¹tai²na² sa²kxai³lu² yxo²ĩ²kxe³ju³ta² hai³txi³ ã³wxe³nũh¹hxa³wa². Hãi¹sxã³ sa²yxo²wet1sxã³ kãi³kxe³ju³ta² so¹lxi³ ã³wxe³nũh¹na³la². Nxe³ju³tai²li² Txa²wã¹sũ̱³na² ũ³wha²li¹txã³nxu¹tai²na² e³te³nah¹lxi¹:
— Kwa³na³jau³xu¹tai²na² sa²yxo²wet1sxã³ kãi³te²na² sa²kxai³lu² kwa³na³jau³xai²na² so¹lxi³ ã³wxe³nũh¹na³li¹. Nxe³ta¹hxai²ti³ai¹ti²tu³wa². Nain¹ta¹ yau³ka³na³ka³na³jau³xa² sa²yxo²ã³kxai²nãn²tu̱³ Txa²wã¹sũ̱³na² hi²sen³su² ko̱³nxe³te²lo³tu¹wa².
13-14 Jã¹nxe³jut3su² kxã³nhxĩ¹nu¹tai²na² Txa²wã¹sũ̱³na³ ũ³wha²li¹txã³nxu¹tai²na² e³kxi²ta¹hxai²hẽ¹la². Nxe³te³nah¹lxi¹:
— Ko̱³nxe³ti³ kãi³jah¹la² ĩ³ya²lu¹tain¹kxai²nãn²tu̱³ ĩ³hxi²kĩ¹la³kxain¹te³lhxã³ nx2na³na¹ sxã³ a²nũ²a² nxe² e³kxi²te³nah¹lxi¹: “Ko̱³nxe³ti³ kãi³ĩ¹nha²kxai³ hxi²ki³te²si¹lxi¹. Nxĩ¹nha²kxai³ ĩ³hxi²kĩ¹la³kxi²sa²sih¹nxa²ha¹jau³su² Txa²wã¹sũ̱³na² kwa³na³sa³na²hẽ³li¹.” A²nũ²a² nxa²hẽ³li¹. Ũ³wha²li¹txã³nxu¹tai²na² nxe³ta¹hxai²ti³ai¹ti²tu³wa². Te²yã¹nxe³sxã³ ko̱³nxe³ti³ kãi³sĩn¹te²sa¹ha²kxai³ a²hxi²ki³te²la³nũn³sĩ¹na¹wa². Nxe³sĩ¹na¹kxe³su² Kris²tu³jah¹la² hi²sen³su² sa²so¹kxi²sa²sĩn¹sxã³ ko̱³nxe³ti³ kãi³kxe³hũ̱³nxe³la²sxã³ ko̱³nxe³te²lo³nha²sxã³ ya³lu²kxi²sain¹sĩn¹na²hẽ³la². Txa²wã¹ko̱³nxe³ti³ kãi³sĩ¹na¹ju³ta² sa²wa²su¹te³lhxã³ ya³lu²kxi²sain¹sĩn¹na²hẽ³la². Nxe³sxã³ ĩ³hxi²kĩ¹la³kxain¹ta¹hxai²ti³ai¹ti²tu³wa². Nxe³ha²kxai³ ko̱³nxe³ti³ kãi³sĩ¹na¹ju³ta² sa²wa²sut1sain¹sĩn¹sxã³ wain³te²lot3sain¹sĩn¹na²hẽ³la². Te²yã¹nxe³sxã³ kxãn³kxai³ A³bra³ãu²ah³lu¹tai²na² hi²sen³su² Sũ̱³na² wãn³txa² yxo²ĩ²ha²kxai³ wain³te²lo³ta¹hxai²ti³ai¹ti²tu³wa². Nxe³sxã³ A³bra³ãu²ah³lu¹ jãx1sain¹sĩn¹na²hẽ³la². Txa²wã¹sũ̱³na² yxo²ĩ³sĩ¹na¹ha²kxai³ Sũ̱³na² Yãu³ka³txa² ã³nxũ²kwa̱i³wi¹sa²sĩn¹si¹jau³su² ũ³hũ¹sa²sĩn¹na²hẽ³la². Te²yã¹nxe³sxã³ Ju³te²a² nũ̱³ka̱³txi³sxa³te²nãu³xa² yxo²ha³kxa¹ yxo²ĩ²sxã³ yxau³ain¹kxai²nãn²tu̱³ Sũ̱³na² Yãu³ka³txa² ũ³hũ¹ain¹nũn³tu¹wa². Nxe³jau³xa² wi¹jau³xai²li² ĩ³ye³ũ¹sain¹sĩn¹na²hẽ³la².
Txa²wã¹sũ̱³na² wãn³txa² ĩ³ye³ũ¹nhẽ³jau³su²
15 Txa²wã³tã̱³nãu³xãi³. A²nũ²a² kãi³kxi²nyhu¹ki³jut3sũ̱n³ju³ta² ĩ³yau¹ũ³nx2ta¹tu¹wa². A²nũ²a² ha¹li¹ ta̱³nxa² yen³kxa² e³kxi²sxã³ ten³ya³kxai²nãn²tu̱³ ĩ³ye³yxo²ka²la¹hũ³nyhu¹sxã³ ũ³wha²li¹lya³te²ju²hẽ³la². Ne³wã²na³kxa²ya̱n³txi³su² a²ĩ³lxa² ũ³wha²li¹lhẽ¹ja³te²ju²hẽ³la². Ya³kxai²nãn²tu̱³ kxãn¹ton³tãu³a¹ ũ³wha²li¹lhẽ¹txã³nxa² sa²yxo²ã³ta̱³nxa² wãn³txa² yau³xã̱³lxi³ ũ³wha²li¹lũ³nhe³wxe³ta̱³nxa² nxe³na¹tũ¹xã¹. Ya³nxa²ha³ta̱³nxãn²ti³ ya³kxai²nãn²tu̱³ hxi²ka¹nai¹nhĩ̱³nx2nxa³wa².
16 Te²yã¹nxe³ju³kxai³lu² a²kxã³nhxĩ¹nai³tã² Txa²wã¹sũ̱³na² hi²sen³su² A³bra³ãu²ah³lu¹tai²na² a²sa³wit3su¹tai²na² ĩ³ye³ũh¹jau³xa² e³kxi²ta¹hxai²hẽ¹la². Hai³txi³:
— Wxa²sa³wi³ha³lxi³su¹. Nxe²nxa³te²tu̱³:
— Wxa²sa³wit3su¹. Ka³na³ka³na³ta² so¹lxi³ nxe² ĩ³ye³kxain¹ta¹hxai²hẽ¹la². A²nxe³jah¹lai²li² Kris²tu³jah¹lain²txi²na³la². Nxe³kxi³ta¹hxai²ti³ai¹ti²tu³wa².
17 Jã¹nxe³na¹ju³ta² wãn³txa² e³kxi²na¹jau³xa² a²si³yxau³tãu³a²sa¹, a²wi¹lhĩ¹nu¹tai²na² Txa²wã¹sũ̱³na² Si³yxau³kah³la² hi²sen³su² A³bra³ãu²ah³lu¹tai²na² wãn³txa² wi¹jau³xa² ĩ³ye³ũh¹tain¹ta¹hxai²ti³ai¹ti²tu³wa². Hã²wxãn³txa³nũ² kwẽ³kxa² ka³lxa¹tãu³u¹ta²kxai³lu² 430 nxe² kwẽ³kon³tãu³a¹ Txa²wã¹sũ̱³na² hi²sen³su² kwa³na³jau³xu¹tai²na² ĩ³yau¹ũ¹ta¹hxai²ti³ai¹ti²tu³wa². Jãx1jau³su² A³bra³ãu²ah³lu¹tai²na² ĩ³ye³ũh¹jau³xai²na² Txa²wã¹sũ̱³na² wãn³txain²txi³ Moi³se²ah³lu¹tai²na² kwa³na³jau³xu¹tai²na² Txa²wã¹sũ̱³na² wãn³txain²txi³ ta¹hxai²ti³ai¹ti²tu³wa². Jã¹nxe³jut3su² A³bra³ãu²ah³lu¹tai²na² ĩ³ye³ũ¹jau³xu¹tai²na² u²khaix1nxe³ha²kxai³ Moi³se²ah³lu¹tai²na² kwa³na³jau³xu¹tai²na² a²si³yo³na² wxã³ha²kxai³ nxe³ta¹hxai²ti³ai¹ti²tu³wa². Nxe³ha²kxai³ Moi³se²ah³lu¹tai²na² kwa³na³jau³xu¹tai²na² a²si³yo³na² wxã³kxan²ti³ hxi²kan¹txi³ wãn³txa² Sũ̱³na² ĩ³ye³ũh¹jau³xa² ã²la² u²lxan¹jau³xan²tu̱³ ĩ³yat1te²sxa³yu²hẽ³la².
18 Nxe³te²sxa³ha²kxai³ yen³kxa² wi¹te²a² ũ³hũ¹nẽ³lain¹kxe³nũ³su² Txa²wã¹sũ̱³na² kwa³na³jau³xu¹tai²na² ã³wxe³nũ¹ke³la³te²kxai³ ĩ³ye³ũ¹jau³xu¹tai²na² ã³na¹hĩ̱³nx2na³la². Wãn³txa² kwa²toh³lxi³jau³la³hĩ̱³nx2na³la². Yxãn¹ta¹ ũ³hũ¹nẽ³lain¹kxe³nũ³su² hai³txi³ kwa³na³jau³xu¹tai²na² ã³wxe³nũ¹hĩ̱³nx2nxa³wa². Yxãn¹ta¹ Txa²wã¹sũ̱³na² ĩ³ye³ũh¹jau³xu¹tai²na² ã³wxe³nũ¹hĩ̱³nx2na³la².
19 Nxe³te²kxai³lu² ĩh¹nxe³kxa²ya̱n³ti³ta̱³ kwa³na³jau³xu¹tai²na² wxã³hĩ̱³ta¹hxai²yu²lhai¹la²? Txa²wã¹ko̱³nxe³ti³ kãi³ki̱³ju³ta² yũ³kxe³su² ĩ³ye³ũh¹te³lhxã³ wxã³ta¹hxai²hẽ¹la². A³bra³ãu²ah³lu¹tai²na² sa³wi³su² ã²la² e³kxi¹nx2ta¹jah¹lai¹tã² wxã²nxa³tãu³a² nxe³hĩ¹nu¹tai²na² so¹lxi³ kwa³na³jau³xu¹tai²na² yũ³ta¹hxai²ti³ai¹ti²tu³wa². Jã¹nxe³ju³kxai³lu² Txa²wã¹sũ̱³na² hi²sen³su² kwa³na³jau³xu¹tai²na² ĩ³yau¹ũ³te³lhxã³ oh³xan¹tũ̱³ka̱³txa² ĩ³sa²si¹hã¹ta¹hxai²hẽ¹la². Ĩ³sa²si¹hã³sãn²nũ²la² ã³yaun³ta² a³ka³nxain¹sxã³ a²nũ²a² ka³na³ka³na³te²a² ĩ³ye³ũh¹hain¹ta¹hxai²hẽ¹la². Nxe³nũ²la² jah¹lai²na² sa²kxai³lu² a²nũ²a² a²yxo²ha³kxa¹ ĩ³yau¹ũ³jah¹lo²su² ta¹hxai²ti³ai¹ti²tu³wa².
20 Jã¹nxe³jut3su² A³bra³ãu²ah³lu¹tai²na² ĩ³ye³kxi²hĩ¹nu¹tai²na² nũh¹lxi³ e³kxi²nyha¹ta¹hxai²ti³ai¹ti²tu³wa². Hai³txi³ oh³xan¹tũ̱³ka̱³txa² ĩ³sa²si¹hã³xa³ha²kxai³ a²nũ²khai³xa² ĩ³sa²si¹hã³xa³ha²kxai³ hãi¹sxã³ A³bra³ãu²ah³la² so¹lxi³ ĩ³ye³kxi²nyha¹ta¹hxai²ti³ai¹ti²tu³wa².
Ĩh¹nxe³ha²kxai³ kwa³na³jau³xu¹tai²na² ĩ³ye³kxi²nẽ³te²la¹xã³?
21 Nxe³kxai²nãn²tu̱³ wãn³txa² kwa³na³jau³xu¹tai²na² sa²kxai³lu² kan²txi³ ka³te̱³na² wi¹tãu³a² hxi²kan¹txi³ ũ³hũ¹nhẽ³nũ³nhĩ̱³te²la¹xã³? Hai³txi³ ũ³hũ¹ti³hex1nẽ³lxa³wa². Kwa³na³jau³xu¹tai²na² ĩ²li³jau³xa² kan²txi³ ka³te̱³na² wi¹tãu³a² ũh³hũ¹nẽ³nũn³kxe³su² yũ³ke³la³te²kxai³ txa²wã¹ẽ¹nãu³ai²na² sa²wa²su¹kxi²nẽ³ju³ta² yũ³hĩ̱³nx2na³la². Yxãn¹ta¹ hai³txi³ ti³hex1hĩ̱³nx2nxa³wa².
22 Nxe³kxa²yu³su² Txa²wã¹sũ̱³na² ũ³wha²li¹txã³nxu¹tai²na² sa²kxai³lu² a²nũ²a² yxo²ha³kxa¹ ko̱³nxe³te²lo³tãu³lo³nha²kxe³su² ĩ³yau¹ũ³nhẽ³ta¹hxai²ti³ai¹ti²tu³wa². Nxe³ha²kxai³ Je³su² Kris²tu³jah¹lai²na² wãn³txa² yxo²ĩ²ki̱³kxai²nãn²tu̱³ Txa²wã¹sũ̱³na² ĩ³ye³ũh¹nhẽ³ju³ta² ũ³hũ¹nẽ³tu¹wa².
23 Jã¹nxe³ha²kxai³ Je³su²jah³lai²na² wãn³txa² yxo²ĩ²ki̱³kxe³su² yũ²nxa³hĩ¹nu¹tai²na² Txa²wã¹sũ̱³na² kwa³na³nẽ³jau³xu¹tai²na² ain³kxi²sxã³ yxau²xai³ki̱³ta¹hxai²ti³ai¹ti²tu³wa².
24 Nxe³sxã³ Je³su² Kris²tu³jah¹la² wxã²nxa³ta̱³lxa¹ Txa²wã¹sũ̱³na² kwa³na³nẽ³jau³xu¹tai²na² yxau³sxã³ sa²yxo²we¹ki̱³tai¹ti²tu³wa². Je³su² Kris²tu³jah¹la² wxã³sxã³ txa²wã¹ẽ¹nãu³ai²na² sa²wa²su¹tẽ³si¹ki̱³jau³nũ³su² yxo²ĩ²sxã³ wah³nxe³ki̱³tai¹ti²tu³wa².
25 Nxe³ju³tan¹te²kxa³ya̱³lhu² nxe³hĩ¹nãn¹te²tu̱³ wah³nxe³ki̱³ju³ta² ne³ki³son³na³la².
26 Je³su² Kris²tu³jah¹la² yxo²ĩ²yah³lxi¹nha²kxai³ Txa²wã¹sũ̱³na² a²ki³lha³lxa²nũ³lot3txa²lxi³na³la².
27 Te²yã¹nxe³sxã³ yxo²ĩ²yah³lxin¹ju³tan¹te²kxa³ya̱³lhu² ĩ̱³yau³xa² ũ³hũ¹kxi²sa²sai¹yah³lxin¹tai¹ti²tu³wa². Nxe³sxã³ yxo²ĩ²yah³lxin¹ju³ta² e³lxah²lxi³hĩ̱³nx2na³la². Kris²tu³jah¹la² yã¹nxe³te²lo³jah³lxi¹lxa².
28 Nxe³sxã³ yxo²ĩ²yah³lxin¹te² ĩ³nxa² a²yxo²ha³kxa¹ Je³su² Kris²tu³jah¹la² sa³wi³ha³lxi³syah¹lxi¹lxa². Yxah¹lxin¹ju³tan¹te²kxa³ya̱³lhu² Ju³te²an¹te²a² ta̱³nxa² Ju³te²an¹te²sxa³te²a² ta̱³nxa² nxe³yah³lxin¹kxan²ti³ a²wa³kxẽn³yah³lo²lot3sxã³ yxau³te²a² ta̱³nxa² wxa²wa²sut1sxã³ yxau³te²a² ta̱³nxa² nxe³yah³lxin¹kxan²ti³ in³txi³su² ta̱³nxa² tu¹su² ta̱³nxa² nxe³yah³lxi³nũ³nĩn¹kxan²ti³ Txa²wã¹sũ̱³na² yen³nãu³a¹ hxi²kan¹kxi³ju³ta² ã³sen³sai¹nyhu¹kxi³ju³ta³la³ yũ²nxa³wa². A²yxo²ha³kxa¹ yxo²hau³hau³kon³nhĩ̱³ki̱³tã³la².
29 Nxe³ki̱³sa²kxai³ Kris²tu³jah¹la² a²sa³wi³ha³lxi³lon³ki̱³kxai²nãn²tu̱³ A³bra³ãu²ah³la² a²sa³wi³ha³lxi³su² nũ³nhĩ̱³ki̱³tã³la². Nxe³ki̱³kxai²nãn²tu̱³ Txa²wã¹sũ̱³na² ĩ³ye³ũh¹nẽ³lain¹ki³nũ³sa²ki̱³tã³la².