4
Txa²wã¹sũ̱³na² ĩ³ka³li³kxi²sxã³ yxau²xai³ki̱³jau³su²
1 Txa²wã³tã̱³nãu³xãi³. Txa²wã¹sũ̱³na² ĩ³ka³li³kxi²sxã³ yxau³sxã³ kãi³yah³lxin¹ju³ta² ã²la² ĩ³yau¹ũ¹nx2ti³nha¹tai¹ti²tu³wa². Je³su²jah³la² Txa²wã¹hxi²kan¹jah¹la² ĩ³yau¹ũ¹sa²sĩn¹jau³xa² jau¹xain²txi³ ĩ³yau¹ũ¹nx2ti³nha¹tai¹ti²tu³wa². Sa²yxo²we¹jah³lxin¹kaix3 jã¹nxe³sxã³ ã²la² nũ³kxũn³txi³ sa²yxo²we¹ta² wa³to²hi¹jah³lxi³hẽ¹la². Thãi³ti³la² e³kxi¹nx2ti³sĩ¹na¹wa².
2 Nxe³jau³xai²li² Je³su²jah³la² Txa²wã¹hxi²kan¹jah¹la² ĩ³tih³nxe³jau³xain²txi³ ĩ³yau¹ũ¹nx2ti³nha¹tai¹ti²tu³wa².
3 A²nxe³jau³xai²na² Txa²wã¹sũ̱³na² a²ten³jau³xai²la¹wa². Nxe³te³nah¹lxi¹:
— Txa²wãn³txa² yxo²ha³kxa¹ wi¹lĩ²nha²sxã³ sa²yxo²we¹thxa³jah¹lxi³hẽ¹li¹. Ko̱³nxe³thin¹sxã³ ũ³whĩn¹ta³kxi²nyhu¹ah³lxin¹ju³ta² ã³na¹hxa³jah¹lxi³hẽ¹li¹. Nxe³nx2tain¹na³la².
4 Wxa²ẽ¹nãu³ai²na² wi¹lhin¹sxã³ wã²nxũ̱h¹ha̱in³nha¹jah³lxi³hẽ¹la². Yah³lxin¹kxai²nãn²tu̱³ txu¹su² ta̱³nxa² in³txi³su² ta̱³nxa² ko̱³nxe³thin¹sxã³ o²la³kxi²yah²lxan³tho³la². Nxe³ha²kxai³ a²nũ²ai²na² sa²kxai³lu² txu¹su² ta̱³nxa² in³txi³su² ta̱³nxa² so¹yhu¹sxã³ tẽ³khaix1yhu¹te²a² so¹lxi³ ũ³whĩn¹ti³kxai²nãn²tu̱³ wai³nhĩ̱³nx2na³la². Yxãn¹ta¹ a²nũ²a² ã̱³xa² ũ³whĩn¹ti³kxai²nãn²tu̱³ ko̱³nxe³ti³ kãi³hĩ̱³nx2na³la². Te²yã¹nxe³sxã³ in³txai²li² txu¹txa²jah¹lai²li² txu¹ha² ã̱³xa³ka³lxa² ũ³whĩn¹ti³kxai²nãn²tu̱³ wai³nhĩ̱³nx2nxa³wa². Ko̱³nxe³ti³ kãi³hĩ̱³nx2na³la².
5 Nxe³ju³tai²li² Ju³te²a² nũ̱³ka̱³txi³sxa³te²nãu³xa² ko̱³nxe³thin¹sxã³ o²la³kxi²nyhu¹ain¹te²ju²hẽ³la², Txa²wã¹sũ̱³na² wãn³txa² ĩ²ai¹nxa³ha²kxai³la². A²nxe³ju³tai²li² Txa²wã¹sũ̱³na² yxo²kwĩ̱¹kxi²ju³tai²la¹wa².
6 Te²yã¹nxe³ju³ta² a²nũ²a² ã̱³xa² ã³ke³tũ¹sxã³ a²sxe³xa² ũ³whĩn¹ti³yah³lxi³txa³hẽ¹la². Yxãn¹ta¹ nxe³yah³lxin¹kxai²lẽ¹. Txa²wã¹sũ̱³na² hxi²ki³kxai³lu² ĩ³wait1sxã³ ĩ³khãuh³nxe³nx2ti³tu¹wa². Nxe³jau³xai²li² Sũ̱³na² wãn³txi³su² ha²kxai³ e³lai²na¹ e³kxi¹nx2ti³sĩn¹to³ha¹hẽ³la².
7 Jã¹nxe³jut3su² txa²wã¹ẽ¹nãu³ai²na² ko̱³nxe³ti³ o²la³kxi²si¹ki̱³jau³su² ĩ³kaix1so¹nẽ³lxa³tai¹ti²tu³wa², Txa²wã¹sũ̱³na²sa³. Yxãn¹ta¹ Txa²wã¹sũ̱³na² sa³wi³ha³lxa² yã¹nxe² o²la³kxi²si¹ki̱³jau³su² nxe³nẽ³lain¹tai¹ti²tu³wa².
8 Nxe³jau³xai²li² e³kxi¹nx2ta¹jau³xai²na² ĩ²li³te²a² en²sxã³ sa²yxo²ã³yah³lxin¹kxai²nãn²tu̱³ hai³txi³ kwa²wãn³txi³khai³su² en²sxã³ sa²yxo²ã³yah³lxi³hĩ̱³nx2nxã³lxa². Txa²wã¹sũ̱³na² wãn³txi³khai³su² en²sxã³ sa²yxo²ã³yah³lxi³hĩ̱³nxa¹lxa². Nxe³kxa²yu³su² Txa²wã¹sũ̱³na² Yãu³ka³jxah¹la² nxũ²kwa̱i³yxau³nx2ti³jah¹la² en²sxã³ sa²yxo²ã³yah³lxi³hĩ̱³nxa¹lxa². Nxe³jut3su² Txa²wã¹sũ̱³na² hi²sen³kxai³lu² A²yãu³ka³jxah¹la² ũ³hũ¹nx2ti³jah¹lai²la¹wa².
9 Nxa²ha¹te¹ yxo²ĩ²yah³lxin¹te² ĩ³nxa² a³lxi²waun¹nyhah¹lxin¹ju³ta² a³la³kxi²yah³lxi¹lxa². Txa²wã¹sũ̱³na² hi²sen³kxai³lu² jau¹xain²txi³ ã²la² ĩ³yau¹ũ¹nx2ti³tai¹ti²tu³wa².
10 Txa²wã³tã̱³nãu³xãi³. Yxo²ĩ²tũ̱³ka̱³txa² Ma³se³to²na²ko³xan¹te²a² hãi¹nxe³ti³xa¹ a³lxi²nũ¹hain¹yah³lxi³ta¹hi¹nhẽ¹la². Ĩ³a³lxi² kãin²non³tain¹yah³lxi³hẽ¹la². Thãi³ti³la² e³kxi¹nx2ti³sĩ¹na¹wa².
11 Ha³nxeh³lxa³ti³nha²sxã³ yxau³ya³nyhu¹ah³lxi³txa³hẽ¹la². Jã¹nxe³sxã³ a²nũ²a² ã̱³xa² a²wa³ka³li³yu³ta² wxa²wxai³kxi²yhu¹ah³lxi³txa³hẽ¹la². Wi¹yxau³yah³lxin¹ju³ta² a²yen³kxa² wã²nxũ̱h¹lxi³ wa³kon³sxã³ so¹jah³lxi³hẽ¹la². Nxe³jau³xa² whãi²na¹ kwa³na³nxa²lxa¹jau³xai³txa³lxi²na³la². Wi¹wi¹nxe² ãn³ten³jah¹lxi³sxã³ kãi³jah³lxi³hẽ¹la².
12 Jã¹nxe³sxã³ nxe³yah³lxin¹kxai²nãn²tu̱³ Txa²wã¹sũ̱³na² wãn³txa² yxo²ĩ²xa³te²a² sa²nẽn¹ki¹nx2tain¹tu¹wa². Nxe³nx2tai¹nha²kxai³ wxa²yen³kxa² hxan³kxi¹nx2ti³xa³lho³la².
Txa²wã¹hxi²kan¹ta² Si³yxau³jah¹la² a³ka³nxi²sxã³ wa̱³li²jau³su²
13 Txa²wã³tã̱³nãu³xãi³. Wãn³txa² tah²yau³xa² ĩ³tih³nxe³nx2ti³sĩ¹na¹tu¹wa². A²nũ²a² Je³su²jah³lai²na² wãn³txa² yxo²ĩ²te²ki̱³nãu¹xai²na² ya³lu²ki̱³ju³ta² ĩ³yau¹ũ¹nx2ti³sĩ¹na¹tu¹wa². Nxe³ju³ta²sa¹ ya³lu²ki̱³kxai²nãn²tu̱³ kãin² ãin²ti³yah³lxi³txa³hẽ¹la². A²nũ²ai²li² Je³su²jah³lai²na² wãn³txa² yxo²ĩ²xa³te²su² te²a² Je³su²jah³lai²li² a³ka³nxi²ju³ta³nũ³a² wah³nxai¹nxa³ha²kxai³ kãin² ĩ³ãin²ta³kxi²nha²ha²kxai³ nxe³hĩ̱³nx2na³la². Ta¹ wxãi²na² ti³he¹yxah³lxan³tho³la².
14 Nxe³ha²kxai³ kã³nhxĩ¹nai³kxai³ Je³su²jah³la² ya³lu²ta¹hxai²ti³ai¹ti²tu³wa². Nxe³to³ta¹ a²nũ²khai³su² ka³te̱n³su² ĩ³sa²yxau³xi²ta¹hxai²ti³ai¹ti²tu³wa². Jau¹xai²na² ya²la³tu̱³ yxo²ĩ²ki̱³tã³la². Jã¹nxe³kxe³hũ̱³nxe² yxo²ĩ²sxã³ ya²lun¹ti³tũ̱³ka̱³txai²na² yxo²ha³kxa¹ Txa²wã¹sũ̱³na² ka³te̱n³su² tẽ³xi²tu¹wa², Je³su²jah³la² a³ka³nxi²tãu³a²sa³. Jau¹xai²li² hxi²kan¹txi³ yxo²ĩ²nũn³ki̱³tã³la².
15 Nxe³hĩ¹na¹ a³ka³nxi²tãu³ Sũ̱³na² wãn³txa² yxo²ĩ²sxã³ ya²lun¹ti³tũ̱³ka̱³txa² txa²nũ² a²nũ²khai³su² tẽ³sxã³ ĩ³ka³te̱n³su² ti³hit1sxã³ a³ka³nxi²tu¹wa². Txai²na¹xai²na¹ ka³te̱n³su² yxau³te²ki̱³nãu¹xai²na² ã³sxã³ ne³ka³ta²nẽ³lain¹tu¹wa². A²nxe³jau³xai²na² Txa²wã¹sũ̱³na² wãn³txi³khai³xai²la¹wa².
16 Jã¹nxe³ju³kxai³lu² Txa²wã¹hxi²kan¹ta² Si³yxau³jah¹la² kãin² ĩ³kaix1sxã³ a³ka³nxi² oh³xan¹jah¹la² a²hxi²kan¹te²su² te²a² kãin² wxa¹ni² Txa²wã¹sũ̱³na² wãi²lhũ̱³ka³txa² wxa²no²la³kxi² nxe³sxã³ a³ka³nxi²tu¹wa². Je³su²jah³lai²na² wãn³txa² yxo²ĩ²sxã³ ya²lun¹ti³tũ̱³ka̱³txa² ka³te̱n³su² ĩ³sa²yxau³sxã³ ka³la³nũ¹hain¹sãn²tu¹wa².
17 Nxe³hĩ¹na¹ txa²wã¹ki̱³nãu¹xai²na² yxo²ĩ²ki̱³tũ̱³ka̱³txi³ki̱³nãu¹xai²na² yuh³xan¹ko³xa² ka³te̱n³su² yxau³tũ̱³ka̱³txi³ki̱³nãu¹xai²na² sa²so¹xi²nẽ³lha²kxai³ ĩ³ka³la³si¹nhẽ³tu¹wa². Nxe³ti̱³kxai³lu² oh³sĩ̱³nãu³a¹ yxo²ĩ²sxã³ ya²lun¹ti³tũ̱³ka̱³txai²na² kwẽn¹ta¹ a²nũ²khai³su² ka³te̱n³su² ĩ³sa²yxau³sxã³ ka³la³nũ¹hain¹tũ̱³ka̱³txai²na² Txa²wã¹hxi²kan¹ta² Si³yxau³jah¹la² kwẽn¹ta² a³ka³nxi²ya³hain¹tũ̱³ka̱³txai²na² ĩ³ha¹txain¹ki̱³tu¹wa². Nxe³ki̱³sĩ¹nãn¹te²tu̱³ Txa²wã¹hxi²kan¹ta² Si³yxau³jah¹la² yxau²xai³la³kxi²ki̱³tu¹wa². ósxã³ yxau²xai³ti³hex1ki̱³sxa³lho³la².
18 Nxe³ju³tai²li² wãn³txi³khai³xai²la¹wa². Ki³han³nxa³wa². Nxe³jut3su² ĩ³nxũ²kwa̱i³lxũ¹nyhu¹te³lhxã³ ĩ³yau¹ũ³nha¹jah³lxi³hẽ¹la². Je³su²jah³la² wãn³txa² yxo²ĩ²te²na² ya³lu²ju³ta² ĩ³ãin²txi¹nx2ti³kxa²ya̱n³txi³su² jau¹xai²na² ĩ³yau¹ũ¹jah³lxi³hẽ¹la².