4
Yuh³xai²nãn¹ta² wãn³txa² sa²yxo²we¹ki̱³jau³su²
1 Nxa²ha¹te¹ ĩh¹nxe³kxa²ya̱n³ti³ta̱³ ĩ³ye³ĩ³yi²lhon¹ta³kxah¹lxin¹ji¹wa²? Ĩh¹nxe³kxa²ya̱n³ti³ta̱³ he¹kxi²nyhu¹ah³lxin¹ji¹wa²? Wxa²ẽ¹nãu³ai²na² ko̱³txi³ e³kxi²nha²sxã³ yxo²kwa̱i³no³nyhah¹lxi¹nha²kxai³ he¹lah³lxin¹ta²wa².
2 Yen³kxi³la³ yũ³nx2ti³xa³kxe³su² ya³ni̱³li³yah³lxi¹nha²kxai³ ai³lhxã³ so¹kxi²te³lhxã³ a²nũ²a² ĩ³ye³ĩ³yi²lhon¹ta³kxah¹lxi³hĩ̱³nxa¹lxa². Kãin² yxo²kwa̱in³yah³lxin¹kxan²ti³ hai³txi³ so¹kxah²lxi³hĩ̱³nx2nxa³lxa². Yxah²lxa³nha²kxai³ kãin² he¹kxi²nyhu¹i² su²lhã³nyhu¹i² yah³lxin¹ta²wa². Ju¹tai²na² wai³nhĩ̱³nx2nxa³wa². Nxe³yãn¹ta¹ Txa²wã¹sũ̱³na² e³kxah²lxa³nha²kxai³ yũ³nx2ti³xan³ta²wa².
3 Te²yã¹nxe³sxã³ Txa²wã¹sũ̱³na² e³kxi²yah³lxin¹tãu³a² ko̱³nxe² ĩ³wã̱³txi³yah³lxi¹nha²kxai³ ũ³hũ¹nx2ti³xan³ta²wa². Kwa² wa³ni̱³lon³te³lhxã³ yen³kxa² ĩ³wã̱³jah³lxin¹ta²wa².
4 Kuh³lxa³thin¹ta¹ka³lxa² yã¹yxah³lxi¹lxa². A²nxe³ta¹ka³lxai²na² sa²kxai³lu² in³txa² ã̱³xa² ko̱³nxe³ti³ yxo²kwa̱i³nha²kxai³ a²wẽ³sãi¹ah³lo²khai³xa² ã³na¹sãn²nũ²la² in³txa² ã̱³xa²kxai³lu² ko̱³nxe³ti³ a̱³nyhu¹te²ju²hẽ³la². A̱³nyhu¹kxa²yu³su² a²wẽ³sãi¹yah³lai²na² te²hi²sen³kxai³lu² in³txa² ã̱³xa²kxai³lu² ũ³ha³lo²sa²tã³hĩ̱³nx2na³la². Jã¹nxe³kxe³hũ̱³nxe² wxãi²nãu³xai²nãn²ta³ Txa²wã¹sũ̱³na² wãn³txa² sa²yxo²we¹jah³lxi³ta¹hi¹nhẽ¹la². Yxah³lxin¹ta¹ yuh³xai²nãn¹ta² wãn³txa² ain³kxi² ã³si³wxe³yah³lxin¹kxai²nãn²tu̱³ Txa²wã¹sũ̱³na² te²hi²sen³kxai³lu² ĩ³a̱n³ta³kxi¹nx2ti³tu¹wa². Nxe³sxã³ yuh³xai²nãn¹ta² wãn³txan²tu̱³ sa²yxo²we¹jah³lxin¹kxai²nãn²tu̱³ Txa²wã¹sũ̱³na² ya̱³lxi²yah³lxa³lxa². A²ko̱¹ko̱¹nũ̱³ka̱³txi³su² yah³lxi¹lxa².
5 Te²yã¹nxe³jut3su² Txa²wã¹sũ̱³na² ũ³wha²li¹txã³nxai³tã² nxe³te³nah¹lxi¹:
— Txa²wã¹sũ̱³na² Yãu³ka³jxah¹la² ĩ³nxũ²kwa̱i³wi¹nhẽ³jah¹la² wi¹lhau³ko³tẽ³na³li¹, ko̱³nxe³ti³ kãi³ki̱³kxa²ya̱n³txi³su¹. A³lxi²khaix1nẽ³na³li¹. A²ẽ¹na² a̱u³txi³ yxo²kwa̱in³nẽ³na³li¹. Nxe³jau³jau¹xai²na² kwa²wãn³txi³sxa³wa². Ya²la³lyau³xai²la¹wa².
6 Nxe³sxã³ ĩ³nxũ²kwa̱i³lxũ¹nẽ³lha²kxai³ ko̱³nxe³ti³ yxo²kwa̱in³nẽ³lxa³lho³la². Txa²wã¹sũ̱³na² ũ³wha²li¹txã³nxai³tã² nxe³te³nah¹lxi¹:
— Txa²wã¹sũ̱³na² sa²kxai³lu² a²nũ²a² yxo²kãin²e³te²su² te²a² ã³na¹ha²kxai³ a²nũ²a² yxo²kãin²e³xa³te²su² te²a² ĩ³nxũ²kwa̱i³lxũ¹nha²kxai³ nxain¹tu¹wi¹. Nxe³ta¹hxai²hẽ¹la².
7 Jã¹nxe³jut3su² Txa²wã¹sũ̱³na² sa²yxo²we¹jah¹lxi³hẽ¹la². A²ta³a² a²hxi²kan¹jah³la² wxã³sxã³ ĩ³ye³kxi¹nx2ti³kxan²ti³ ĩ³wa²lũ³xah³lxin¹te³nah¹lxi¹:
— Wxa²wãn³txa² ten³sa²sĩ¹nxa³nhai¹. Txa²wã¹sũ̱³na² wãn³txa² so¹lxi³ ten³sĩ¹na¹wi¹. Yxah³lxin¹jau³su² kxai²nãn²tu̱³ ã³waix3je¹nx2ti³tu¹wa².
8 Txa²wã¹sũ̱³na² ĩ²sa²tẽ³kxi¹jah³lxi³hẽ¹la². Yxah³lxin¹kxai²nãn²tu̱³ Txa²wã¹sũ̱³na² ĩ²sa²tẽ³nxa²lxi³nũn³tu¹wa². Nxe³ha²kxai³ ko̱³nxe³ti³ kãi³yah³lxin¹kxai²nãn²tu̱³ wxa²hxi²khai²lxa²lxin¹kxa² yã¹nxe³sxã³ ko̱³nxe³ju³ta² ã³na¹jah¹lxi³hẽ¹la². Te²yã¹nxe³sxã³ Txa²wã¹sũ̱³na² wãn³txa² wã̱³jah³lxin¹kxai²nãn²tu̱³ wxa²ẽ¹nãu³ai²na² ĩ³ha³na³ti³nha¹jah³lxi³hẽ¹la². Txa²wã¹sũ̱³na² wãn³txa² so¹lxi³ yxo²ĩ²jah³lxi³hẽ¹la².
9 Ĩ³ãin²ta³kxi²nha¹jah³lxi³hẽ¹la², ko̱³nxe³ti³ kãi³yah³lxi¹nha²kxai³la². Ĩ³wxan¹sxã³ nã̱n³jah¹lxi³hẽ¹la², Yxo²ka³lxi³nyhah¹lxin¹jau³xa²kxai³ ã³na¹sxã³ ĩ³nã̱n³jah¹lxi³hẽ¹la². Yxo²ka³lxi³nyhah¹lxin¹jau³xa²kxai³ ã³na¹sxã³ ĩ³ãin²ta³kxi²nha¹jah³lxi³hẽ¹la².
10 Yxah³lxin¹kxai²nãn²tu̱³ Txa²wã¹sũ̱³na² e³kxain¹yah³lxin¹te³nah¹lxi¹:
— Sũ̱³nãi³. Ain³kxi¹sẽ¹li¹. Ko̱³nxe³ti³ kãi³jah¹lo²sa¹wi¹. Yxãn¹ta¹ ĩ³ãin²ta³kxi²nha¹nhai¹. Nxĩn¹jau³su² kxai²nãn²tu̱³ ye³jen¹nãu³a² ĩ³nxũ²kwa̱i³lxũ¹txi³sxã³ ã³nho̱³kxi¹nx2ti³tu¹wa². Wxa²ẽ¹nãu³ai²na² tah²lxi³ we¹nxi¹nx2ti³tu¹wa².
A²nũ²a² ã̱³xa² ko̱³nxe³te²lo³kxi²ki̱³jau³su²
11 Txa²wã³tã̱³nãu³xãi³. Ko̱³nxe³te²lo³nyhah¹lxi³txa³hẽ¹la². Nxe³sxã³ ko̱³nxe³te²lo³ta̱³nxa² wxa²ya̱³la² ko̱³nxe³ti³ ĩ³yĩ¹li²ta̱³nxa² yxah³lxin¹kxai²nãn²tu̱³ Txa²wã¹sũ̱³na² ũ³wha²li¹jau³xai³tã² ko̱³nxe³te²lo³ti² ko̱³nxe³ti³ ĩ³yĩ¹li²hi² yxah³lxi³nũ³nhĩ̱³nxa¹lxa². Hãi¹sxã³ Txa²wã¹sũ̱³na² wãn³txa² sa²yxo²we¹jah³lxi³hẽ¹la². A²nxe³jau³jau¹xai²na² wain³ta̱³nxa² wai³nxa³ta̱³nxa² nũ¹hĩ²sxã³ ĩ³yĩ¹li²yah³lxi³txa³hẽ¹la².
12 Txa²wã¹sũ̱³na² so¹lxi³ kwa³na³jau³xai²li² hxi²kan¹txi³ ĩ³ye³kxi²jah¹lai²la¹wa². Jah¹la² so¹lxi³ o²la³kxi²ki̱³ju³ta² wi¹ta̱³nxa² ko̱³nxe³ta̱³nxa² a³ya³txi²jah¹lai²la¹wa². Jah¹la² so¹lxi³ a²nũ²a² sa²wa²su¹ta̱³nxa² ã³na¹hxa³ta̱³nxa² hxi²kan¹jah¹lai²la¹wa². Nxe³ha²kxai³ wxãi²na² sa²kxai³lu² wxa²ẽ¹nãn¹jau³kxai³lu¹:
— Hxi²kan¹jah¹lo²sa¹xã¹, txai²lã¹. Nxa¹ha²kxai³ txa²wã³tã̱³xa² yxo²ĩ²jah¹lan²ta³ a²ko̱³nxe³ti³ kãi³ju³ta² ko̱³nxe³ti³ ĩ³yĩ¹li²na¹ju³ta² hxi²ka¹na¹xã¹. Nxĩn¹jau³su² nxe² e³kxi²nha²yah³lxi³txa³hẽ¹la².
“Ka³nxa³ha²ta² nxe² kãi³a¹tũ¹xã¹.” Nxe³ki̱³jau³su²
13 Nxe³jah³lxi³sa²lxa². Yxo²kãin²e³yah³lxi³txa³hẽ¹la². Nxe³yah³lxin¹te³nah¹lxi¹:
— Hĩ¹na² ta̱³nxa² ka³nxa³ha²tai²la³ ta̱³nxa² sxi²jen³na² kãin²je³na² ai³na¹tu¹wi¹. Na¹kxai²nãn²tu̱³ ye³ka³na³ka³nat3sxã³ kwẽ³kon³tãu³a¹ yxau³sxã³ yen³kxa² kãin² so¹kxi²na¹tu¹wi¹. Nxe³jau³xai²na² yxo²kãin²e³yah³lxi³txa³hẽ¹la².
14 Ka³nxa³ha²ta̱n³na²su² hxi²kan¹txi³ ĩ²ki̱³sxa³wa². Ya³lu²ta̱³nxa² ka³te̱n³su² yxau³ta̱³nxa² nxe³ki̱³sxa³lho³la². Kan²txi³ yxau³ki̱³te²sxa³yu²hẽ³la². Ha³lo²a² wi³ki̱²ta² yã¹ki̱³tã³la². Ha³lo²a² wi³ki̱²tai²li² wa³su³txi³ tĩ¹te²ju²hẽ³la². Te²yã¹nxe³sxã³ kan²txi³ yxau³ki̱³sxa³lho³la².
15 Nxe³yãn¹ta¹ nxe²e³yah³lxin¹jau³nũ³a² wai³nhĩ̱³nx2na³la². Nxe³yah³lxin¹te³nah¹lxi¹:
— Nxe² kãi³ta̱³nxa² nxe² ã³nxai³ta̱³nxa² Txa²wã¹sũ̱³na² a²ten³jut3su² kxai²nãn²tu̱³ nxa¹tu¹wi¹. Nxe³yah³lxin¹jau³su² nxe²e³yah³lxin¹kxai²nãn²tu̱³ wai³nhĩ̱³nx2na³la².
16 Nxẽn²nxa³kxai²nãn²tu̱³ yxo²kãin² e³yah³lxi³hĩ̱³nxa¹lxa². A²nxe³jau³xai²li² ko̱³nxe³ti³ kãi³yah³lxi³hĩ̱³nxa¹lxa².
17 Nxe³ha²kxai³ wi¹lĩ²nha¹jah¹lxi³hẽ¹la². Wain³jau³xai²li² ã³ne³wxe³yah³lxi¹nha²kxai³ sa²yxo²we¹jah³lxi³hẽ¹la². Yxãn¹ta¹ sa²yxo²we¹jah²lxan³kxai²nãn²tu̱³ ko̱³nxe³ti³ kãi³yah³lxi³hĩ̱³nxa¹lxa².