3
Txa²wã¹hxi²kan¹ta² Si³yxau³jah¹la² a³ka³nxi²sxã³ wxã³ju³ta²nũ³su²
1 Txa²wã³tã̱³yah³lxi¹lxa². A³lxi¹nx2ta¹nha²wa². Ha³te̱h³nxã³nxa² ũ³wha²li¹la³kxi¹nx2ta¹tai¹ti²ti¹. Jã¹nxe³nx2ta¹tu¹wi¹. Nxe³nx2ta¹txã³nxai²na² sa²kxai³lu² wxa²ẽ¹nãu³ai²na² wã²nxũ̱¹ha̱in³nyhah¹lxin¹kxa² wi¹lhin¹ju³ta² so¹lxi³ wã²nxũ̱¹ha̱in³nha²yah³lxin¹ju³ta³nũ³a² ten³sa³nhai¹. Nxe³nx2ta¹jau³su² nxe³ye¹nx2ta¹wa².
2 Wãn³txa² kxã³nxu¹tai²nãn¹jau³xai²na² Txa²wã¹sũ̱³na² wãn³txa² hen³txi³si¹tũ̱³ka̱³txu¹tai²nãn¹jau³xa² ĩ³sa²wa³la³kxi¹nx2ti³ha²kxai³ wãn³txa² Je³su²jah³la² Txa²wã¹hxi²kan¹ta² Si³yxau³jah¹lai²na² txa²wã¹ẽ¹nãu³ai²na² sa²hau³ko³tũ¹nhẽ³jah¹lai²na² wãn³txa² kwa³na³kxi²nẽ³jau³xai³tã² nxe³jau³xai²na² Sũ̱³na² ĩ³kaix1so¹tũ̱³ka̱³txa² ĩ³sa²si¹hã³ũh¹nx2tain¹tũ̱³ka̱³txa² wi¹lhin¹khai¹nxe³tũ̱³ka̱³txa² wãn³txai³tã² ĩ³sa²wa³la³kxi¹nx2ti³ha²kxai³ nxe³si¹nx2ta¹jau³su¹ nxe³ye¹nx2ta¹wa².
3 A²nxe³jau³su² wi¹lĩ²nha¹jah¹lxi³hẽ¹la². Txa²wã¹ha³lo²a² ne³ki³so³nhxan³je³na³wa³kxa² a²nũ²a² kuh³lxa³thin¹te²a² wxã³yain¹tu¹wa². Wxã³yain¹te²kxai³lu² kuh³lxa³thin¹ju³ta² so¹lxi³ kãi³si¹hain¹tu¹wa². Ko̱³nxe³ti³ yxo²kwa³lxi³txa²lxain¹tu¹wa².
4 Ĩ³ki³ha¹kxi¹nxa²lxain¹tu¹wa². Nxe³nxa²lxain¹te³nah¹lxi¹:
— Je³su²jah³lai¹tã² wa̱³li²xi²jau³nũ³su² ain³kxi²ki̱³tai¹ti²tu³wi¹. Nxe³yãn¹ta¹ ĩh¹nũ¹la³ta̱³ he¹ji¹ku¹, ki̱³nhai¹. Txa²wã¹yah³la²nãu³xa² ya³lu²kxi²nẽ³tai¹ti²tu³wi¹. Yxãn¹ta¹ wa̱³la² ĩ³xi²nxa³te²tai¹ti²tu³wi¹. Txa²wã¹ha³lo²a² kxã³nhxĩ¹nu¹tai²na² wã²nxũ̱h¹ yũ³si¹jau³nũ³su² ĩ³ye³ta¹hxai²ti³ai¹ti²tu³wi¹. Nxe³ta¹ nxe³hĩ¹nãn¹te²tu̱³ ha³lo²ai²na² wã²nxũ̱h¹ yũ³hĩ¹nu¹jã¹nxe² ai²sa²tẽ³te²ju²hẽ³li¹. Yxãn¹ta¹ wa̱³li²te²sxa³jai¹ti²tu³wi¹. Nxain¹jau³su² ĩ³ki³ha¹kxi¹nxa²lxai¹nha³ta²wa².
5 Jã¹nxain¹jau³su² wãn³txa² a²ya³la³tu̱³jau³xa² te³nai¹nxa³jau³su² kwa²sa²tã³ain¹te²ju²hẽ³la². Nxe³jau³xa²sa¹. A²wi¹lhĩ¹nu¹tai²na² Txa²wã¹sũ̱³na² hi²sen³kxai³lu² wãn³txa² so¹lxi³ e³ha²kxai³ yen³kxa² ĩ³yũ¹ta¹hxai²ti³ai¹ti²tu³wa². Txa²wã¹oh³xan¹ko³xai²na² wã²nxũ̱h¹ yũ³si¹jau³nũ³su² ĩ³ye³ta¹hxai²ti³ai¹ti²tu³wa². Nxe³te³nu¹tai²na¹ txa²wã¹ha³lo²ai²na² yuh³xan¹ko³xai²na² ĩ̱³yau³xa² sa²sai¹sxã³ wa³si³sin³ko³xa² we¹ta¹hxai²ti³ai¹ti²tu³wa². Nxe³te³nu¹tai²na¹ ĩ̱³yau³xai²na² nxũ²kwa̱i³ye³la³nãu³a¹ ha³lo²a² wa³si³sin³ko³xa² wet1sa²tẽ³ta¹hxai²ti³ai¹ti²tu³wa².
6 Hã²wxãn³txa³nũ² jũ¹nxa² yan¹nãu³u¹tai²na¹ No³e²ah³lu¹tai²na² yxau²xai³ta¹hxai²hẽ¹la². Nxe³tãu³u¹tai²na² ĩ̱³yau³xai²na² sa²kxai³lu² txa²wã¹yuh³xan¹ko³xai²li² a²nũ²a² yxau²xai³lain¹tũ̱³ka̱³txai²li² whãi²na¹ hũ̱x1sxã³ hxat3si¹ta¹hxai²ti³ai¹ti²tu³wa².
7 Jã¹nxe³jut3su² oh³xan¹ko³xai²na² hĩ¹na² ĩ²ki̱³ko³xai²na² yuh³xai²nãn¹ko³xai²na² hĩ¹na² ĩ²ki̱³ko³xai²na² nxe³sxã³ te²yã¹nxe³sxã³ hũx1sxã³ hxat3sih¹xah³lho³la². Txa²wã¹sũ̱³na² a²yxo²wãn³txu¹txai²na² e³ju³tan¹te²kxa³ya̱³lhu² ko̱³nxe³te²la³ a³ya³txi²kxe³nũ³a² ũh³wxe³na²hẽ³la². Nxe³te³na¹ ha³lo²ai²na² whãi²na¹ Txa²wã¹sũ̱³na² wãn³txu¹tai²na² we¹ta³lun²si¹ja³kxa³nũ³su² ha³nxe²a² i̱³ju³ta² i̱³hxan³si¹tu¹wa². Nxe³tãu³ãn²tu̱³ a²nũ²a² ko̱³nxe³thin¹te²nãu³xai²na² a²yxo²ha³kxa¹ ko̱³nxe³ti³ ĩ³yĩ¹li²ha²kxai³ ko̱³nxe³thin¹kxa² yo³ha² ũ³hũ¹ai¹nha²kxai³ nxe³ain¹tu¹wa².
8 Nxe³nxa²ha¹te¹ txa²wã³tã̱³nãu³yah³lxin¹te²nãu³ ĩ³nxa² sa²kxai³lu² a³lxi¹nx2ta¹wa². Nxe³nx2ta¹ha²kxai³ wãn³txa² e³kxi¹nx2ta¹jau³nũ³a² ne³wã²na³ah³lxi³txa³hẽ¹la². Txa²wã¹sũ̱³na² yen³nãu³a² a³la²ni²kxi³ju³ta² ã³ta³lo³wa³to²hi² ai³ki̱³ju³ta³nũ³a² yũ²nxa³wa². Ye³ka³na³ka³nat3sxã³ a³la²ni²kxi³ju³tain²txi³ ye³ka³lxa¹txi³ a³la²ni²xi²kxi³ju³tain²txi³ te²yã¹nxe² ain²na³la².
9 Nxe³jut3su² Txa²wã¹sũ̱³na² wãn³txu¹tai²na² e³kxi²nẽ³jau³xu¹tai²na² win¹ta²te²lxi³ wxã³nũ¹nhẽ³jau³su² ti³he¹nxa³wa². Nxe³yãn¹ta¹ thãi³ti³la² ya³nãn³ta³ki²la²sxã³ wah³nxe³nx2ti³na³la². A²nũ²a² ĩ²li³hxa³te²lxi³ ko̱³nxe³ti³ kãi³te²a² ko̱³nxe³ti³ kãi³kxa² yo³ha² ũ³hũ¹ain¹kxe³nũ³su² ĩ³ka³lxi¹lhxi²nxa³wa². Nxe²nxa³ha²kxai³ a²ẽ¹nãu³ai²na² ĩ³ãin²ta³kxi²nha¹jau³nũ³su² wah³nxe³tu¹wa², a²ẽ¹nãu³ai²na² wxa²wa²su¹te³lha³ka³.
10 Nxe³ha²kxai³ Txa²wã¹hxi²kan¹ta² Si³yxau³jah¹la² wxã³ju³ta²nũ³a² wa³su¹txi³ wxã³tu¹wa². A²nũ²a² kuh³lxa³sin¹jah¹lai²li² yen³kxa² kãi³kxi²te³lhxã³ wa³su³txi³ wxã³ti³hũ̱³nxe³ Txa²wã¹hxi²kan¹ta² Si³yxau³jah¹la² wxã³ju³ta²nũ³a² wa³su¹txi³ wxã³tu¹wa². Nxe³kxai²nãn²tu̱³ o³sĩ̱³nai²li² kãin²nxon³sãn²sxã³ ne³ki³son³tu¹wa². U³je³na³kai²na² i³la³kxai²na² hi³ka²ta³ai²na² nxe³sxã³ kãin² ĩ³lat1sa²kxai³ i̱³hxa³nain¹tu¹wa². Yuh³xai²nãn¹ta² ko̱³xa² te²na² yuh³xan¹ta² yen³kxa² te²na² a²yxo²ha³kxa¹ ũ³thũ²ha²kxai³ i̱³hxan³tu¹wa².
11 Jã¹nxe³ha²kxai³ yen³kxai²li² a²yxo²ha³kxa¹ ũ³thũ²hxa³kxe³nũ³su² yũ³ju³tan¹te²kxa³ya̱³lhu² wxa²ẽ¹nãu³ai²na² ĩ²nha²khai¹nxe³jah³lxi³hẽ¹la². Wi¹lhin¹ju³ta² so¹lxi³ kãi³jah³lxi³hẽ¹la². Txa²wã¹sũ̱³na² wãn³txa² whãi²na¹ sa²yxo²wet1sxã³ yxau²xai³jah¹lxi³hẽ¹la².
12 Txa²wã¹sũ̱³na² Si³yxau³tãu³ai²na² wxã³ju³ta²nũ³a² wahx3yah³lxin¹tãu³a² wa³su¹txi³ wxã³si¹ja³kxa³nũ³su² ã³ten³jah¹lxi³hẽ¹la². Wxã³kxai²nãn²tu̱³ o³sĩ̱³nãn²tu̱³ ũ³thũ²hxat3sa²kxai³ u³je³na³kai²na² i³la³kxai²na² hi³ka²ta³ai²na² kãin² ĩ³lat1sxã³ ĩ³ha³lxin¹nhxan³tu¹wa².
13 Kxã³nhxĩ¹nai³tã² Txa²wã¹sũ̱³na² ũ³wha²li¹txã³nxa² nxe³te³nah¹lxi¹:
— Kxã³nãu³a¹ o³sĩ̱³na² tah²ko³xa² ĩ³yũ¹ta¹ha²kxai³ yuh³xan¹ko³xa² tah²ko³xa² ĩ³yũ¹ta¹ha²kxai³ nxa¹tu¹wi¹. Nxe³na¹kxai²nãn²tu̱³ wi¹lhin¹ju³ta² so¹lxi³ yũ²sa²tẽ³tu¹wi¹. Nxe³ta¹hxai²ti³ai¹ti²tu³wa². Nxe³jau³xai²na² wxã³si¹ja³kxa³nũ³su² wah³nxe³ki̱³tã³la².
14 A²nxe³jut3su² a³lxi¹nx2ta¹nha²wa². Ju³ta³nũ³a² wahx3yah³lxi¹nha²kxai³ wi¹lo²la³kxi¹jah³lxi³hẽ¹la². Sũ̱³na² wãn³txa² sa²yxo²we¹jah³lxi³hẽ¹la². Yah³lxin¹ju³tan¹te²kxa³ya̱³lhu². Sũ̱³nu²kxai³lu² ĩ³ye³kxi¹nx2ti³tu¹wa². Ĩ³ye³kxi¹nx2ti³te³nah¹lxi¹:
— Wxãi²li² wain³txi³ sa²yxo²wet1sah¹lxi¹lxi¹. Ko̱³nxe³ti³ kãi³yah³lxin¹ju³ta² ã³wa²su¹tũ¹nx2ti³ha²kxai³ hĩ³na² ĩ²nxa³wi¹. Hãu²not3sxã³ yxau³nũ¹sah¹lxi¹lxi¹. Sũ̱³na² wãn³txa² nxe³nx2ti³tu¹wa².
15 Jã¹nxe³ju³kxai³lu² wxa²ẽ¹nãu³ai²na² sa²hau³kot3nha²si¹jau³su² Txa²wã¹sũ̱³na² hxi²ka² ko̱³nxe³ti³ ĩ³yĩ¹li²hain¹ti³wa³kxa² wa³su¹txi³ wxã²nxa³hẽ¹la². Nxe³ju³tai²na² a²yxo²ha³kxa¹ Pau²lah³lai²li² txa²wã¹wã³tã̱³su² a³lxi²ki̱³jah¹lai²li² te²yãx1jau³su² ũ³wha²li¹la³kxi²nẽ³tai¹ti²tu³wa². A²hoh³lxi³khaix1sa²jah¹lai²la¹wa². Nxe³sxã³ ĩ³tih³nxe³nẽ³te²jai¹ti²tu³wa².
16 Jã¹nxe³sxã³ Pau²lah³lai²na² ha³te̱h³nxã³nxãn¹jau³su² jau¹xai²na² whãi²na¹ ĩ³yau¹ũ¹nhẽ³te²jai¹ti²tu³wa². A²nxe³jau³xai²na² wa³le̱³jau³xa² yũ³nũn³na³la². A²nxe³jau³jau¹xai²na² a²nũ²ai²nãn²tu̱³ Sũ̱³na² ũ³wha²li¹txã³nxa² ĩ²ai¹nxa³te²nãn²tu̱³ ã³ne³wxe³ai¹nxa³wa². A²nũ²ai²nãn²tu̱³ Sũ̱³na² ũ³wha²li¹txã³nxa² kan²txi³ i³ai¹nxa³te²nãn²tu̱³ ka²yãu¹ka²yãu¹txi³ ã³ne³wxe³ain¹na³la². Nxe³sxã³ Sũ̱³na² ũ³wha²li¹txã³nxa² hãi¹nxe³ti³xa¹ te²yã¹nxe² ka²yãu¹ka²yãu¹txi³sxã³ ã³ne³wxe³ain¹na³la². Nxe²kãi³ai¹nha²kxai³ a²ẽ¹nãu³ai²na² hai³txi³ wi¹lhi¹nai¹nxa³wa². Kxã³nãu³a¹ Txa²wã¹sũ̱³na² hi²sen³kxai³lu² ko̱³nxe³ti³ ĩ³yĩ¹li²hain¹tu¹wa². Ko̱³nxe³ti³ ĩ³yĩ¹li²hai¹nha²kxai³ khãuh³lxa³txi³sa²tẽ³ain¹ju³ta³nũ³a² yũ³yain¹tu¹wa².
17 Jã¹nxe³jut3su² wxãi²nãn²tu̱³ a³lxi¹nx2ta¹nha²wa². Jau³jau¹xai²na² wi¹ko̱³nha²yah³lxi¹lxa². Wi¹ko̱³nha²yah³lxi¹nha²kxai³ ĩ²nha²khai¹nxe³jah³lxi³hẽ¹la². Yxãn¹ta¹ nxe³yah²lxan³kxai²nãn²tu̱³ a²nũ²ai²na² Sũ̱³na² wãn³txa² sa²yxo²we¹txa³te²yã¹nxe² yah³lxi³te²sa²hĩ̱³nxa¹lxa³. Yah³lxin¹kxai²nãn²tu̱³ ha³yax3khi¹nã³ yxo²ĩ²yah³lxi¹nha³ta²wa².
18 Nxe³yãn¹ta¹ te²yã¹nxe² kãi³yah³lxi³txa³hẽ¹la². Je³su² Kris²tu³jah¹la² Txa²wã¹hxi²kan¹ta² Si³yxau³jah¹lai²na² txa²wã¹ẽ¹nãu³ai²na² sa²hau³ko³tũ¹nhẽ³jah¹lai²na² kãin² thãi³ti³la² a³lxi¹nx2ti³ju³ta² ã²la² kãi²non³ju³ta³nũ³a² ã³ten³jah¹lxi³hẽ¹la². Jah¹lai²li² ã²la² kãi²non³sxã³ a³la³kxi²nũ¹jah¹lxi³hẽ¹la². Jah¹lai²na² so¹lxi³ sa²nẽn¹kxi²sa²tẽ³jah¹lxi³hẽ¹la². Yah³lxi¹nhĩ¹nãn¹te²tu̱³ sa²nẽn¹kxi²sa²tẽ³jah¹lxi³hẽ¹la². Jã¹nxe³na¹jau³su² nxe³ye¹nx2ta¹wa². Ta³lu²na¹wa².