8
Yesu sa asa ngbɩn nna agyitɔ
(Matiwu 15:32-39)
1 Kanɩn nkɛ maŋa tɔ mʋ, sakyɔ damantɛ kʋ bɩla ba sarɛ Yesu asɛ. Nɩɩ ba maa man sʋ agyitɔ akʋ ba gyii mʋ, Yesu tɩɩ mʋ abɩɩlapʋ mʋ ba mʋ asɛ nɩɩ ɔ tɔwɛ yɛ,
2 “Asa nɩmʋ asɩn ɩ sʋ mɛ kʋwɛɛ, lɩɩ fɛɛ ndaga nkɛ nsa ndee ba maa bʋ mɛ asɛ, nɩɩ ba man sʋ agyitɔ akʋ ba gyii.
3 Nɩɩ n kan tɔwɛ bamʋ yɛ ba bwii kpewu mʋ, bee biti ba naa kirin‐kirin ɔkpa tɔ, lɩɩ fɛɛ bamʋ akʋ ba lɩɩ kata‐kata.”
4 Nɩɩ abɩɩlapʋ mʋ ba taasɛ Yesu yɛ, “Fɩnɛ nɩɩ an biti a nyɛ agyitɔ kiperi kɩnɩmʋ sʋ sa asa damantɛ nɩmʋ?”
5 Nɩɩ Yesu taasɛ bamʋ yɛ, “Bodobodo afɩnɛ nɩɩ fan sʋ?”
Nɩɩ ba lɛɛ kɔnɔ yɛ, “Asunɔ nɩɩ an sʋ.”
6 Nɩɩ Yesu yɛgɛ nɩɩ asa mʋ ba kyʋn kyɩna kasɛ. Nɩɩ ɔ taa bodobodo asunɔ mʋ, nɩɩ ɔ fwaala Ɩbwaarɛ nɩɩ ɔ kpɛɛ‐kpɛɛ ɩmʋ tɔ taa sa mʋ abɩɩlapʋ mʋ yɛ ba barɩgɛ tɔ sa asa mʋ ba gyii, nɩɩ ba barɩgɛ tɔ sa bamʋ.
7 Nɩɩ Yesu bɩla taa ɩkɩn gbɛrɛɛ mʋ nɩɩ ba sʋ mʋ, fwaala Ɩbwaarɛ bɩla sa mʋ abɩɩlapʋ yɛ ba barɩgɛ ɩmʋ tɔ sa asa mʋ.
8 Nɩɩ asa mʋ kpini ba gyii ŋmɛ. Nɩɩ mʋ abɩɩlapʋ mʋ ba tasɛ‐tasɛ bamʋ agyisan mʋ bɔla alantan asunɔ.
9 Asa mʋ nɩɩ ba gyii kanɩn agyitɔ maŋa mʋ, ba gyɛ asa ngbɩn nna. Ɩmʋ kamaa tɔ, nɩɩ Yesu yɛgɛ bamʋ, nɩɩ ba kpewu.
10 Opula maŋa tɔ, nɩɩ Yesu maa mʋ abɩɩlapʋ mʋ ba loo ɔkʋlɩ tɔ faa kyʋn Dalimanuta ɔsʋwʋlɛ sʋ.
Farasii abi bee biti adangana
(Matiwu 16:1-4)
11 Farasii abi akʋ ba ba Yesu asɛ ba gyii mʋ ɩmɔɔrɛ, kɛ ba nyɛ wu mʋ kilibi. Nɩɩ ba tʋʋ Yesu tɔ kɩɩ yɛ ɔ waa sʋsʋ adangana akʋ kaapʋ bamʋ.
12 Tʋtɔ nɩɩ o muusi, nɩɩ ɔ taasɛ bamʋ yɛ, “Mɩnɛ sʋ nɩɩ fanɛ nbɩɩnbɩɩ asa fen biti adangana fen wu? N biti n tɔwɛ fanɛ kesintin yɛ, n mɛɛ yɛ n waa kanɩn adangana maŋa kaapʋ fanɛ kpaa.”
13 Nɩɩ Yesu yɛgɛ bamʋ tʋtɔ naa loo mʋ ɔkʋlɩ tɔ faa kyʋn benbe.
Fan baa fan daa Farasii abi
yɛ Herodi kɩkaapʋ sʋ
(Matiwu 16:5-12)
14 Yesu abɩɩlapʋ mʋ ba tan sʋ fɛɛ ba maa man taa bodobodo kʋkyɔ, amaa bodobodo kukuli kʋlʋn ɩ bʋ bamʋ asɛ ɔkʋlɩ mʋ tɔ.
15 Nɩɩ Yesu tɔwɛ bamʋ yɛ, “Fan kɩɩ danbɩrasa kɛ fan baa fan da fanɛ n‐yɩɩ sʋ, lɩɩ Farasii abi yɛ Herodi asa bamʋ kɩfɛ mʋ nɩɩ kii tin bodobodo mʋ.”
16 Nɩɩ mʋ abɩɩlapʋ ba piili bɛɛ tɔwɛ abaa yɛ, “A maa man lɛɛ bodobodo kʋkyɔ sʋ nɩɩ ɛɛ tɔwɛ kanɩn mʋ abɛɛ?”
17 Yesu maa bɩɩ kʋtɔ mʋ nɩɩ bɛɛ tɔwɛ mʋ, nɩɩ ɔ taasɛ bamʋ yɛ, “Mɩnɛ sʋ nɩɩ fɛn tɔwɛ fanɛ kɩman sʋ bodobodo kʋkyɔ mʋ asɩn? Ɩmʋ sʋ, fan man pɩɩta bɩɩ mɛ awaasa kasɛ? Mɩnɛ ɩ waa nɩɩ fanɛ nfɛɛrɛ ɩ mɛɛ taalɛ ɩ kɩtaa atɔ bilen kanɩn?
18 Fan sʋ ansi, fan man kɩɩ? Nɩɩ fan sʋ asʋ, fan mee nu? Fen mee nyiŋi asɩn nɩn abɛɛ?
19 Saŋa mʋ nɩɩ n taa bodobodo anuu barɩgɛ sa asa ngbɩn nnuu nɩɩ ba gyii mʋ, alantan afɩnɛ nɩɩ fan tasɛ agyisan mʋ bɔla?”
Nɩɩ ba yɛ, “Alantan kudu anyɔ.”
20 Nɩɩ Yesu bɩla taasɛ yɛ, “N maa taa bodobodo asunɔ barɩgɛ tɔ sa asa ngbɩn nna nɩɩ ba gyii mʋ, alantan afɩnɛ nɩɩ fan tasɛ agyisan mʋ bɔla?”
Nɩɩ ba lɛɛ kɔnɔ yɛ, “Alantan asunɔ.”
21 Nɩɩ Yesu yɛ, “Ɩnɩmʋ kpini kamaa mʋ, fan man taalɛ bɩɩ ɩmʋ kasɛ?”
Yesu kyɛ gyaatanapʋ‐nyɩn
kʋ Betisayida kadɛ tɔ
22 Nɩɩ Yesu maa mʋ abɩɩlapʋ mʋ ba kpee Betisayida kadɛ tɔ, nɩɩ asa akʋ ba taa gyaatanapʋ kʋ ba kʋlɛ Yesu fɛɛ ɔ taa mʋ kɩbaa mata mʋ.
23 Nɩɩ Yesu kɩtaa gyaatanapʋ mʋ kɩbaa tɔ, taa mʋ lɩɩ kadɛ mʋ nbwama. Nɩɩ Yesu tʋʋ nkyɔlɛ waa mu ansi tɔ, nɩɩ ɔ taa mʋ abaa gyaga mʋ sʋ, nɩɩ ɔ taasɛ mʋ yɛ, “Fɩɩ wu atɔ?”
24 Nɩɩ gyaatanapʋ mʋ diyaa mu ansi sʋsʋ, nɩɩ ɔ yɛ, “N wu asa ba maa naa, nɩɩ ba du fɛɛ iyu ɩ maa naa mʋ.”
25 Nɩɩ Yesu bɩla taa mʋ abaa gyaga ɔnyɩn mu ansi sʋ, nɩɩ mu ansi mʋ i bugi, nɩɩ mu ansi mʋ ɩ nyɛ alanfɩya, ɩɩ kɩɩ danbɩrasa.
26 Nɩɩ Yesu tɔwɛ gyaatanapʋ mʋ yɛ, “Kpewu! Amaa man bɩla bwii kpee kadɛ mʋ tɔ.”
Pita lɛɛ kaapʋ ɔsa
mʋ nɩɩ Yesu gyɛ
(Matiwu 16:33-20; Luka 9:18-21)
27 Nɩɩ Yesu maa mʋ abɩɩlapʋ mʋ ba kpee ndɛ‐bii mʋ nɩɩ ɩ bʋ Kasariya Filipi kadɛ mʋ asɛ. Ba maa kpee mʋ, nɩɩ Yesu taasɛ mʋ abɩɩlapʋ yɛ, “Anɩmʋ nɩɩ asa ba yɛ n gyɛ?”
28 Nɩɩ ba lɛɛ kɔnɔ yɛ, “Akʋ ba yɛ fʋ ɩ gyɛ Gyɔn okyugyeepu mʋ, akʋ mɔɔ ba yɛ fʋ ɩ gyɛ Eligya, nɩɩ akʋ mɔɔ ba yɛ fʋ ɩ gyɛ Ɩbwaarɛ atɔwɛpʋ mʋ tɔ ɔkʋ.”
29 Nɩɩ Yesu taasɛ yɛ, “Nɩɩ fanɛ mɔɔ, fan yɛ anɩmʋ nɩɩ n gyɛ?” Nɩɩ Pita lɛɛ kɔnɔ yɛ, “Fʋ ɩ gyɛ Krisito, Ɔmʋ nɩɩ Ɩbwaarɛ wʋla lɛɛ mʋ.”
30 Nɩɩ Yesu gya bamʋ yɛ ba man kan tɔwɛ ɔkʋ ɔsa mʋ nɩɩ ɔ gyɛ.
Yesu tɔwɛ mʋ awʋrʋfɔ
kuwu yɛ mʋ kelewu asɩn
(Matiwu 16:21-28; Luka 9:22-27)
31 Nɩɩ Yesu piili ɛɛ tɔwɛ mʋ abɩɩlapʋ mʋ yɛ, “Ɩ dagaa fɛɛ mɛ, Daadimaadi Obii‐nyɩnsa maa wu awʋrʋfɔ gaa, kɛ Gyiwu abɩlɩsa yɛ Ɩbwaarɛ aseepu abɩlɩsa yɛ Ɩbwaarɛ nbara akaapʋpʋ ba kina mɛ. Bee biti ba mɔɔ mɛ, kɛ nkɛ nsa kamaa mʋ, n biti n kyiŋi lɩɩ lewu tɔ ba.”
32 Amaa Yesu maa bugi mʋ asɩn mʋ tɔ pensen kaapʋ mʋ abɩɩlapʋ mʋ, nɩɩ Pita tɩɩ mʋ lɩɩ ɩkaa sʋ ɛɛ tɔwɛ yii mʋ.
33 Amaa Yesu, biliŋi kɩɩ mʋ abɩɩlapʋ mʋ, nɩɩ ɔ tɔwɛ Pita yɛ, “Lɩɩ mɛ sʋ, fʋ Sɩtaanɛ nɩmʋ. Fʋ nfɛɛrɛ ɩ man lɩɩ Ɩbwaarɛ asɛ, ɩ lɩɩ nyɩmɩsa asɛ nɩn.”
34 Nɩɩ Yesu tɩɩ sakyɔ mʋ yɛ mʋ abɩɩlapʋ mʋ nɩɩ ba ba mʋ asɛ mʋ, nɩɩ ɔ tɔwɛ bamʋ yɛ, “Ɔkʋmaa mʋ nɩɩ ee biti fɛɛ o buu mɛ mʋ, ɩ dagaa fɛɛ o kina mʋ n‐yɩɩ, kɛ ɔ sʋla mʋ oyu laasa kɛ o buu mɛ.
35 Lɩɩ fɛɛ ɔkʋmaa mʋ nɩɩ ee biti fɛɛ o kun mʋ gbaa‐gbaa mʋ nkpa mʋ, ee biti ɔ pan nkpa mʋ. Amaa ɔkʋmaa mʋ nɩɩ ɔ pan mʋ nkpa lɩɩ mɛ yɛ asɩn danbɩrasa mʋ sʋ mʋ, ee biti ɔ nyɛ mʋ nkpa.
36 Nɩɩ fʋ kan nyɛ dulinyaa tɔ kʋtɔ kʋmaa, nɩɩ fʋ pan fʋ nkpa mʋ, mɩnɛ nɩɩ fʋ nyɛ?
37 Abɛɛ mɩnɛ nɩɩ nyɩmɩsa ɩ taalɛ ɔ taa kyarɛ mʋ nkpa?
38 Nɩɩ ɔkʋ kan waa ipeeli lɩɩ mɛ yɛ mɛ kɩkaapʋ sʋ, nbɩɩnbɩɩ kakyɩna nɩmʋ tɔ abi mʋ nɩɩ alibi yɛ Ɩbwaarɛ kɩman‐sɩlɛ kɩ bʋ bamʋ tɔ falɛ mʋ, kanɩn maŋa nɩɩ mɛ, Daadimaadi Obii‐nyɩnsa mʋ kan ba yɛ Ɩbwaarɛ bʋnyaa yɛ mʋ sʋsʋ nbɔɔ mʋ, ngbaa mɛ ii biti ɩ baa ɩ sʋ mɛ ipeeli sa kanɩn ɔsa maŋa.”