16
Agar huan icone, Ismael
1 Sarai, isihua Abram, amo huelqui conepiya, pero quipiyayaya se itequipanojca ten tali Egipto cati itoca Agar.
2 Huajca Sarai moilhui quichihuas quej momajtoyaj quichihuaj ipan nopa tonali huan quimactilis ihuehue itequipanojca. Yeca quiilhui Abram:
―Xiquita, TOTECO amo nechcahuilijtoc ma niconepiya, huajca xicochi ihuaya notequipanojca Agar para yaya huelis quinpiyas coneme cati elise quej na noconehua.
Huan Abram quichihuili cuenta cati Sarai quiilhui.
3 Huan Sarai quinotzqui Agar, nopa Egipto ejquet, huan quimactili Abram para ihuaya ma cochi. Quema panoc ya ni, Abram ya quipixtoya majtacti xihuit para itztoc ipan tali Canaán.
4 Huan Abram quiixmatqui Agar, huan Agar conecuic. Huan quema Agar momacac cuenta para ya conepiya, mohueyimatqui huan pejqui quicualancaita Sarai.
5 Huajca Sarai quiilhui Abram:
―Ta motajtacol para nechcualancaita Agar. Na nimitzmactili para ihuaya ximoteca, pero quema quimatqui para conepiyas, mohueyimatqui. Ma TOTECO quiijto ajquiya quipiya tajtacoli, sinta ta o na.
6 Huan Abram quinanquili:
―Xiquita, Sarai, motequipanojca Agar itztoc momaco para tijtatzacuiltis quej tiquitas cuali.
Huajca Sarai pejqui quitaijyohuiltía Agar, huan yeca Agar cholojtejqui.
7 Pero iilhuicac ejca TOTECO quipanti Agar campa meyayaya at ipan nopa huactoc tali campa amo teno eli. Itztoya ipan nopa ojti cati yahui para Shur.
8 Huan iilhuicac ejca TOTECO quitatzintoquili:
―Agar, tiitequipanojca Sarai, ¿canque tihuala huan canque tiya?
Huan Agar quinanquili:
―Nicholohua imaco noteco, Sarai.
9 Huajca iilhuicac ejca TOTECO quiilhui:
―Xiya sempa campa moteco huan xijneltoquili nochi cati mitznahuatis.
10 Huan nojquiya iilhuicac ejca TOTECO quiilhui:
“Na niquinmiyaquilis moteipan ixhuihua hasta amo aqui huelis quinpohuas.
11 Ya ticonecuitoc huan tijpiyas se oquichpil huan tijtocaxtis Ismael,
pampa TOTECO quicajqui quema timocuesohuayaya.
(Ismael quinequi quiijtos TOTECO Tacaqui.)
12 Huan mocone elis se tacat cati mosisinía.
Motehuis inihuaya nochi,
huan nochi quinequise quitehuise.
Huan yaya itztos ica cualanti mojmosta ica nochi iicnihua.”
13 Huan Agar quitocaxtali TOTECO cati ihuaya mocamanalhuijtoya “Toteco Dios Cati Nochi Quiita”. Quej nopa quitocaxti pampa moilhuiyaya: “Niquitztoc Toteco Dios cati techita huan noja niitztoc.”
14 Huan yeca nopa ameli cati mocahua tatajco Cades huan Bered ama quitocaxtijtoque Beer Lahai Roi. (Beer Lahai Roi quinequi quiijtos Iamel Yaya Cati Itztoc Huan Cati Nechita.)
15 Huan Agar quitacatilti icone Abram, huan Abram quitocaxti Ismael.
16 Huan Abram quipiyayaya 86 xihuit quema tacatqui Ismael.