2
Elías tejcoc ilhuicac
1 Teipa quema monechcahuiyaya nopa talojtzi para TOTECO quihuicas Elías hasta ilhuicac ipan se ajcomalacat, Eliseo quisayaya ten altepet Gilgal ihuaya Elías,
2 pero Elías quiilhui:
―Ximocahua nica, pampa TOTECO techtitantoc ma niya campa altepet Betel.
Pero Eliseo quinanquili:
―Temachti nimitzilhuía amo nimitzcahuas moseltitzi.
Huajca yajque san sejco hasta Betel.
3 Pero nopa telpoca tajtolpanextiani cati itztoyaj ipan Betel quinamiquicoj Eliseo huan quiilhuijque:
―¿Ta no tijmati para ama TOTECO mitzquixtilis Elías, motamachtijca?
Huan Eliseo quinnanquili:
―Quena, nijmati, pero amo teno xiquijtoca.
4 Teipa Elías quiilhui Eliseo:
―Ximocahua nica ipan Betel pampa TOTECO techtitantoc ma niya altepet Jericó.
Pero Eliseo quinanquili:
―Nelía temachti nimitzilhuía, amo nimitzcahuas moseltitzi.
Huajca yajque san sejco hasta altepet Jericó.
5 Huan nopa telpoca tajtolpanextiani cati itztoyaj ipan altepet Jericó monechcahuitoj campa Eliseo, huan quiilhuijque:
―¿Ta no tijmati para ama TOTECO mitzquixtilis motamachtijca?
Huan Eliseo quinnanquili:
―Quena, ya nijmati, pero amo teno xiquijtoca.
6 Teipa Elías quiilhui Eliseo:
―Ximocahua nica Jericó pampa TOTECO techtitantoc hasta hueyat Jordán.
Pero Eliseo quinanquili quej nochipa quinanquiliyaya:
―Nelía temachti nimitzilhuía, amo nimitzcahuas moseltitzi.
Huajca yajque nochi ome san sejco.
7 Huan hualajque 50 telpoca tajtolpanextiani huan moquetzque huejca iniixmelac Elías huan Eliseo para quintachilise. Huan Elías huan Eliseo moquetzque iteno hueyat Jordán.
8 Huan Elías moquixtili itaque cati quinextiyaya para eli se tajtolpanextijquet huan quimimilo, huan ica quitzohuitejqui nopa at san se huelta. Huan nimantzi nopa hueyat motajcoxelo huan nochi ome quiixcotonque ipan tali huactoc.
9 Huan quema ya quiixcotontoyaj, Elías quiilhui Eliseo:
―Techtajtani taya tijnequi ma nimitzchihuili pampa amo huejcahuas para techhuicase.
Huan Eliseo quiilhui:
―Nimitztajtanía ma nijseli motequi quej tayacanca tajtolpanextijquet.
10 Huan Elías quinanquili:
―Tahuel ohui cati timotajtanijtoc. Pero sinta techitas quema techhuicase ten campa ta, TOTECO mitzmacas cati tijtajtanía. Huan sinta amo techitas, huajca amo.
11 Huan quema nopa ome tacame yahuiyayaj huan camanaltitiyahuiyayaj, nimantzi monexti tatajco inijuanti se carro cati senquisa tit ica cahuayojme cati nojquiya tit. Huan Elías ipan tejcoc huan yajqui ilhuicac ipan se ajcomalacat.
12 Huan Eliseo quiitac nopa tamanti, huan quinojnotzqui chicahuac huan quiijto: “Notata, ta cati tieliyaya ichicahualis ni tali Israel, ama ya techcajtejqui.”
Huan ayecmo quiitac más. Huan quitajcocotonqui ten ya iyoyo para ma nesi itequipachol.
Eliseo quiseli itequi Elías
13 Huan Eliseo quitananqui itaque Elías cati huetzqui huan mocuetqui ipan nopa ojti campa hualajtoyaj hasta campa hueyat Jordán. Huan moquetzqui atenti.
14 Huan ica nopa taquemit cati huetztoya ten Elías, Eliseo quitzohuitejqui nopa at huan quiijto: “TOTECO, ta cati tiiTeco Elías, xijnexti mochicahualis.”
Huan quema quitzohuitectoya nopa hueyat, nimantzi motajcoxelo nopa at huan moquetzqui se pamit nica huan seyoc neca, huan Eliseo sempa quiixcotonqui nopa hueyat ipan huactoc tali.
15 Huan quema quiitaque cati panoc, nopa telpoca tajtolpanextiani cati itztoyaj ipan Jericó ipan nica nali hueyat, quiijtojque: “¡Nopa chicahualisti cati TOTECO quimacatoya Elías, ama motalijtoc ipan Eliseo!”
Huan nopa telpoca tajtolpanextiani hualajque quinamiquicoj Eliseo ipan ojti, huan motancuaquetzque iixpa huan mohuijtzonque talchi ica miyac tatepanitacayot.
16 Huan quiilhuijque:
―Techcahuili ma tiquintitanica nopa 50 tacame cati más tetique ten tojuanti para yase quitemotij motamachtijca, Elías. Huelis Itonal TOTECO san quitanantoc huan quitalijtoc ipan se cuatitamit o ipan se tachiquili.
Pero Eliseo quinilhui:
―Amo xiquintitanica.
17 Pero quifuerzajhuijque nopa tajtolpanextiani hasta moyolyamanili Eliseo huan quincahuili ma quintitanica nopa 50 tacame. Huan quitemojtinenque para eyi tonati, pero amo quipantijque.
18 Huan quema mocuetque campa mocahuayayaj ipan altepet Jericó huan amo teno quipantijtoyaj, Eliseo noja itztoya nopona huan quinilhui:
―Na nimechilhui amo xijtemotij pampa san tapic.
Eliseo quichicajqui nopa at ipan Jericó
19 Huan nopa tacame cati ehuani ipan altepet Jericó quiilhuijque Eliseo:
―Nica campa eltoc ni altepet nelía yejyectzi quej tiquita, pero nopa at cati onca, amo cuali. Huan quichihua para nochi tosihuajhua ma quintahuisoca ininconehua huan ni total amo hueli taeliltía.
20 Huajca Eliseo quiijto:
―Techhualiquilica se xicali cati yancuic, huan xijtemitica ica istat.
Huajca quihualiquilijque.
21 Huan Eliseo yajqui campa meyayaya nopa ameli, huan quitenqui nopa istat amelijtic, huan quiijto:
―Quej ni quiijtohua TOTECO: ‘Ya nijchicajtoc ni at, huan ayecmo quihualicas miquilisti, yon cocolisti.’
22 Huajca hasta ama nopa at eltoc nelcuali quej Eliseo quiijto para elis.
23 Teipa Eliseo quisqui nopona huan yajqui ipan Betel. Huan quema tejcoyaya ipan ojti, quisque miyaqui telpoca tacame cati amo quitepanitayayaj TOTECO, huan pejque ica paquij Eliseo. Quitzajtziliyayaj: “Ticuapepestic tacat, xitejco ticuapepestic tacat.”
24 Huan moicantachili Eliseo huan quinitac, huan quintelchijqui ica itequiticayo TOTECO. Huan quisque ome osome ipan nopa cuatitamit, huan quinmictijque 42 ten nopa telpocame.
25 Huan teipa Eliseo quisqui nopona huan yajqui ipan tepet Carmelo. Teipa quisqui nopona huan mocuetqui altepet Samaria.