ໂຢຮັນ ລາ ມານະ ແຕ ມູ່ ກາ ເຢຊູ ຣຽຮ ປາຈຸ່ຮ ໂອນ ເປາະ ຕະ ຣານະ ອັນ. ອັນ ຄຽນ ປຶ່ງ ປັຣນາຍ ໄນ່ ມາຮ 90 ກູມໍ ແວັດ ເຢຊູ ແກີດ. ບັອງ ກາ ອັນ ຄຽນ ປຶ່ງ ໄນ່, ລາ ເທົາ ລາລື່ ເຈີ່. ອັນ ພາອ໌ ປັຣນາຍ ໄນ່ ດໍອ໌ ຊາອົຮ ມັຮ ກອນ ຣາມອນ ອັນ ຕຶ່ງ ມູ່ ກາ ຊາອຳ. ອັນ ອາຕີ ແຕ ເຢຊູ, ກະ ດໍອ໌ ເຢຊູ ລາ ປັຣນາຍ ອາມົ່ງ. ອັນ ງີ່ນ ແຕ ອັນ ເຮີມ ເຢຊູ, ກະ ເບີນ ຊາປ່ະ ຈະ ເຢຊູ. ນ່ະກັອຍ, ເຕ່ອ໌ ອັນ ອາຕີ ແຈງ ກະ ປຍາຍ໌ ລາລື່ ແຕ ມັຮ ຣານະ ກາ ເຢຊູ ຕະ ເຈີ່, ກະ ແຕ ມັຮ ຊັນຕອຍ໌ ເຢຊູ ອາຕີ.

ປຶ່ງ ປັຣນາຍ ໄນ່ ອາຕີ ແຕ ເຢືາງ ເຈົາຣາຊີ ລາ ຣາມຶ່ຮ ປັ່ງ, ກະ ກາໄຕ່ຮ ອາຕີ ມັຮ ມູ່ ກາ ຊາອຳ ໂອນ ຕາຢັຮ ເປາະ ຕຶ່ງ ຣາມຶ່ຮ ປັ່ງ ໄນ່. ອັນ ປາຕັບ ໄລ່ ອຶນໂຈຍ ຊາງັດ ປັຣນາຍ ກວາຍ ອາຕີ ຕາງ ປັຣນາຍ ເຢືາງ ເຈົາຣາຊີ ກາ ຕາ ເບີນ ປຍາຍ໌, ຍ່ອນ ໄລ່ ອີ ກາຢັ່ຮ ມູ່ ກາ ຊາອຳ ໂອນ ແກີດ ຊາອຶ່ຍ ຈຸ່ມ. ມັຮ ກວາຍ ກັອຍ ປາຍ ເຢຊູ ຕາ ແກີນ ກອນ ເຢືາງ ແກີດ ກວາຍ; ໄລ່ ຄຶ່ດ ຣານະ ຈ່ອຍ ອາມົ່ງ ຕາ ເບີນ ຕຸ່ຮ ອຶງເຄາະ ແກີດ ຣາຕອຍ, ແຕີລາ ອາໂຢ່ະ ກວາຍ ການໍ່ອ໌.

ປັຣນາຍ ໄນ່ ແກີດ ເຕຣ່ງ ກາໄຕ່ຮ ມັຮ ກວາຍ ຊາອຳ ກະ ໂອນ ໄລ່ ອຶນໂຈຍ ປາຊິ ຣາງຶ່ຮ ຕຶ່ງ ແດີຍ ໄນ່. "ອຶນແຍ່ະ ມັຮ ຣາມຶ່ຮ ຕຶ່ງ ແດີຍ ໄນ່ ກາ ຈະຈັ່ນ ກວາຍ ຊັອງ ຢໍອ໌ ອີ ເບີນ, ມັ່ດ ກວາຍ ເຮີມ ຢໍອ໌ ອີ ເບີນ, ກະ ຣາງຶ່ຮ ກວາຍ ຄຶ່ດ ໄລ່ ອໍ ກາເລີຍ ແຕ ກວາຍ ການໍ່ອ໌, ມັຮ ຣາມຶ່ຮ ໄນ່ ຕາ ເບີນ ແຕີ່ອ໌ ແຕ ເຢືາງ ເຈົາຣາຊີ ອຶມປໍ່ ໄຮ, ມາ ແຕີ່ອ໌ ແຕ ແດີຍ ໄນ່ ຊັອງ" (2:16).