5
थकालिपिन्त अर्ती ब्यूगु
1 जि नं छम्ह मण्डलीयाम्ह थकालि खः। उकिं आम्कन च्वंगु मण्डलीयापिं थकालिपिन्त नं थ्व न्वाना खँ च्वया हयाच्वनागु खः। ख्रीष्टं दुःख सियाः सिनादीगु नं जिं खनागु दु। येशू ख्रीष्ट झायादीबलय् जि नं वय्कः नाप तःधनी।
2 अथेजूगुलिं परमेश्वरया फैचातय्त छिमिसं बांलाक हेरबिचार याना च्वँ। करं क्यनाः जक थ्व ज्या याये मते, छाय्धाःसा छिमिसं करं ज्या याःगु परमेश्वरयात मयः। अले हानं धिबायागु निंतिं जक नं थ्व ज्या याये मते। दुनुगलंनिसें हे प्रभुयात सेवा यायेगु मतिइ दुसा जक या।
3 छिमिगु ल्हातय् त्वःता तःपिन्त क्वत्यलेगु स्वये मते, बरु इमिगु न्ह्यःने थः हे नमुना जुया ब्यु।
4 अले लिपा मूलम्ह फैजवाः येशू ख्रीष्ट झाइबलय् छिमिसं गुबलें नाश जुइ मखुगु श्रीपेच काये खनी।
5 क्वकालिपिं मनूतय्सं थकालिपिं मनूतय्त मानय् याये माः। थः थःम्हं तुं तःधं जुया जुइगु बांमलाः। अय्जूगुलिं ग्वाहालि याये माःपिन्त छिमिसं ग्वाहालि या। थ्व हे खँ धर्मशास्त्रय् नं थथे च्वया तःगु दु --
“परमेश्वरं तःधंछुना जुइपिनिगु
विरोध यानादी,
क्वमिलुपिन्त धाःसा
दया यानादी।”
6 उकिं छिपिं दकलय् तःधंम्ह परमेश्वरयागु न्ह्यःने चिधंपिं जुयाः च्वँ। अले वय्कलं छन्हु छिमित तःधंकादी।
7 थःगु फुक्क दुःख वय्कःया न्ह्यःने तया ब्यु, छाय्धाःसा वय्कलं हे छिमिगु सुसाःकुसाः यानादी।
8 अय्नं थःगु मन बल्लाका च्वँ, होश याना च्वँ। छिमि शत्रु, शैतानं छिमित फतिंफतलय् स्यंकेत स्वयाच्वंगु दु। नयेमखंम्ह सिंह थें शैतानं नं सुयातं स्यंके फइ ला धकाः माः जुयाच्वंगु दु।
9 विश्वासय् बल्लानाः शैतानयागु विरोध या। थ्व संसारय् च्वंपिं दाजुकिजापिन्सं नं छिमिसं थें दुःखकष्ट सियाच्वंगु दु धकाः छिमिसं सि हे स्यू।
10 थथे दुःखकष्ट सी धुंकाः झी परमेश्वरं छिमित सःताः भिंका व बल्लाकादी। थ्व हे भिंम्ह दया माया दुम्ह परमेश्वरं येशू ख्रीष्टयात झीथाय् छ्वया हयाः वय्कः नाप स्वर्गय् च्वनेत झीत सःतादीगु खः।
11 परमेश्वरयाके न्ह्याबलें शक्ति दयाच्वने मा। आमेन।
लिपांगु ज्वजलपा
12 विश्वास याये बहःम्ह सिलासयात थ्व पौ च्वकाः छिमित छ्वया हयागु खः। परमेश्वरं छिमित तसकं दया माया यानादीगु दु, अले छिमित भिंका नं दी धयागु खँ छिमिसं सी मा धकाः, अले छिमित साहस बीकथं जिं थथे चिहाकय्क च्वयाच्वनागु खः। अय्जूगुलिं छिमिसं परमेश्वर नाप च्वनाच्वनेगु त्वःते मते।
13 छिपिं थें तुं ल्यया तःपिं बेबिलोनय् च्वंपिं विश्वासीतय्सं छिमित ज्वजलपा धया हःगु दु। अथे हे जिमि काय् मर्कूसं नं छिमित ज्वजलपा धया हःगु दु।
14 आम्कन च्वंपिं दाजुकिजापिं सकसितं थःथवय् यचु नुगलंनिसें माया यानाः ज्वजलपा यायेगु या।
ख्रीष्टया मनूत, छिमित शान्ति दयाच्वने मा।