106
Ininyolteticayo israelitame
1 ¡Paquilistli!
¡Ma tijtlascamatica TOTECO pampa yajaya nelía cuali iyolo huan iteicnelijcayo ax quema tlamis ica tojuanti!
2 ¿Ajqueya huelis quitlamiijcuilos nopa yejyectzitzi chicahualnescayotl tlen TOTECO quichihua?
¿Ajqueya huelis tepohuilis nochi tlen quichijtoc Toteco?
3 Quipiyaj paquilistli nopa tlacame tlen nochipa quichijtinemij tlen cuali huan tlen xitlahuac.
4 TOTECO, xinechilnamiquis na quema tiquintiochihuas huan tiquinmaquixtis motlacajhua.
5 Xinechcahuili ma niquitas tlen yejyectzi tiquinchihuilis motlacajhua tlen tiquintlapejpenijtoc.
Xinechcahuili para nojquiya ma nipaquis ininhuaya.
Xijcahua ma nimopaquilismacas ica inijuanti tlen moaxcahua.
6 Tojuanti nojquiya titlajtlacolchijtoque san se queja tohuejcapan tatahua.
Titlaixpanoque huan tijchijtoque tlen fiero.
7 Tohuejcapan tatahua ax quimachilijque nopa huejhueyi chicahualnescayotl tlen Toteco quichijqui ipan tlali Egipto.
Niyon ax quiilnamijque para quipixqui hueyi iyolo ininhuaya.
Inijuanti moyoltetilijque ica Toteco nepa campa nopa hueyi atl tlen itoca Chichiltic.
8 Pero Toteco quinmaquixti para ma quitlepanitaca,
huan tenextili ihueyi chicahualis ipan nochi tlaltepactli.
9 Quiajhuac nopa hueyi atl tlen itoca Chichiltic huan quinahuati ma motlajcoxelo.
Huan queja nopa quitlapo se ojtli huactoc queja elisquía huactoc tlali,
huan quinnahuati tohuejcapan tatahua ma ipan panoca.
10 Queja nopa quinmaquixti huan quinchololti ininmaco inincualancaitacahua.
11 Huan nopa atl quinatzonpolihuilti inincualancaitacahua hasta ax mocajqui niyon se tlen ax mijqui.
12 Huan huajca tohuejcapan tatahua quineltocaque itlajtol tlen Toteco quinilhuijtoya.
Huan teipa huicaque huan quipaquilismacaque.
13 Pero sampa nimantzi quiilcajque nochi tlen Toteco quichijtoya.
Huan ax mochixque para Toteco ma quinmaca consejos.
14 ¡Axtle! Nepa ipan huactoc tlali quiyejyecojque Toteco Dios ica tlen tlahuel quinequiyayaj ma quinmaca.
Quena, quifuerzajhuijque ma quinmaca nopa tlacualistli tlen inijuanti quinequiyayaj.
15 Huajca Toteco quinmacac tlen quitlajtlanijque,
pero nojquiya quintitlanili cocolistli tlen ica mijque miyac nopa tlacame.
16 Huan nopano campa quiquejquetztoyaj ininyoyoncal,
quichicoitaque Moisés,
huan quichicoitaque Aarón tlen TOTECO quiiyocatlalijtoya para ma eli itotajtzi.
17 Huajca motlapo tlali huan quintolo Datán, Abiram huan nochi tlen quintoquiliyayaj.
18 Huan Toteco quititlanqui tlitl tlen elhuicac,
huan quintlamitlati nopa tlaixpanoca tlacame.
19 Nepa ipan tepetl Horeb mochihuilijque se becerro tlen oro huan ya nopa quihueyichijque.
20 Quitlahuelcajque Toteco huan ihueyi chicahualis,
huan pejque quihueyimatij se becerro tlen oro,
iixcopinca se tlapiyali tlen quicua xihuitl.
21 Huan queja nopa quiilcajque ininTeco Dios tlen quinmaquixtijtoya,
yajaya tlen quichijtoya huejhueyi tlamantli ipan tlali Egipto,
22 huan ipan nopa hueyi atl tlen itoca Chichiltic.
23 Huajca Toteco quiijto para quintzontlamiltisquía,
pero Moisés tlen Toteco quitlapejpenijtoya motlajcoquetzqui,
huan quitlajtlani Toteco para ma ax quintzontlamilti ica ihueyi cualancayo.
24 Teipa nopa israelitame ax quinejque calaquise ipan nopa tlali tlen nelía cuali,
pampa ax quineltocaque para Toteco quinmocuitlahuisquía.
25 Huan ipan ininchajchaj pejque quiilnamiquij TOTECO huan ax quitlacaquilijque tlen quinilhuiyaya ma quichihuaca.
26 Yeca Toteco Dios momatlalanqui huan tlatestigojquetzqui para quintzontlamiltisquía ipan nopa huactoc tlali.
27 Quiijto para ininconehua quinsemanasquía huan quintitlanisquía,
ipan sequinoc tlaltini para ma itztotij queja sequinoc altepetl ehuani.
28 Nojquiya ipan tlali Peor tohuejcapan tatahua mosejcotilijque ininhuaya tlen quihueyichihuayayaj Baal,
huan hasta quinmacaque tlacajcahualistli mijcatzitzi.
29 Huan ica ya ni quicualancamacaque Toteco.
Yeca Toteco quititlanqui se hueyi cocolistli ininpani huan miyaqui mijque.
30 Huan Finees moneltlali huan motlalanqui,
huan quinmicti nopa tlacame tlen ica inintlajtlacolhua quichijtoyaj ma huala nopa cocolistli.
Huan ica ya nopa moquetzqui nopa cocolistli.
31 Huan ni cuali tlamantli quichijqui Finees para ma quiilnamictoca para nochipa queja se tlacatl tlen cuali.
32 Nojquiya campa atl Meriba,
nopa israelitame quicualancamacaque Toteco.
Quena, ininpampa inijuanti, Toteco cualanqui ica Moisés.
33 Pampa quichijque ma cualani Moisés,
huan ma camatitiquisa ica tlen ax monequiyaya.
34 Huan nojquiya nopa israelitame ax quintzontlamiltijque nochi nopa altepetini,
ipan nopa tlaltini tlen TOTECO quinnahuatijtoya ma quixolehuaca.
35 San achi más mosejcotilijque ininhuaya tlen ax quitlepanitayayaj Toteco,
huan nojquiya quichijque tlen inijuanti momajtoyaj quichihuaj.
36 Quinhueyimatque ininteteyohua,
huan mohuejcatlalijque tlen Toteco,
huan ica ya nopa mopolojque.
37 Hasta quinmictijque ininconehua queja se tlacajcahualistli para iajacahua Axcualtlacatl.
38 Huan pampa quinmictijque ininconehua tlen ax tleno quichijtoyaj para quinmacase nopa teteyome tlen tlali Canaán,
quinenpolojque nopa tlali ica inieso.
39 Huan inijuanti nojquiya monenpolojque ica nochi tlamantli fiero tlen quichijque.
Pampa quema quinhueyichihuayayaj teteyome,
Toteco Dios quinitayaya queja elisquía momecatiyayaj ica seyoc tlen ax ininnamic.
40 Yeca TOTECO tlahuel cualanqui ica itlacajhua,
huan ayoc quinejqui quinitas.
41 Huan quintemactili ininmaco inincualancaitacahua tlen ehuayayaj ipan nopa tlaltini tlen ax quitlepanitayayaj Toteco,
para nopa tlacame ma quinnahuatica.
42 Huan quena, inincualancaitacahua quintlaijiyohuiltijque
huan tlahuel quincocojque pampa itztoyaj ininmaco.
43 Miyac huelta Toteco quinmanahui,
pero inijuanti quisenhuiquiliyayaj moyoltetilíaj ica ya.
Yeca teipa quicahuili ma motzontlamiltica ipampa inintlajtlacolhua.
44 Pero yonque ya nopa quichihuayayaj,
Toteco quintlacaquiliyaya quema quitzajtziliyayaj,
huan quinpalehuiyaya quema tlacame quintlaijiyohuiltiyayaj.
45 Quena, quiilnamiquiyaya nochi tlen quintlajtolcahuilijtoya para quinchihuilis.
Yeca quintlasojtlac huan moyolcuepqui pampa tlahuel quinicneliyaya.
46 Huan hasta quichijqui para inincualancaitacahua tlen quintlaijiyohuiltiyayaj,
ma nojquiya quintlasojtlaca.
47 ¡TOTECO Dios, xitechmaquixti tlen tocualancaitacahua!
Sampa xitechsentili tlen campa hueli tlaltini para tihuelise timitztlascamatise ta tlen titlatzejtzeloltic,
huan para huelis tipaquise huan timitzhueyimatise.
48 Ma tijpaquilismacaca TOTECO Dios para nochipa,
yajaya tlen toTeco tiisraelitame.
Nochi itlacajhua ma quiijtoca:
“¡Queja nopa ma eli! ¡Paquilistli!”