107
Toteco quinmanahuía tlacame
1 ¡Xijtlascamatica TOTECO pampa yajaya nelía cuali!
¡Iteicnelilis ax quema tlamis!
2 Nochi imojuanti tlen TOTECO inmechmanahuijtoc, xitepohuilica.
Quena, xitepohuilica para yajaya inmechmaquixtijtoc ininmaco imocualancaitacahua.
3 Yajaya quinsentilijtoc nochi nopa tlacame tlen itztoyaj campa hueli ipan tlaltepactli.
Quinsentili tlen itztoyaj ica ajco, ica tlani,
ica campa quisa tonati huan ica campa calaqui.
4 Sequin nentinenque ipan huactoc tlali,
niyon ax quipiyayayaj ininchaj,
niyon ax quipixque se altepetl para ipan itztose.
5 Amictinemiyayaj huan mayantinemiyayaj,
hasta quimachiliyayaj para miquisquíaj pampa ayoc quipiyayayaj chicahualistli.
6 Huajca quitzajtzilijque TOTECO para ma quinpalehui,
huan yajaya quinpalehui.
7 Quinyacanqui xitlahuac ipan se ojtli tlen temachtli.
Huan quinhuicac ipan se altepetl para nopano ma itztotij.
8 Xijhueyimatica TOTECO pampa yajaya tlahuel tetlasojtla,
huan quichihua huejhueyi tlamantli tlen nochi quisentlachilíaj.
9 Pampa Toteco quitlamaca tlen teicneltzi huan mayantinemi.
Quiaixhuitis tlen amictinemi.
10 Sequin inijuanti itztoyaj ipan tzintlayohuilotl ipan tlatzactli huan nechca para miquise.
Itztoyaj ilpitoque ica tepos mecatl.
11 Ya nopa ininpantic pampa inijuanti moyoltetilijque ica tlen TOTECO quinnahuatijtoya,
huan ax quitlacaquilijque Toteco Tlen Más Hueyi.
12 Yeca Toteco quincajqui ma tlaijiyohuica ipan nopa tequitl tlen tlahuel teticayo.
Quena, huetzque huan axaca quinpalehui para sampa motlalanase.
13 Huajca quema ayoc quimatiyayaj tlachque quichihuase ica nopa tlaijiyohuilistli,
quitzajtzilijque TOTECO,
huan yajaya quinmanahui tlen nopa tlaijiyohuilistli.
14 Quinquixti ipan nopa tzintlayohuilotl huan quinmanahui para ax miquise.
Huan quicotonqui nopa tepos mecatl tlen ica quinilpitoyaj.
15 Xijhueyimatica TOTECO pampa yajaya tlahuel tetlasojtla huan quichihua huejhueyi tlamantli tlen ica tlacame san quisentlachilíaj.
16 Pampa yajaya quitlapanqui nopa puertas tlen bronce ipan tlatzacme,
huan quihuejhuelo nopa tepostli tlen ica quitzacuayayaj nopa puertas.
17 Sequin tlacame tlahuel mohualiquilijque tlaohuijcayotl,
pampa moyoltetilijque ica Toteco huan quiixpanoque.
18 Huan ipan nopa tlaijiyohuilistli ayoc mayanayayaj ipampa inincocolis huan pampa itztoyaj nechca para miquise.
19 Pero quema ayoc quimatiyayaj tlachque quichihuase ica nopa tlaijiyohuilistli,
quitzajtzilijque TOTECO huan yajaya quinmanahui.
20 Toteco camatqui huan mochicajque.
Huan queja nopa quinmaquixti para ax miquise.
21 Xijhueyimatica TOTECO pampa yajaya tlahuel tetlasojtla huan quichihua huejhueyi tlamantli tlen nochi quisentlachilíaj.
22 Xijpaquilismacaca Toteco huan yajaya quiitas queja elisquía se tlacajcahualistli.
Huan xihuicaca huan xitepohuilica nochi tlen yajaya quichijtoc.
23 Nopa tlacame tlen nemij ica ininbarcos ipan hueyi atl,
huan yahuij ipan nochi tlaltepactli para tlanamacase huan tlacohuase,
24 nojquiya quiitztoque nopa yejyectzitzi tlamantli tlen TOTECO quichijtoc ipan atl.
25 Quiitztoque quema TOTECO camatqui huan quichijqui ma motlalana se ajacatl tlen chicahuac,
huan quitlalanqui nopa atl.
26 Nopa barcos motlalanayayaj huan sampa atzintla huetziyayaj.
Huan nopa tlacame tlen itztoyaj ipan nopa barcos pejque huihuipicaj huan majmahuij.
27 Inijuanti huihuipicaque huan momimilojque queja ihuintini,
huan ayoc quimatque tlachque quichihuase.
28 Huajca quema itztoyaj ipan tlaohuijcayotl,
quitzajtzilijque TOTECO,
huan yajaya quinmaquixti tlen quincuesolmacayaya.
29 Quema tlaahuetziyaya huan tlaajacayaya chicahuac,
yajaya quitlacahualti nopa hueyi atl para ma ayoc molini,
huan mochijqui itlajtol.
30 Huan inijuanti pajque miyac quema quiitaque ya moquetzqui nopa atl.
Huan queja nopa Toteco quinyacanqui ica yejyectzi hasta nopa ateno campa monequi ajsise ica ininbarcos.
31 Ma quihueyimatica TOTECO pampa yajaya tlahuel tetlasojtla,
huan quichihua huejhueyi tlamantli tlen nochi quisentlachilíaj.
32 Ma quipaquilismacaca Toteco tlamiyacapa iniixtla nochi tlacame huan iniixtla nopa huehue tlacame tlen tlayacanaj ipan nopa tlali.
33 Toteco quinhuatztoc miyac atemitl huan quinchijtoc queja huactoc tlali.
Nojquiya hueli quinhuatza campa meya atl.
34 Nopa cuali tlali tlen tlahuel tlaeliltía quichijtoc ma ayoc tlaelilti.
Huan ya ni quichijqui ipampa inintlajtlacolhua nopa tlacame tlen itztoyaj nopano.
35 Pero nojquiya nopa huactoc tlali campa ax tleno eli quichijqui ma tlaelilti.
Nojquiya quichijqui ma quipiya miyac atl tlen meya campa hueli.
36 Huan quinhuicac nopa tlacame tlen mayantinemiyayaj para ma itztoca nopano,
huan ma quichihuaca inialtepe.
37 Nojquiya quichijqui para ma tocaca ipan mila,
huan ma quichihuaca xocomeca mili,
huan ma quipixcaca tlahuel miyac inintlajca.
38 TOTECO tlahuel quintiochijqui.
Nojquiya momiyaquilijque huan quinpixque miyac ininhuacaxhua.
39 Teipa pejqui caxani ininmiyaca nopa tlacame,
huan nochi mocajque teicneltzitzi,
pampa quinajsic tlaohuijcayotl,
cuesoli huan tlaijiyohuilistli.
40 Huan yajaya quinicnotlali nopa tlayacanani tlen mohueyimatiyayaj,
huan quinchijqui ma mocuapoloca campa ax oncac ojtli huan ax quimatque campa yahuiyayaj.
41 Pero yajaya quinmanahui nopa teicneltzitzi.
Quinmiyaquili ininconehua queja elisquíaj pilborregojtzitzi hasta mochijque onpanoc miyac.
42 Ma quiitaca nochi tlen quichijtoc TOTECO nochi tlen nemij xitlahuac iixtla,
huan ma paquica.
Pero nochi nopa fiero tlacame ma mocamatzacuaca.
43 Tlacame tlen tlalnamiquini quimachilise nochi ni tlamantli tlen Toteco quichijtoc,
huan quiajcocuise ipan ininyolo.
Inijuanti moyolilhuise quejatza TOTECO quintlasojtlatihualajtoc itlacajhua.