16
Toteco tlen cuali tinechmacas
1 Xinechmocuitlahui, Toteco Dios,
pampa ipan ta nimotemachijtoc para tinechmanahuis.
2 TOTECO, na nimitzilhuijtoc:
“Ta tinoTeco huan axaca seyoc tlen huelis nechpalehuis.”
3 Niquinicnelía inijuanti tlen mitzneltoquilíaj tlen itztoque ipan nopa tlali.
Inijuanti tlen nelía yejyectzitzi ininyolo.
4 Pero mojmostla más mocuesose tlacame tlen quintoquilíaj sequinoc inintlaixcopincayohua.
Na ax quema nijtencahuasquía se tlacajcahualistli iniixtla inintotiotzitzi,
niyon ax quema niquintocaxtisquía.
5 San ta, TOTECO, nimitzpixtoc, tiitztoc nochi para na,
yeca ayoc tleno nijtemos.
Ta tinechmaca nochi tlen notechmonequi para niyoltos.
Noyolis huan nochi tlen nijpixtoc eltoc momaco huan nijmati nelía temachtli.
6 Nopa mecatl tlen ica tinechyejyecohuili campa nijselijtoc, huetzqui campa nelía cuali tlali.
Nelía tlayejyectzi campa tinechmacatoc.
7 Nimitzhueyichihuas, TOTECO,
pampa tinechconsejomaca.
Tlajco yohual tinechmaca motlalnamiquilis huan tinechnextilía ipan noyolo tlachque monequi nijchihuas.
8 Nochipa nimoilhuía tlen ta, TOTECO,
huan pampa tiitztoc nonechca, ax tleno nopantis.
9 Yeca ipan noyolo nelía nijpiya paquilistli.
Nochi notlacayo motemachijtoc ipan ta.
10 Pampa ax tijcahuas notlacayo ipan tlacoyoctli,
niyon ax tijcahuas ma palani itlacayo Yajaya Tlen Tlatzejtzeloltic.
11 Xinechnextilis catlía ojtli quipiya yolistli.
Nijpiyas hueyi paquilistli nepa campa ta tiitztoc.
Quena, oncas hueyi paquili para nochipa nepa campa monejmatl.