18
David quitlascamati TOTECO pampa tlatlantoc
1 Nimitzicnelía, TOTECO.
Na niitztoc momaco.
2 TOTECO, mopan ta nimotlatía pampa temachtli tinechmaquixtis.
Tinechyahualohua para ax huelis nechajsise nocualancaitacahua.
Taja tinotlamanahuijca.
Ipan ta, noTeco Dios, nimotlatía,
pampa na niitztoc momaco.
Quena, san ipan ta nimotemachía.
Ta tinechyahualohua para tinechmocuitlahuía.
Taja tieli queja se huejcapantic tepancali tlen cuali huan temachtli.
Ica ta mochicahualis nitlatlanis.
3 San monequi nijnotzas TOTECO tlen quinamiqui para nijhueyichihuas,
huan yajaya nechmanahuis ininmaco nochi nocualancaitacahua.
4 Eltoya queja nechpixtoya imaco miquistli.
Nochi tlen fiero tlen onca ipan ni tlaltepactli nechtlanisnequiyaya.
5 Nopa mijca tlacoyoctli nechtlaquechilijtoya hasta ayoc nijpixqui fuerza.
San se quentzi más huan nimiquisquía.
6 Pero quema más nimocuesohuayaya,
nijnotzqui TOTECO.
Nijtlajtlani ma nechpalehui noTeco Dios.
Huan yajaya nechtlacaquili hasta nepa ipan elhuicac.
Quena, quichihuili cuenta tlen niquilhui.
7 Huajca chicahuac mojmolini tlali hasta momajmatijque nochi tepetini.
Moojolinijque nopa tepetini hasta campa ontlatzquitoque,
huan mohuihuixojque pampa Toteco Dios cualanqui.
8 Elqui queja quisayaya poctli ipan iyacatzol,
huan ipan icamac quisayaya se tlitl tlen nochi quitlamitlatiyaya,
huan nochi quixolehuayaya.
Quena, quimajcahuayaya tlicoli xaxahuacatoc pampa nelcualanqui.
9 Pampa Toteco Dios quitlapo nopa cortina tlen elhuicac,
huan temoc para nechpalehuis.
Nejnentihualayaya ipan miyac mixtli tlen nelyayahuic.
10 Toteco Dios tlejcoc ipan ieltlapal se querubín elhuicac ejquetl,
huan patlantihualajqui ipan ajacatl.
11 Yajaya motzajqui ica tzintlayohuilotl,
huan atl quiyahualo para axaca quiitasquía.
12 Tlapetlanilotl quiyacantihualajqui quema ajsiyaya yajaya tlen tlahuel tlahuía.
Huan nojquiya huetzqui tesihuitl huan tlicoli xaxahuacatoc.
13 TOTECO quichijqui ma quicaquica itos queja se tlatomonilotl tlen quisqui elhuicac.
Quena, Toteco Tlen Más Hueyi tlahuelchijqui.
¡Tlahuel miyac tesihuitl huan tlicoli xaxahuacatoc huetzqui!
14 Quimajcajqui cuatlamintli ma quinajsi nochi nocualancaitacahua,
huan inijuanti cholojtejque.
TOTECO quinhuitejqui ica hueyi tlapetlanilotl huan quintzontlamilti.
15 Quema TOTECO tlailpitzqui,
nochi nopa atl ipan hueyi atl san sejco momanqui hasta nesqui nochi nopa tlali tlen mocahua atzintla campa más tlahuejcatla.
Ica itlajtol TOTECO mopannexti itzinpehualtil tlaltepactli, pampa yajaya cualanqui.
16 Huan TOTECO quimelajqui ima hasta campa más huejcatla,
huan nechquixti tlen nopa hueyi atl.
17 Nechmaquixti ininmaco nocualancaitacahua tlen quipixque huejhueyi chicahualistli.
Quena, nechmanahui tlen nocualancaitacahua tlen más quipixque chicahualistli que na.
18 Inijuanti motlalijque noca na quema ax nijpixqui fuerza,
pero TOTECO nechtlalanqui.
19 Nechquixti huan nechsehui campa ax mahuilili.
Nechmanahui pampa nechicnelía.
20 TOTECO nechmacatoc tlen quinamiqui pampa nijchijtoc tlen xitlahuac.
Nechtlaxtlahuijtoc pampa cuali noyolis.
21 Nijtoquilijtoc iojhui TOTECO huan ax nimoiyocacajtoc tlen ya.
22 Niquilnamictoc nochi itlajtol huan ax quema nijcajtejtoc itlanahuatil.
23 Xitlahuac niitztoc iixpa.
Nimoiyocatlalijtoc tlen nochi tlen fiero.
24 Huan TOTECO nechtlaxtlahuijtoc queja quinamiqui ica tlen cuali nijchijtoc,
pampa quipantijtoc cuali noyolis iixpa.
25 TOTECO, tiquinicnelía huan tiitztoc temachtli ica tlen teicnelíaj huan tlen temachme.
Tiitztoc cuali ica tlen quihuejcacahua tlajtlacoli.
26 Tiquintiochihua tlen tetiochihuaj,
pero tetic timotlalía ica inijuanti tlen mosisiníaj.
27 Tiquinmaquixtía tlen moicnonequij,
pero tiquinpinahualtía tlen mohueyimatij.
28 TOTECO, ta tlen tinoDios,
ta tinechmaca tlahuili.
Ta tijcueptoc nopa tzintlayohuilotl campa niitztoc ica tlahuili.
29 Ica mochicahualis, noTeco Dios,
niquintehuis nocualancaitacahua,
huan niquixcopanos nopa tepamitl tlen ica quitzactoque inialtepe.
30 Iojhui Toteco Dios nelía xitlahuac.
Huan itlajtol tlen quitencahua,
cuali para ipan timotemachise.
TOTECO quinmanahuía nochi tlen ipan ya motemachíaj.
31 Axaca seyoc Dios queja TOTECO.
Axaca seyoc tlen huelis ipan timotemachise huan techmanahuis.
32 Toteco Dios nechmaca chicahualistli,
huan nechchihuilía ma ninejnemi xitlahuac.
33 Yajaya nechfuerzajmaca para ma ax nihuetzi.
Noicxihua mochihuaj temachtli queja iicxihua se chivo quema moquetzaj campa tlahuejcapa huan tlaxixitlaca.
34 Toteco Dios nechmachtía tlachque ma nijchihuas quema onca tlatehuijcayotl.
Nechfuerzajmaca para cuali ma niquitzqui nopa tetic tepos huitoli tlen quichijtoque ica bronce.
35 Toteco Dios, ta tinechmanahuía huan tinechmaquixtía.
Tinechitzquía ica monejmatl.
Ica mohueyi teicnelijcayo tinechhueyichijtoc.
36 Tijchijtoc noojhui más patlahuac para ma ax nihuetzis.
37 Niquintepotztocac nocualancaitacahua huan niquinajsito.
Huan ax nimocuepqui hasta quema niquintzontlamiltijtoya.
38 Niquinhuejhuelo huan ayoc quema motlalanase.
Huetzque noicxitla.
39 Toteco Dios, ta tinechfuerzajmacac ipan nopa tlatehuijcayotl huan tijchijqui para nocualancaitacahua ma motlancuaquetzaquij noixtla.
40 Miyac moicancuepque para cholojtehuase huan queja nopa huelqui niquintzontlamilti.
41 Inijuanti tetzajtzilijque ma quinpalehuica,
pero axaca huelqui quinpalehui.
Quinotzque TOTECO,
pero yajaya ax quinnanquili.
42 Queja se quitisi tlaltepoctli huan quihuica ajacatl,
na queja nopa niquinchijqui.
Huan ininpan nimoquejquetzqui queja soquitl ipan ojtli.
43 TOTECO nechmanahuijtoc tlen nopa sequinoc altepetl ehuani tlen mosisiníaj huan quinequiyayaj nechtehuise.
Yajaya nechchijtoc ma nieli niinintlayacanca tlacame tlen campa hueli ehuaj.
Tlacame tlen ax niquinixmatiyaya hualahuij para nechtequipanose.
44 Quema quicaquij notlajtol,
inijuanti nechneltoquilíaj.
Sequinoc altepetl ehuani huihuipicaj noixtla.
45 Nochi motemacaj noixtla huan huihuipicatiyohuij quema quisaj campa motlatijtoque.
46 Itztoc TOTECO.
Nijpaquilismacas yajaya tlen nechmocuitlahuía.
Ma tijhueyitlalica Toteco Dios,
notemaquixtijca.
47 Yajaya nopa Dios tlen quincuepilía ica tlen fiero inijuanti tlen nechcocojtoque.
Quintlalijtoc tlacame ipan miyac tlali nomaco para ma niquinnahuati.
48 Yajaya nechmanahuía tlen nocualancaitacahua huan nechhueyitlalía iniixtla tlen nechcocolíaj.
TOTECO, ta tinechmaquixtijtoc ininmaco nopa tlatehuijca tlacame,
49 yeca nitepohuilis tlen ta campa hueli.
Nihuicas huan nijhueyitlalis motoca.
50 Miyac hueltas tijchijtoc para ma nitlatlani, na niDavid,
ninopa tlanahuatijquetl tlen tinechtlapejpenijtoc.
Tijpiya hueyi moyolo ica na tlen tinechtlalijtoc ma nitlanahuati.
Quena, hueyi moyolo nohuaya huan tijpiyas hueyi moyolo para nochipa ica noixhuihua.