41
David tlen mococohua quitlajtlanía Toteco ma quichicahua
1 Paqui nopa tlacatl tlen mocuesohua pampa quinicnelía tlen teicneltzitzi,
pampa TOTECO quipalehuis quema hualas tlaohuijcayotl.
2 TOTECO quimocuitlahuis para axaca quimictis.
Huan TOTECO quitiochihuas tlamiyacapa ipan tlali Israel.
Yajaya ax quicajtehuas,
niyon ax quicahuas ininmaco icualancaitacahua para ma quichihuilica tlen quinequise.
3 Quema huetztos ipan tlaijiyohuilistli,
TOTECO quitlalanas ipan itlapech huan quiijcuenilis nopa cocolistli.
4 Na niquilhui TOTECO:
“TOTECO, na nitlajtlacolchijtoc moca ta.
Xinechtlasojtla huan xinechchicahua.”
5 Nocualancaitacahua quinequij ma nechajsi tlen fiero.
Noca camatij huan quinequij ma nimiqui huan ayoc aca ma nechilnamiquis.
6 Quema nechpaxalohuaj, mochihuaj queja nohuampoyohua,
pero ax nelía tlen quiijtohuaj.
Quema itztoque nohuaya san quitlacaquilíaj tlachque onca para huelis quipatlase ica tlen más fiero,
huan teipa quisase huan teyolmelajtinemise tlen na.
7 Quena, nocualancaitacahua mosentilíaj huan noca camatij.
Tepohuilíaj para ayoc onca pajtli para na huan nimantzi nimiquis.
8 Quiijtohuaj:
“Nopa cocolistli tlen yajaya quipixtoc nelfiero.
Ayoc motlalanas tlen itlapech pampa nimantzi miquis.”
Queja nopa quiijtohuaj tlen na.
9 Nojquiya nechcajtejtoc tlen eliyaya nonelhuampo.
Yajaya tlen ipan nimotemachiyaya huan tlen tlacuayaya nohuaya, ama nechtlahuelcajtoc.
10 Pero ta, TOTECO, xinechtlasojtla.
Xinechtlalana tlen notlapech huan niquincuepilis queja nechchihuilijtoque.
11 Nijmati tinechicnelía pampa ax tiquincahuilijtoc nocualancaitacahua ma nechtlanica.
12 Xinechpalehui pampa nijchihua tlen xitlahuac huan tinechmacatoc tequihuejcayotl ma niitzto nepa moixpa para nochipa.
13 Ma tijhueyichihuaca TOTECO,
yajaya tlen iTeco tohuejcapan tata, Israel.
Quena, ma tijhueyichihuaca ama huan nochipa. Queja nopa ma eli.