50
Toteco Dios techilhuía quejatza ma tijhueyichihuaca
1 Yajaya TOTECO Tlen Más Quipiya Chicahualistli que nochi tlen quintocaxtíaj tiotzitzi,
quinnotztoc nochi tlacame tlen itztoque campa hueli ipan ni tlaltepactli.
Quinnotza tlen itztoque hasta campa quisa tonati huan hasta campa oncalaqui.
2 Toteco Dios ica iyejyejca petlani huan tlahuía tlen Sion,
nopa tepetl campa ijcatoc itiopancal tlen senquistoc yejyectzi.
3 Toteco Dios hualas ica chicahualistli,
huan iixpa hualas se hueyi tlitl tlen quixolejtihualas nochi tlen quipantis.
Tlatomonilotl huan tlapetlanilotl quiyahualohua.
4 Toteco Dios quinnotza nochi tlen itztoque ipan elhuicactli huan ipan tlaltepactli,
para ma quihualtlachilica quejatza quintlajtolsencahuas itlacajhua.
Quiijtohua:
5 “Xiquinsentilica notlacajhua tlen moiyocacajtoque noca na.
Quena, ma hualaca nochi inijuanti tlen quichijtoque tlajtol sencahuali nohuaya,
quema nechmacaque tlacajcahualistli huan quiijtojque para nechtoquilisquíaj.”
6 Nochi elhuicactli tepohuilía para Toteco Dios itztoc xitlahuac.
Huan para yajaya nopa juez tlen tetlajtolsencahuas.
7 “Xijtlacaquilica nochi innotlacajhua,
xijcaquica nochi tlen niquijtos.
Nimechteilhuis tlamiyacapa ica nochi tlamantli tlen inquichijtoque,
pampa na niDios huan niimoTeco.
8 Ax nimechajhuas pampa ax innechmacaj tlacajcahualistli,
niyon pampa ax inquinmictíaj tlapiyalime huan inquintlatíaj noixpa,
pampa quena, ya nopa inquichihuaj.
9 Pero ax ya nopa tlen nijnequi.
Para na ax monequi xinechmacaca tlacajcahualistli,
queja becerros huan oquich chivojme tlen hualahuij imopotrero.
10 Pampa na noaxcahua nochi tlapiyalime ipan cuatitlamitl huan nochi huacaxme tlen campa hueli tlacuajtinemij ipan senquistoc nochi tlachiquiltini.
11 Niquinixmati nochi totome campa hueli huan nochi tlapiyalime tlen nemij cuatitla, pampa noaxcahua.
12 Intla nimayanasquía, ax nimechtlajtlanisquía xinechtlamacaca,
pampa ni tlaltepactli huan nochi tlen eltoc ipani noaxca.
13 ¿Inmoilhuíaj nimotlamaca ica torojme ininnacayo,
huan niqui inieso oquich chivojme?
¡Axtle!
14 Nijnequi xinechtlascamatilica ica nochi tlen nimechchihuilía huan ya nopa niquitas queja se tlacajcahualistli.
Xijtlamichihuaca nochi tlen inquiijtojtoque para inquichihuase.
15 Huan xinechnojnotzaca quema inmocuesohuaj,
huan na nimechmanahuis huan imojuanti innechnextilise miyac tlatlepanitacayotl.”
16 Pero Toteco quinilhuía tlacame tlen ax cuajcualme:
“Ax inquipiyaj tequihuejcayotl para incamatise tlen nopa tlajtol sencahuali,
tlen quiijtohua tlen nimechmacas,
niyon ax hueli intepohuilise notlanahuatilhua.
17 Pampa ax inquicaquij quema nimechtlacahualtía,
niyon ax inquichihuilíaj cuenta notlajtol.
18 Quema inquiitaj se tlaxtejquetl,
inmohuampochihuaj ihuaya,
huan nojquiya inmohuicaj ininhuaya tlen quichijtinemij tlen hueli ica tlen ax ininnamic.
19 San campa hueli inquicalaquijtinemij imonenepil para inquiijtose tlen fiero.
Nimantzi inistlacatij.
20 Inmosehuíaj huan inquiteilhuíaj se tlen imonelicni.
Quena, yajaya tlen nojquiya icone imonana huan san sejco inmoscaltijque,
inquitlaijilhuíaj.
21 Nochi ya ni inquichijtoque,
huan na ax tleno niquijtojtoc.
Huajca inmoilhuijtoque para na nieli san se queja imojuanti.
Pero ama nimechixcoilhuis nochi tlen inquichijtoque,
huan nimechpannextilis nochi.
22 Xijtlacaquilica ya ni,
imojuanti tlen innechilcahuaj na, niimoTeco Dios.
Intla ax innechilnamiquij,
nimechhuejhuelos huan axaca itztos tlen huelis inmechmanahuis nomaco.
23 Pero quema innechtlascamatij ica nochi tlen nimechchihuilía,
eltoc queja se tlacajcahualistli tlen nechnextilía innechtlepanitaj.
Huan nopa tlacatl tlen moyolilhuía campa mocuapolojtoc,
huan mocuepa ipan noojhui tlen xitlahuac,
na nijmaquixtis.”