90
Tlacame ax huejcahuaj
1 Toteco, ta nochipa titechmocuitlahuijtinentoc,
hasta tlen ipejya nochi xihuitl huan para nochi tonali.
2 Hasta quema aya tiquinchijchihuayaya tepetini huan tlaltepactli, ta ipa tiitztoc.
Pampa ta, tiToteco Dios, ax quema tijpixqui mopejya,
huan ax quema tijpiyas motlamiya.
3 Ta tijchihua para nochi tlacame ma mocuepaca tlali.
Quena, ticamati huan tiquijtohua:
“Ximiquica intlacame.”
4 Pampa mil xihuitl ta tiquita queja se tonal tlen panoc yalohua,
o queja elisquía se eyi hora quema se tlamocuitlahuiyaya tlayohua.
5 Toyolis motlaloti queja atl tlen hualtemo chicahuac ipan se atlajtli.
Huan ica se tlalochtli tiixpolijtehuaj queja se temictli.
Nojquiya tiitztoque queja se xihui cuahuitl.
6 Ica ijnaloc moscaltía huan cahuani,
huan ica tiotlac quitzontequij huan huaqui.
7 Pampa ica mohueyi cualancayo titechtlaijiyohuiltía huan titechtzontlamiltía.
8 Totlajtlacolhua huan totlaixpanolhua tlanempa nestoc moixpa.
9 Yeca nochi tonali huan nochi xihuitl tijpanoj huejhueyi tlaohuijcayotl,
tlen ta titechtitlanilía ica mohueyi cualancayo.
10 San titechcahuilía titlacame ma tiitztoca setenta xihuitl.
Huan tlen quentzi más tejtetique san tiquincahuilía ma itztoca ochenta xihuitl.
Pero ipan nochi nopa xihuitl san tijpanoj tlaohuijcayotl huan cuesoli,
pampa nochi nopa xihuitl san panotiquisa huan tojuanti san tiixpolijtehuaj.
11 ¿Ajqueya quimachilía nochi tlen tihuelis tijchihuas quema ticualani?
¿Ajqueya tlen tojuanti mitzimacasi queja quinamiqui?
12 Ax miyac tonali tijpiyaj,
huajca xitechnextili quejatza ma tijchihuaca para ax timotonalpolose,
huan para ma tijpiyaca tlalnamiquistli ipan toyolo nochi tonali.
13 TOTECO, xihuala huan xitechtiochihua.
¿Hasta quema tlamis ticualantos?
Xitechtlasojtla tojuanti timotlatequipanojcahua.
14 Mojmostla ica ijnaloc xitechnextili moteicnelilis,
huan nochi toyolis timitzhuicatise huan tiyolpactose.
15 Toteco, xitechmaca paquilistli queja ipatlaca nopa tlaohuijcayotl tlen tijpanoque.
Huan xitechcahuili ma tiitztoca ica yejyectzi para miyac xihuitl,
queja imiyaca nopa xihuitl quema tijpanoque tlamantli tlen fiero.
16 Xijchihua para sampa ma tiquitaca nopa huejhueyi chicahualnescayotl tlen tijchihua.
Huan toconehua ma quiitaca nochi nopa yejyectzitzi tlamantli san se queja tijchihuayaya achtohuiya.
17 TOTECO, ta titoDios,
titechtlahuilía ica motlatlanex huan titechnextilía para titechcualita.
Xitechpalehui para nochi tlen tijchihuase ma cualquisas huan ma huejcahuas.
Quena, Toteco, ma cualquisa nochi tlen toma quichihuas pampa ta titechfuerzajmaca.