97
Toteco nochi quinahuatía
1 ¡Nochi tlaltepactli ma paqui pampa TOTECO tlanahuatía!
Huan nochi nopa pilaltepetzitzi tlen mopantíaj tlatlajco hueyi atl,
xiquinilhuica nojquiya ma paquica.
2 Mixtli huan tzintlayohuilotl quiyahualojtoc Toteco.
Huan itlanahuatilis pejtoc ipan tlen melahuac huan tlen xitlahuac.
3 Iixpa tlayacanti se tlitl tlen quintzontlamiltía icualancaitacahua.
4 Nopa tlapetlanilotl tlen yajaya quititlani quitlahuilía nochi tlaltepactli.
Huan ni tlaltepactli huihuipica quema quiita.
5 Nochi tepetini atiyaj queja cera iixtla TOTECO tlen iaxca nochi tlaltepactli.
6 Elhuicactli tlayolmelahua para Toteco xitlahuac tetlajtolsencahua.
Huan nochi tlaltepactli quiita ihueyitilis.
7 Ma mopinahuaca nochi tlen quinhueyichihuaj teteyome,
huan nochi tlen mohueyimatij ica inintlaixcopincayohua tlen ax tleno ininpati.
Nochi sequinoc imojuanti tlen tlacame inmechtocaxtíaj “intiotzitzi” ximotlancuaquetzaca iixtla Toteco.
8 TOTECO, nopa altepetl Jerusalén huan nochi altepetini ipan tlali Judá quipiyaj paquilistli ica motlamachtil.
9 Pampa ta, tiTOTECO, tijnahuatía nochi tlaltepactli,
huan más tihueyi que nochi sequinoc tlen quintocaxtíaj tiotzitzi.
10 TOTECO quinicnelía nochi tlen quicocolíaj tlen ax cuali.
Quinmocuitlahuía itlacajhua huan quinchololtía ininmaco tlaixpanoca tlacame.
11 Tlen xitlahuac ininyolis nemi ipan itlahuil Toteco,
huan tlen cuali ininyolo quipantíaj paquilistli.
12 Xipaquica ipan TOTECO nochi imojuanti tlen initztoque xitlahuac iixtla.
Xijhueyichihuaca huan nochipa xiquilnamictoca para Toteco yajaya senquistoc tlatzejtzeloltic.