5
Na Gegere Tabu Te Lovo.
1 Mi inau tu ghoi rei va mu righia na buka tabu te lovo tana oka.
2 Mana angel te nuatiu, “Na hava to righia?” “Inau tu righia na buka lologhi te loko kokou.” Ughaghua vania. “Mete tate te mana tolu hangavulu na darona me hangavulu lima na feet na volapana.”
3 Ma gaia te bosa vaniu, Na buka lologhu te logoa na lei dete vanira na lei kema lokana pari Ta sakai na levuna te bosa me vanira gaira kara gito kara agu ghuru kehara tana pari. Ma gaira kara bosa dikala taboa kara tuva kehara tana pari.
4 Aeni na ha'a a lord pukuni maana te bosa'a. Inau tu ma vetena na mate eni tana valedia rana tinoni gito, mi tana valedia rahei tara bosa taboa na ahagu. ma nigua na rutu sule ke ghaha ilokana na vale keri polo ke durake udolu tana lei ghai mana vatu soko.”
Na Vinekama Ilokani Kei.
5 Ma angel te kokoe kolu'u te mai itagua me ghaghua, “Ko rei tada! mo ko righia sakai na totobo te tate mai kokou.”
6 Inau tu huatia, “Na hava na totobo ia?” Ma gaia te bosa tughu vaniu, na totobo keri ke na kei na vatei kageani na vuavua, mete vanughia na paludiva na lei tinoni tana pari.”
7 Mi tana bona tara hangavia na papatana na keri, a sakai na vaivine te sopou ilokana.
8 Ma angel te ghaghua, “Na ahana na vaivine eni ke, gekegeke dika,” ma gaia te ghoi vongoti dia nia na papatana.
9 Mi inau tu rei va'a mu righira erua na vaivine toro lovo mai tamami, kolui toro nighi lovo na ghata tana ghuri. Na ghatadia te vagha na ghata ni manu kama, mara hola na daroa na kei moro nia lovo dato ikokou.
10 Mi inau tu huatia na angel, “Ivei koro hola va na kei.”
11 Ma gaia te bosa tughu, “Tana komu i Babylon, ivei kara kisua ga na vale tabu ke gonidila tua, ge kara talua iga na kei tana malei sopouna.